ಚೀನ ಓಪನ್‌: ಕಶ್ಯಪ್‌,ಪ್ರಣೀತ್‌ ಪರಾಭವ

ಮಿಕ್ಸೆಡ್‌ ಡಬಲ್ಸ್‌: ರಾಂಕಿ ರೆಡ್ಡಿ-ಅಶ್ವಿ‌ನಿ ಪೊನ್ನಪ್ಪ ಜೋಡಿ ಔಟ್‌

Team Udayavani, Nov 8, 2019, 5:30 AM IST

ಫ‌ುಝು (ಚೀನ): “ಚೀನ ಓಪನ್‌ ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯಲ್ಲಿ ಭಾರತದ ಸ್ಟಾರ್‌ ಶಟ್ಲರ್‌ಗಳ ಸೋಲಿನ ಆಟ ಮುಂದುವರಿದಿದೆ. ಪಾರುಪಳ್ಳಿ ಕಶ್ಯಪ್‌, ಬಿ. ಸಾಯಿ ಪ್ರಣೀತ್‌ ಪುರುಷರ ಸಿಂಗಲ್ಸ್‌ ಸ್ಪರ್ಧೆಯ ದ್ವಿತೀಯ ಸುತ್ತಿನಲ್ಲಿ ಸೋತು ಕೂಟದಿಂದ ಹೊರಬಿದ್ದಿದ್ದಾರೆ.

ಗುರುವಾರ ನಡೆದ ತೀವ್ರ ಪೈಪೋಟಿಯ ಪಂದ್ಯದಲ್ಲಿ ಪ್ರಣೀತ್‌ ಡೆನ್ಮಾರ್ಕ್‌ನ ಆ್ಯಂಡ್ರೆಸ್‌ ಆ್ಯಂಟೆನ್ಸೆನ್‌ ವಿರುದ್ಧ 22-20, 20-22, 16-21 ಅಂತರದಿಂದ ಸೋಲು ಕಾಣಬೇಕಾಯಿತು. ಇವರಿಬ್ಬರ ಕಾದಾಟ ಒಂದು ಗಂಟೆ, 24 ನಿಮಿಷಗಳ ಕಾಲ ಸಾಗಿತು.

ಪಿ. ಕಶ್ಯಪ್‌ ಸೋಲು
ದ್ವಿತೀಯ ಸುತ್ತಿನ ಇನ್ನೊಂದು ಪಂದ್ಯದಲ್ಲಿ ಪಾರುಪಳ್ಳಿ ಕಶ್ಯಪ್‌ ಡೆನ್ಮಾರ್ಕ್‌ನ ವಿಕ್ಟರ್‌ ಅಲೆಕ್ಸನ್‌ ವಿರುದ್ಧ 13-21, 19-21 ನೇರ ಗೇಮ್‌ಗಳ ಸೋಲನುಭವಿಸಿದರು. 43 ನಿಮಿಷಗಳ ವರೆಗೆ ಈ ಹೋರಾಟ ಸಾಗಿತು. ಈ ಸೋಲಿನೊಂದಿಗೆ ಕಶ್ಯಪ್‌ ಒಂದೇ ವರ್ಷದಲ್ಲಿ ಅಲೆಕ್ಸನ್‌ ವಿರುದ್ಧ 2ನೇ ಬಾರಿ ಮುಗ್ಗರಿಸಿದಂತಾಯಿತು.

ಮಿಕ್ಸೆಡ್‌ ಡಬಲ್ಸ್‌ನಲ್ಲಿ ಶ್ರೆಯಾಂಕ ರಹಿತ ಸಾತ್ವಿಕ್‌ರಾಜ್‌ ರಾಂಕಿ ರೆಡ್ಡಿ-ಅಶ್ವಿ‌ನಿ ಪೊನ್ನಪ್ಪ ಜೋಡಿ ಕೊರಿಯಾದ 5ನೇ ಶ್ರೆಯಾಂಕದ ಸಿಯೋ ಸೆಯಾಂಗ್‌ ಜೇ- ಚೇ ಯುಜುಂಗ್‌ ವಿರುದ್ಧ 21-23, 16-21 ಅಂತರದಿಂದ ಪರಾಭವಗೊಂಡಿತು.

ಕ್ವಾರ್ಟರ್‌ ಫೈನಲ್‌ಗೆ ಸಾತ್ವಿಕ್‌-ಚಿರಾಗ್‌
ಸಾತ್ವಿಕ್‌ರಾಜ್‌ ರಾಂಕಿ ರೆಡ್ಡಿ-ಚಿರಾಗ್‌ ಶೆಟ್ಟಿ ಪುರುಷರ ಡಬಲ್ಸ್‌ ವಿಭಾಗದಲ್ಲಿ 6ನೇ ಶ್ರೇಯಾಂಕಿತ ಜಪಾನಿನ ಹಿರೋಯುಕಿ ಎಂಡೊ-ಯುಟ ವಟಾನಬೆ ವಿರುದ್ಧ 21-18, 21-23, 21-11 ಅಂತರದ ಜಯ ಸಾಧಿಸಿ “ಚೀನ ಓಪನ್‌ ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಕಳೆದ ತಿಂಗಳು ನಡೆದ ಫ್ರೆಂಚ್‌ ಓಪನ್‌ನಲ್ಲಿ ಬೆಳ್ಳಿ ಪದಕ ವಿಜೇತ ಈ ಜೋಡಿ ಪ್ರಸಕ್ತ ಕೂಟದಲ್ಲಿ ಭಾರತದ ಭರವಸೆಯಾಗಿ ಉಳಿದಿದೆ.

ಶುಕ್ರವಾರ ನಡೆಯುವ ಕ್ವಾರ್ಟರ್‌ ಫೈನಲ್‌ನಲ್ಲಿ ಸಾತ್ವಿಕ್‌-ಚಿರಾಗ್‌ ಜೋಡಿ ಚೀನದ ಲೀ ಜುನ್‌ ಹುಯಿ-ಲಿಯು ಯು ಚೆನ್‌ ವಿರುದ್ಧ ಸೆಣಸಲಿದ್ದಾರೆ.

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ