ಭಾರತದ ಯುವ ಗ್ರ್ಯಾನ್ಮಾಸ್ಟರ್ ಆರ್. ಪ್ರಗ್ನಾನಂದ ನಾರ್ವೆ ಚೆಸ್ ಚಾಂಪಿಯನ್
Team Udayavani, Jun 11, 2022, 11:28 PM IST
ಹೊಸದಿಲ್ಲಿ: ಭಾರತದ ಯುವ ಗ್ರ್ಯಾನ್ಮಾಸ್ಟರ್ ಆರ್. ಪ್ರಗ್ನಾನಂದ “ನಾರ್ವೆ ಚೆಸ್ ಗ್ರೂಪ್ ಎ ಓಪನ್’ ಪಂದ್ಯಾವಳಿಯಲ್ಲಿ ಚಾಂಪಿಯನ್ ಆಗಿ ಮೂಡಿಬಂದಿದ್ದಾರೆ. ಕೂಟದಲ್ಲಿ ಅಜೇಯರಾಗಿ ಉಳಿದ ಅವರು ಸರ್ವಾಧಿಕ 7.5 ಅಂಕಗಳೊಂದಿಗೆ ಅಗ್ರಸ್ಥಾನಿಯಾದರು.
16 ವರ್ಷದ ಆರ್. ಪ್ರಗ್ನಾನಂದ ಅವರಿಗೆ ಈ ಕೂಟದಲ್ಲಿ ಅಗ್ರ ಶ್ರೇಯಾಂಕ ಲಭಿಸಿತ್ತು. ಇದಕ್ಕೆ ತಕ್ಕ ಪ್ರದರ್ಶನ ನೀಡಿ 9 ಸುತ್ತುಗಳಲ್ಲೂ ಅಜೇಯರಾಗಿ ಉಳಿದರು. ಶುಕ್ರವಾರದ ಕೊನೆಯ ಮುಖಾಮುಖಿಯಲ್ಲಿ ಭಾರತದ ವಿ. ಪ್ರಣೀತ್ ವಿರುದ್ಧ ಜಯ ಸಾಧಿಸಿದ್ದರು. ಪ್ರಣೀತ್ ತೃತೀಯ ಸ್ಥಾನಿಯಾದರು.
ಈ ಕೂಟದಲ್ಲಿ ಪ್ರಗ್ನಾನಂದ ಒಟ್ಟು 6 ಗೆಲುವು ಸಾಧಿಸಿದರು. ಇವರಿಗೆ ಶರಣಾದವರೆಂದರೆ ಮಥಾಯಿಸ್ ಆ್ಯನೆಲ್ಯಾಂಡ್ (1ನೇ ಸುತ್ತು), ಸೆಮೆನ್ ಮುಟುಸೋವ್ (2ನೇ ಸುತ್ತು), ಸುಯರೋವ್ (4ನೇ ಸುತ್ತು), ವಿಟಾಲಿ ಕುನಿನ್ (6ನೇ ಸುತ್ತು) ಮತ್ತು ವಿಕ್ಟರ್ ಮಿಖಾಲೇವ್ಸ್ಕಿ (8ನೇ ಸುತ್ತು). ನಾರ್ವೆ ಚೆಸ್ ಪ್ರಶಸ್ತಿ ವಿಜೇತ ಪ್ರಗ್ನಾನಂದ ಅವರನ್ನು ಕೋಚ್ ಆರ್.ಬಿ. ರಮೇಶ್ ಅಭಿನಂದಿಸಿದ್ದಾರೆ.