ಮಲೇಷ್ಯಾ ಮಾಸ್ಟರ್: ಸೈನಾ, ಜಯರಾಮ್‌ ಕ್ವಾರ್ಟರ್‌ಗೆ

Team Udayavani, Jan 20, 2017, 3:45 AM IST

ಮಲೇಷ್ಯಾ: ಗೆಲುವಿನ ಓಟ ಮುಂದುವರಿಸಿರುವ  ಸೈನಾ ನೆಹ್ವಾಲ್‌ ಮತ್ತು ಅಜಯ್‌ ಜಯರಾಮ್‌ ಮಲೇಷ್ಯಾ ಮಾಸ್ಟರ್ ಗ್ರಾÂಂಡ್‌ ಪ್ರಿಕ್ಸ್‌ ಬ್ಯಾಡ್ಮಿಂಟನ್‌ ಗೋಲ್ಡ್‌ ಟೂರ್ನಿಯಲ್ಲಿ ಕ್ವಾರ್ಟರ್‌ ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಗುರುವಾರ ನಡೆದ ಮಹಿಳೆಯರ ಸಿಂಗಲ್ಸ್‌ ಪ್ರೀ ಕ್ವಾರ್ಟರ್‌ನಲ್ಲಿ ಟೂರ್ನಿಯ ಅಗ್ರ ಶ್ರೇಯಾಂಕಿತ ಆಟಗಾರ್ತಿ ಸೈನಾ 21-17, 21-12 ರಿಂದ ಇಂಡೋನೇಷ್ಯಾದ ಹಾನ್ನಾ ರಮದಿನಿ ವಿರುದ್ಧ ಜಯ ಸಾಧಿಸಿದರು. ಮೊದಲ ಸೆಟ್‌ನ ಆರಂಭದಲ್ಲಿ ಇಬ್ಬರು ಆಟಗಾರ್ತಿಯರ ನಡುವೆ ತೀವ್ರ ಹೋರಾಟ ಇತ್ತು. ಆದರೆ ಸೈನಾ ಆಕ್ರಮಣಕಾರಿ ಮತ್ತು ಚಾಣಾಕ್ಷತನದಿಂದ ಸೆಟ್‌ ವಶಪಡಿಸಿಕೊಂಡರು. ಎರಡನೇ ಸೆಟ್‌ ಅನ್ನು ಭಾರತೀಯ ಆಟಗಾರ್ತಿ ಸುಲಭವಾಗಿ ವಶಪಡಿಸಿಕೊಂಡು ಕ್ವಾರ್ಟರ್‌ಗೆ ಲಗ್ಗೆ ಹಾಕಿದರು. ಕಳೆದ ವರ್ಷದಲ್ಲಿ ಗಾಯದ ಕಾರಣ ಸೈನಾ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಿರಲಿಲ್ಲ. ಆದರೆ ಈ ವರ್ಷದ ಆರಂಭದ ಟೂರ್ನಿ ಇದಾಗಿದ್ದು, ಅತ್ಯುತ್ತಮ ಪ್ರದರ್ಶನ ನೀಡುವ ಮೂಲಕ ಪ್ರಶಸ್ತಿ ಗೆಲ್ಲುವ ಭರವಸೆ ಮೂಡಿಸಿದ್ದಾರೆ.

ಜಯರಾಮ್‌ಗೆ ಜಯ: ಪುರುಷರ ಸಿಂಗಲ್ಸ್‌ನಲ್ಲಿ ಭಾರತೀಯ ಆಟಗಾರ ಮತ್ತು ಕೂಟದ 6ನೇ ಶ್ರೇಯಾಂಕಿತ ಅಜಯ್‌ ಜಯರಾಮ್‌ 21-12, 15-21, 21-15 ರಿಂದ ಚೀನೀ ತೈಪೈ ಆಟಗಾರ ಹುÕಯೆ ಯೀ ವಿರುದ್ಧ ಜಯಸಾಧಿಸಿದರು. ಮೊದಲ ಸೆಟ್‌ ಗೆದ್ದ ಭಾರತೀಯ ಆಟಗಾರನಿಗೆ ಚೀನಿ ಆಟಗಾರ ಎರಡನೇ ಸೆಟ್‌ನಲ್ಲಿ ತಿರುಗೇಟು ನೀಡಿದ್ದರು. ಹೀಗಾಗಿ ಪಂದ್ಯ ಮೂರನೇ ಸೆಟ್‌ಗೆ ಹೋಗಿತು. ಈ ಸೆಟ್‌ ಅನ್ನು ಜಯರಾಮ್‌ ವಶಪಡಿಸಿಕೊಂಡು ಕ್ವಾರ್ಟರ್‌ಗೆ ಲಗ್ಗೆ ಹಾಕಿದರು.

ಉಳಿದಂತೆ ಮಹಿಳೆಯರ ಡಬಲ್ಸ್‌ನಲ್ಲಿ ಅರ್ಪಣಾ ಬಾಲನ್‌ ಮತ್ತು ಪ್ರಜಕ್ತಾ ಸಾವಂತ್‌ ಸೋಲುಂಡಿದ್ದಾರೆ. ಪುರುಷರ ಡಬಲ್ಸ್‌ನಲ್ಲಿ ಮನು ಅತ್ರಿ ಮತ್ತು ಬಿ.ಸುಮೀತ್‌ ರೆಡ್ಡಿ ಸೋತಿದ್ದಾರೆ. ಅದೇ ರೀತಿ ಮಿಶ್ರ ಡಬಲ್ಸ್‌ನಲ್ಲಿ ಜ್ವಾಲಾ ಗುಟ್ಟಾ ಮತ್ತು ಮನು ಅತ್ರಿ ಸೋಲುಂಡಿದ್ದಾರೆ.