ಫಿಫಾ ಶ್ರೇಯಾಂಕ ಪ್ರಕಟ: ಭಾರತಕ್ಕೆ 96ನೇ ಸ್ಥಾನ
Team Udayavani, Jul 7, 2017, 3:45 AM IST
ನವದೆಹಲಿ: ಫಿಫಾ ಫುಟ್ಬಾಲ್ ಶ್ರೇಯಾಂಕದಲ್ಲಿ ಭಾರತ 2ನೇ ಸಾರ್ವಕಾಲಿಕ ಶ್ರೇಷ್ಠ ದಾಖಲೆಯೊಂದನ್ನು ನಿರ್ಮಿಸಿದೆ. 96ನೇ ಸ್ಥಾನಕ್ಕೆ ಏರುವ ಮೂಲಕ ಕಳೆದ 21 ವರ್ಷಗಳಲ್ಲೇ ಅತ್ಯುತ್ತಮ ಶ್ರೇಯಾಂಕಕ್ಕೇರಿದೆ. ಇದು ಉಪಖಂಡದಲ್ಲೇ 12ನೇ ಶ್ರೇಷ್ಠ ಶ್ರೇಯಾಂಕ.
ಒಟ್ಟಾರೆ 2ನೇ ಶ್ರೇಷ್ಠ ಶ್ರೇಯಾಂಕ: ಭಾರತ ಒಟ್ಟಾರೆ ಫುಟ್ಬಾಲ್ ಇತಿಹಾಸದಲ್ಲಿ ಪಡೆದಿರುವ ಒಟ್ಟಾರೆ 2ನೇ ಶ್ರೇಷ್ಠ ಶ್ರೇಯಾಂಕವಿದು. 1996ರಲ್ಲಿ ಭಾರತ 94ನೇ ರ್ಯಾಂಕಿಂಗ್ ಪಡೆದುಕೊಂಡಿತ್ತು. ಇದು ಒಟ್ಟಾರೆ ಫುಟ್ಬಾಲ್ ಇತಿಹಾಸದಲ್ಲಿ ಭಾರತ ಪಡೆದ ಶ್ರೇಷ್ಠ ಶ್ರೇಯಾಂಕವಾಗಿದೆ. ಇದಕ್ಕೂ ಮುನ್ನ ಭಾರತ 1993ರಲ್ಲಿ 99ನೇ ಶ್ರೇಯಾಂಕ ಪಡೆದುಕೊಂಡಿತ್ತು.
2 ವರ್ಷದಲ್ಲಿ 77 ಸ್ಥಾನ ಏರಿಕೆ: ಕಳೆದ 2 ವರ್ಷಗಳಲ್ಲಿ ಭಾರತ ಫಿಫಾ ಶ್ರೇಯಾಂಕದಲ್ಲಿ ಭಾರೀ ಯಶಸ್ಸು ಕಂಡಿದೆ. 77 ಸ್ಥಾನ ಏರಿಕೆ ಕಂಡಿದೆ. ಅಷ್ಟೇ ಅಲ್ಲ ಭಾರತ ಇತ್ತೀಚೆಗೆ ಒಟ್ಟು 15 ಪಂದ್ಯ ಆಡಿದೆ. ಇದರಲ್ಲಿ 13 ಪಂದ್ಯ ಗೆದ್ದಿದೆ. ಕಳೆದ 8 ಪಂದ್ಯಗಳಲ್ಲಿ ಭಾರತ ಅಜೇಯವಾಗಿ ಗೆಲುವಿನ ನಾಗಾಲೋಟ ಕಂಡಿದೆ ಎನ್ನುವುದು ಗಮನಿಸಬೇಕಾದ ಸಂಗತಿಯಾಗಿದೆ. ಇದೇ ವೇಳೆ ಭಾರತ ತಂಡವನ್ನು ಅಖೀಲ ಭಾರತೀಯ ಪುಟ್ಬಾಲ್ ಸಂಸ್ಥೆ ಅಧ್ಯಕ್ಷ ಪ್ರಪುಲ್ ಪಟೇಲ್ ಶ್ಲಾಘಿಸಿದ್ದಾರೆ. ಆಟಗಾರರಿಗೆ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ.