ಕೆ.ಎಲ್‌.‌ ರಾಹುಲ್‌ಗೆ ಕೋವಿಡ್: ವಿಂಡೀಸ್‌ ಪ್ರವಾಸಕ್ಕೆ ಗೈರು?

Team Udayavani, Jul 22, 2022, 6:30 AM IST

ಮುಂಬಯಿ: ಭಾರತ ಕ್ರಿಕೆಟ್‌ ತಂಡದ ಉಪನಾಯಕ ಕೆ.ಎಲ್‌. ರಾಹುಲ್‌ ಇತ್ತೀಚೆಗಷ್ಟೇ ಕ್ರೀಡಾ ಹರ್ನಿಯಾ ಅಥವಾ ತೊಡೆಸಂದು ನೋವಿನಿಂದ ಚೇತರಿಸಿಕೊಂಡಿದ್ದಾರೆ. ಇನ್ನೇನು ಟಿ20 ಸರಣಿಗಾಗಿ ವೆಸ್ಟ್‌ ಇಂಡೀಸ್‌ ಪ್ರವಾಸಕ್ಕೆ ಹೊರಡಬೇಕು ಎನ್ನುವಷ್ಟರಲ್ಲಿ ಅವರಿಗೆ ಕೊರೊನಾ ಇರುವುದು ಖಚಿತವಾಗಿದೆ.

ಸ್ವಲ್ಪ ವ್ಯತ್ಯಾಸವಾದರೂ ಅವರು ವಿಂಡೀಸ್‌ ಪ್ರವಾಸ ತಪ್ಪಿಸಿಕೊಳ್ಳಬಹುದು. ಅವರು ಮುಂದಿನ ವಾರದಲ್ಲಿ ವಿಂಡೀಸ್‌ ಪ್ರವಾಸಕ್ಕೆ ತೆರಳಲು ಸಿದ್ಧತೆಯಾಗಿತ್ತು. ಅಷ್ಟರೊಳಗೆ ಅವರು ಕೊರೊನಾದಿಂದ ಚೇತರಿಸಿಕೊಳ್ಳದಿದ್ದರೆ ಪ್ರವಾಸ ತಪ್ಪಿಸಿಕೊಳ್ಳಬಹುದು.

ಆದರೆ ರಾಹುಲ್‌ಗೆ ಯಾವಾಗ ಕೊರೊನಾ ತಗಲಿದ್ದು, ಈಗಿನ ಪರಿಸ್ಥಿತಿ ಹೇಗಿದೆ? ಪ್ರತ್ಯೇಕವಾಸ ಶುರುವಾಗಿದೆಯಾ? ಇನ್ನೆಷ್ಟು ದಿನ ಬಾಕಿಯಿದೆ? ಈ ಯಾವುದೇ ಮಾಹಿತಿಗಳು ಲಭ್ಯವಾಗಿಲ್ಲ. ಅವರು ಶಸ್ತ್ರಚಿಕಿತ್ಸೆ ಹಿನ್ನೆಲೆಯಲ್ಲಿ ದ.ಆಫ್ರಿಕಾ, ಇಂಗ್ಲೆಂಡ್‌ ವಿರುದ್ಧದ ಸರಣಿಗಳನ್ನು ತಪ್ಪಿಸಿಕೊಂಡಿದ್ದಾರೆ. ವಿಂಡೀಸ್‌ ವಿರುದ್ಧವೂ ಗೈರಾದರೆ ಟಿ20 ವಿಶ್ವಕಪ್‌ಗೆ ಸರಿಯಾಗಿ ಅಭ್ಯಾಸ ನಡೆಸಲು ಕಷ್ಟವಾಗಬಹುದು.