ಪಾಕ್ ಕೈದಿಗಳಿಗೆ ಕ್ರಿಕೆಟ್ ವೀಕ್ಷಣೆಯ ಭಾಗ್ಯ!
Team Udayavani, Sep 13, 2017, 7:20 AM IST
ಲಾಹೊರ್: ಪಾಕಿಸ್ಥಾನದಲ್ಲಿ ಮತ್ತೆ ಅಂತರಾಷ್ಟ್ರೀಯ ಕ್ರಿಕೆಟ್ ಸರಣಿಗೆ ವೇದಿಕೆಯೊಂದು ಸಜ್ಜುಗೊಂಡಿರುವ ಹಿನ್ನೆಲೆಯಲ್ಲಿ ಇಲ್ಲಿನ ಕೈದಿಗಳಿಗೂ ಕ್ರಿಕೆಟ್ ವೀಕ್ಷಣೆಯ ಅವಕಾಶವೊಂದು ಒದಗಿಬಂದಿದೆ. ಮಂಗಳವಾರ ಮೊದಲ್ಗೊಂಡ ಪಾಕಿಸ್ಥಾನ-ವಿಶ್ವ ಇಲೆವೆನ್ ನಡುವಿನ ಟಿ-20 ಸರಣಿಯನ್ನು ವೀಕ್ಷಿಸಲು ಪಂಜಾಬ್ ಪ್ರಾಂತ್ಯದ ಎಲ್ಲ ಜೈಲುಗಳಲ್ಲೂ ವ್ಯವಸ್ಥೆ ಮಾಡಲಾಗಿದೆ.
ಪಾಕಿಸ್ಥಾನದ ಪಾಲಿಗೆ ಇದೊಂದು ಚಾರಿತ್ರಿಕ ಕ್ರಿಕೆಟ್ ಸರಣಿಯಾಗಿದ್ದು, ಪಂಜಾಬ್ ಪ್ರಾಂತ್ಯದ ಎಲ್ಲ ಸೆರೆಮನೆಗಳಲ್ಲೂ ಟೆಲಿವಿಷನ್ ಅಳವಡಿಸಿ ಈ ಸರಣಿಯನ್ನು ವೀಕ್ಷಿಸಲು ಕೈದಿಗಳಿಗೆ ಅವಕಾಶ ಮಾಡಿಕೊಡುವಂತೆ ಪಂಜಾಬ್ ಪ್ರಿಸನ್ಸ್ನ ಇನ್ಸ್ಪೆಕ್ಟರ್ ಜನರಲ್ (ಐಜಿ) ಮಿಯಾನ್ ಫಾರುಖ್ ನಜೀರ್ ಆದೇಶಿಸಿದ್ದರು. ಇದನ್ನೀಗ ಸಾಕಾರಗೊಳಿಸಲಾಗಿದೆ.