ಡೆಲ್ಲಿ, ತಮಿಳ್‌ಗೆ ರೋಚಕ ಜಯ

Team Udayavani, Nov 21, 2018, 6:00 AM IST

ಅಹ್ಮದಾಬಾದ್‌: ಆರನೇ ಆವೃತ್ತಿ ಪ್ರೊ ಕಬಡ್ಡಿಯ ಅಹ್ಮದಾಬಾದ್‌ ಚರಣದಲ್ಲಿ ತೆಲುಗು ಟೈಟಾನ್ಸ್‌ ತಂಡ 23-27 ಅಂಕಗಳಿಂದ ತಮಿಳ್‌ ತಲೈವಾಸ್‌ ವಿರುದ್ಧ ಸೋಲನುಭವಿಸಿದೆ. ಈ ಗೆಲುವಿನೊಂದಿಗೆ ತಮಿಳ್‌ ತಲೈವಾಸ್‌ ತುಸು ಚೇತರಿಕೆ ಕಂಡಿದೆ. ದಿನದ ಎರಡನೇ ಪಂದ್ಯದಲ್ಲಿ ಆಲ್‌ರೌಂಡ್‌ ಆಟ ಪ್ರದರ್ಶಿಸಿದ ದಬಾಂಗ್‌ ಡೆಲ್ಲಿ ತಂಡವು ಗುಜರಾತ್‌ ಸೂಪರ್‌ಜೈಂಟ್‌ ತಂಡವನ್ನು 29-26 ಅಂಕಗಳಿಂದ ಸೋಲಿಸಿದೆ. ಇದು ಗುಜರಾತ್‌ಗೆ ಈ ಆವೃತ್ತಿಯಲ್ಲಿನ ಎರಡನೇ ಸೋಲು ಆಗಿದೆ. ಗುಜರಾತ್‌ ಇಷ್ಟರವರೆಗೆ 12 ಪಂದ್ಯ ಆಡಿದ್ದು ಎಂಟರಲ್ಲಿ ಗೆದ್ದಿದೆ. ಇದೇ ವೇಳೆ ಡೆಲ್ಲಿ ಇಷ್ಟರವರೆಗೆ 11 ಪಂದ್ಯ ಆಡಿದ್ದು ಐದನೇ ಜಯ ದಾಖಲಿಸಿದೆ. ಮಿರಾಜ್‌ ಶೇಖ್‌ ಭರ್ಜರಿ ರೈಡಿಂಗ್‌ ನಡೆಸಿ 7 ಅಂಕ ಪಡೆದರೆ ಕೊನೆ ಕ್ಷಣದಲ್ಲಿ ಸೂಪರ್‌ ಟ್ಯಾಕಲ್‌ ನಡೆಸಿ ಮೂರಂಕ ಪಡೆದ ಡೆಲ್ಲಿ ಜಯಭೇರಿ ಬಾರಿಸಿತು. 

“ಬಿ’ ವಲಯದಲ್ಲಿ ಕೊನೆಯ ಸ್ಥಾನದಲ್ಲಿರುವ ಅದು ಪರಸ್ಥಿತಿ ಸುಧಾರಿಸಿಕೊಳ್ಳಲು ಮುಂದಿನ ಪಂದ್ಯಗಳಲ್ಲಿ ಸತತವಾಗಿ ಗೆಲ್ಲಲೇಬೇಕಿದೆ. ತಮಿಳ್‌ ಪರ ಅಜಯ್‌ ಠಾಕೂರ್‌ ದಾಳಿಯಲ್ಲಿ ಮಿಂಚಿ 8 ಅಂಕ ಗಳಿಸಿದರು. ರಕ್ಷಣೆಯಲ್ಲಿ ಅನುಭವಿ ಆಟಗಾರ ಮಂಜೀತ್‌ ಚಿಲ್ಲರ್‌ ಮಿಂಚಿ 3 ಅಂಕ ಗಳಿಸಿದರು. ತೆಲುಗು ಟೈಟಾನ್ಸ್‌ ಪರ ನಾಯಕ ರಾಹುಲ್‌ ಚೌಧರಿ ಪರವಾಗಿಲ್ಲ ಎನ್ನುವಂತಹ ಆಟವಾಡಿ 8 ಅಂಕ ಗಳಿಸಿದರು. ಆದರೆ ಇದಕ್ಕಾಗಿ ಅವರು 20 ಬಾರಿ ದಾಳಿ ಮಾಡಿದರು.

ಇಂದಿನ ಪಂದ್ಯಗಳು
ಪಾಟ್ನಾ ಪೈರೇಟ್ಸ್‌- ತಮಿಳ್‌ ತಲೈವಾಸ್‌
 ಸ್ಥಳ: ಅಹ್ಮದಾಬಾದ್‌ ಆರಂಭ: ರಾತ್ರಿ 8.00

ಗುಜರಾತ್‌ – ಯು ಮುಂಬಾ
  ಸ್ಥಳ: ಅಹ್ಮದಾಬಾದ್‌  ಆರಂಭ: ರಾತ್ರಿ 9.00