ಮತ್ತೆ ಒಲಿಂಪಿಕ್ಸ್‌ ಮುಂದೂಡಿದರೆ ಪ್ಲಾನ್‌ ಬಿ ಇಲ್ಲ: ಟಕಾಯ

Team Udayavani, Apr 15, 2020, 6:59 AM IST

ಟೋಕಿಯೊ: ಕೋವಿಡ್-19 ವೈರಸ್‌ ವ್ಯಾಪಕವಾಗಿ ಹರಡುತ್ತಿರುವ ಕಾರಣಕ್ಕೆ ಒಲಿಂಪಿಕ್ಸ್‌ ಕ್ರೀಡಾಕೂಟವನ್ನು ಇನ್ನೊಂದು ಸಲ ಮುಂದೂಡಬೇಕಾದ ಪ್ರಮೇಯ ಒದಗಿದರೆ ಯಾವುದೇ ಪರ್ಯಾಯ ಯೋಜನೆ (ಪ್ಲಾನ್‌ ಬಿ) ಇಲ್ಲ ಎಂದು ಆಯೋಜಕರು ತಿಳಿಸಿದ್ದಾರೆ.

ಈಗಿನ ಯೋಜನೆಯಂತೆ ಮುಂದೂಡಲ್ಪಟ್ಟ ಒಲಿಂಪಿಕ್‌ ಕ್ರೀಡಾಕೂಟವು 2021ರ ಜುಲೈ 23ರಂದು ಆರಂಭವಾಗಲಿದೆ. ಆಗಸ್ಟ್‌ 24ರಿಂದ ಪ್ಯಾರಾಲಂಪಿಕ್ಸ್‌ ನಡೆಯಲಿದೆ. ಈ ಬೇಸಗೆಯಲ್ಲಿ ಒಲಿಂಪಿಕ್ಸ್‌ ಆಯೋಜಿಸಲು ಸಾಧ್ಯವಿಲ್ಲ ಎನ್ನುವುದು ಖಚಿತವಾದ ಬಳಿಕ ಮುಂದೂಡಿ, ಹೊಸ ದಿನಾಂಕವನ್ನು ಅಂತಾರಾಷ್ಟ್ರೀಯ ಒಲಿಂಪಿಕ್ಸ್‌ ಸಮಿತಿ (ಐಒಸಿ) ಕಳೆದ ತಿಂಗಳು ನಿಗದಿಪಡಿಸಿತ್ತು ಎಂದು ಟೋಕಿಯೊ ಒಲಿಂಪಿಕ್ಸ್‌ನ ವಕ್ತಾರ ಮಸಾ ಟಕಾಯ ಹೇಳಿದ್ದಾರೆ.

ಮುಂದಿನ ಬೇಸಗೆಗಿಂತ ಹೆಚ್ಚು ಅವಧಿಗೆ ಕ್ರೀಡಾಕೂಟವನ್ನು ಮುಂದೂಡುವುದು ಸಾಧ್ಯವಿಲ್ಲ ಎಂದು ಜಪಾನ್‌ ಪ್ರಧಾನಿ ಶಿಂಜೊ ಅಬೆ ಹಾಗೂ ಐಒಸಿ ಅಧ್ಯಕ್ಷ ಥಾಮಸ್‌ ಬಾಕ್‌ ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ. ಹೀಗಾಗಿ, ನಿಗದಿಯಂತೆ ಒಲಿಂಪಿಕ್ಸ್‌ ಆಯೋಜಿಸಲು ನಾವು ಸಿದ್ಧತೆ ಕೈಗೊಳ್ಳುತ್ತಿದ್ದೇವೆ ಎಂದು ಮಸಾ ಟಕಾಯ ಸ್ಪಷ್ಟಪಡಿಸಿದ್ದಾರೆ.

ಸುಮಾರು 11 ಸಾವಿರ ಕ್ರೀಡಾಪಟುಗಳು, 4,400 ಪ್ಯಾರಾಲಂಪಿಕ್‌ ಪಟುಗಳು ಹಾಗೂ 206 ದೇಶಗಳ ಅಧಿಕಾರಿಗಳು ಇದರಲ್ಲಿ ಭಾಗವಹಿಸಲಿದ್ದಾರೆ. ಅವರ ಪ್ರಯಾಣ, ವಸತಿ, ಪ್ರೇಕ್ಷಕರು ಹಾಗೂ ಕ್ರೀಡಾಂಗಣ ಮರು ಸಿದ್ಧತೆಗಾಗಿ ಜಪಾನ್‌ 2ರಿಂದ ಆರು ಬಿಲಿಯನ್‌ ಅಮೆರಿಕನ್‌ ಡಾಲರ್‌ಗಳಷ್ಟು ಹೆಚ್ಚುವರಿ ವೆಚ್ಚವನ್ನು ಭರಿಸಬೇಕಾಗಿದೆ.