ಭದ್ರತಾ ಖಾತರಿ ಲಭಿಸಿದರೆ ವರ್ಷಾಂತ್ಯ ಭಾರತ-ಪಾಕಿಸ್ಥಾನ ಡೇವಿಸ್‌ ಕಪ್‌ ಟೆನಿಸ್‌

Team Udayavani, Sep 14, 2019, 5:28 AM IST

ಹೊಸದಿಲ್ಲಿ: ಮುಂದೂಡಲ್ಪಟ್ಟ ಭಾರತ-ಪಾಕಿಸ್ಥಾನ ನಡುವಿನ ಡೇವಿಸ್‌ ಕಪ್‌ ಟೆನಿಸ್‌ ಪಂದ್ಯಾವಳಿ ನವೆಂಬರ್‌ ಕೊನೆಯಲ್ಲಿ ಇಸ್ಲಾಮಾಬಾದ್‌ನಲ್ಲಿ ನಡೆಯಲಿದೆ, ಆದರೆ ಇದಕ್ಕೆ ಭದ್ರತಾ ಖಾತರಿ ಅಗತ್ಯ, ಇಲ್ಲವಾದರೆ ಕೂಟವನ್ನು ಸ್ಥಳಾಂತರಿ ಸಬೇಕಾಗಬಹುದು ಎಂಬುದಾಗಿ ಅಖೀಲ ಭಾರತ ಟೆನಿಸ್‌ ಅಸೋ. (ಎಐಟಿಎ) ತಿಳಿಸಿದೆ.

ಮೂಲ ವೇಳಾಪಟ್ಟಿ ಪ್ರಕಾರ ಈ ಪಂದ್ಯಾವಳಿ ಸೆ. 14 ಮತ್ತು 15ರಂದು ಇಸ್ಲಾಮಾಬಾದ್‌ನಲ್ಲಿ ನಡೆಯಬೇಕಿತ್ತು. ಆದರೆ ಎರಡೂ ದೇಶಗಳ ರಾಜಕೀಯ ಬಿಕ್ಕಟ್ಟು ಹಾಗೂ ಭದ್ರತಾ ಸಮಸ್ಯೆಯಿಂದಾಗಿ ಭಾರತ ಪಾಕಿಸ್ಥಾನದಲ್ಲಿ ಆಡಲು ನಿರಾಕರಿಸಿತ್ತು. ಕೂಟವನ್ನು ಮುಂದೂಡುವಂತೆ ಹಾಗೂ ಇಲ್ಲಿಂದ ಸ್ಥಳಾಂತರಿಸು ವಂತೆಯೂ ಮನವಿ ಸಲ್ಲಿಸಿತ್ತು.

ನ. 4ರಂದು ಭದ್ರತಾ ಪರಿಶೀಲನೆ
ಶುಕ್ರವಾರ ಮಾಧ್ಯಮ ಪ್ರಕಟನೆ ಯೊಂದನ್ನು ಬಿಡುಗಡೆ ಮಾಡಿದ ಎಐಟಿಎ, ನ. 29-30 ಅಥವಾ ನ. 30-ಡಿ. 1ರಂದು ಈ ಪಂದ್ಯಾವಳಿ ಇಸ್ಲಾಮಾಬಾದ್‌ನಲ್ಲಿ ನಡೆಯಲಿದೆ. ಆದರೆ ಇದಕ್ಕೆ ಭದ್ರತಾ ಖಾತರಿ ಮುಖ್ಯ. ಇದಕ್ಕಾಗಿ ನ. 4ರಂದು ಇನ್ನೂ ಒಂದು ಸುತ್ತಿನ ಭದ್ರತಾ ಪರಿಶೀಲನೆ ನಡೆಸಬೇಕಾಗಿದ್ದು, ಇದರ ವರದಿಯ ಆಧಾರದಲ್ಲಿ ಈ ಕೂಟವನ್ನು ಫೈಸಾಲಾಬಾದ್‌ನಲ್ಲಿ ನಡೆಸಬೇಕೋ ಅಥವಾ ಸ್ಥಳಾಂತರಿಸಬೇಕೋ ಎಂಬುದನ್ನು ನಿರ್ಧರಿಸಲಾಗುತ್ತದೆ’ ಎಂದು ಎಐಟಿಎ ತಿಳಿಸಿದೆ.