“ಬಿಗ್‌ ಬಾಸ್‌’ ಅನುಭವ ಆಗುತ್ತಿದೆ: ಶಿಖರ್‌ ಧವನ್‌

Team Udayavani, Sep 17, 2020, 2:56 AM IST

ದುಬಾೖ: ಜೈವಿಕ ಸುರಕ್ಷಾ ವಲಯ “ಬಿಗ್‌ ಬಾಸ್‌’ ಅನುಭವ ನೀಡುತ್ತಿದೆ ಎಂಬುದಾಗಿ ಡೆಲ್ಲಿ ತಂಡದ ಆರಂಭಕಾರ ಶಿಖರ್‌ ಧವನ್‌ ಹೇಳಿದ್ದಾರೆ.

“ಬಯೋ ಬಬಲ್‌ ಏರಿಯಾದಲ್ಲಿ ಉಳಿಯುವುದೆಂದರೆ ಬಿಗ್‌ ಬಾಸ್‌ ಕಾರ್ಯದಲ್ಲಿ ನಮ್ಮ ಮಾನಸಿಕ ದೃಢತೆಯನ್ನು ಪರೀಕ್ಷಿಸಿದಂತೆ. ಇದು ಎಲ್ಲರಿಗೂ ಹೊಸ ಅನುಭವ. ಸವಾಲಿನದೂ ಆಗಿದೆ. ನಾನಿದನ್ನು ಸಕಾರಾತ್ಮಕವಾಗಿ ಸ್ವೀಕರಿಸಿದ್ದೇನೆ. ನಾವು ನಮ್ಮೊಂದಿಗೆ ಎಷ್ಟು ಮಾತಾಡಿಕೊಳ್ಳಬಲ್ಲೆವು ಎಂಬುದರ ಮೇಲೆ ಪರಿಸ್ಥಿತಿಯನ್ನು ನಿಭಾಯಿಸಲು ಸಾಧ್ಯ. ನಮಗೆ ನಮಗಿಂತ ಮಿಗಿಲಾದ ಗೆಳೆಯರಿಲ್ಲ ಎಂಬುದು ಇಲ್ಲಿ ಸಾಬೀತಾಗುತ್ತದೆ’ ಎಂದು ಧವನ್‌ ಹೇಳಿದರು.

“ನಿಮ್ಮ ಸುತ್ತ 10 ಮಂದಿ ಸಕಾರಾತ್ಮಕ ಮನಸ್ಥಿತಿಯ ಜನರು ಇರಬಹುದು. ಆದರೆ ನೀವೇ ನಿಮ್ಮ ಗೆಳೆಯನಾಗಬೇಕಾದುದು ಮುಖ್ಯ. ಈ ಐಪಿಎಲ್‌ನಲ್ಲಿ ತಮ್ಮ ಯಶಸ್ಸು, ವೈಫ‌ಲ್ಯವನ್ನು ನಮ್ಮೊಂದಿಗೇ ಅವಲೋಕಿಸಿಕೊಳ್ಳಬೇಕಿದೆ. ಹೊಟೇಲಿನ ಅದೇ ಸೀಮಿತ ಜಾಗದಲ್ಲಿ, ಅದೇ ಸೀಮಿತ ಜನರ ಸುತ್ತ ನಾವು ಇರಬೇಕಾಗುತ್ತದೆ. ಇದು ಎಲ್ಲರ ಮೇಲೂ ಭಾರೀ ಪರಿಣಾಮ ಬೀರಲಿದೆ’ ಎಂದರು.