IPL ವೇಳೆಯಲ್ಲೇ ಪಿಎಸ್‌ಎಲ್‌ ಆಯೋಜನೆ?

Team Udayavani, Aug 6, 2024, 8:00 AM IST

ಕರಾಚಿ: ಐಪಿಎಲ್‌ ಮತ್ತು ಪಾಕಿಸ್ಥಾನ್‌ ಸೂಪರ್‌ ಲೀಗ್‌ (PSL) ಪಂದ್ಯಾವಳಿಗಳು ಒಂದೇ ಸಮಯದಲ್ಲಿ ನಡೆಯುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ. ಮುಂದಿನ ವರ್ಷದ ಪಿಎಸ್‌ಎಲ್‌ ಕೂಟವನ್ನು ಎ. 10ರಿಂದ ಮೇ 25ರ ವೇಳೆ ನಡೆಸಲು ಪಿಸಿಬಿ ನಿರ್ಧರಿಸಿದೆ. ಮಾರ್ಚ್‌-ಮೇ ಅವಧಿಯಲ್ಲೇ ಐಪಿಎಲ್‌ ಕೂಡ ಆರಂಭವಾಗಲಿರುವುದರಿಂದ ಎರಡೂ ಟೂರ್ನಿಗಳು ಮುಖಾಮುಖೀಯಾಗುವ ಸಾಧ್ಯತೆಯಿದೆ.

ಸಾಮಾನ್ಯವಾಗಿ ಪಿಎಸ್‌ಎಲ್‌ ಟೂರ್ನಿ ಫೆಬ್ರವರಿ, ಮಾರ್ಚ್‌ ತಿಂಗಳಲ್ಲಿ ನಡೆಯುತ್ತದೆ. ಆದರೆ ಈ ಬಾರಿ ಪಾಕಿಸ್ಥಾನದಲ್ಲಿ ಒಂದು ತ್ರಿಕೋನ ಸರಣಿಯನ್ನು ನಡೆಸಲು ಪಿಸಿಬಿ ಯೋಚಿಸಿದೆ. ಇದರ ಜತೆಗೆ ಬಹು ನಿರೀಕ್ಷಿತ ಚಾಂಪಿಯನ್ಸ್‌ ಟ್ರೋಫಿ, ವೆಸ್ಟ್‌ ಇಂಡೀಸ್‌ ಸರಣಿಯೂ ನಡೆಯಲಿರುವುದರಿಂದ ಈ ಬಾರಿ ಪಿಎಸ್‌ಎಲ್‌ ವೇಳಾಪಟ್ಟಿಯಲ್ಲಿ ಕೊಂಚ ಬದಲಾವಣೆ ಮಾಡಿಕೊಳ್ಳಲು ಪಿಸಿಬಿ ಯೋಚಿಸಿದೆ. ಕಳೆದ ವರ್ಷ ಫೆ. 17ರಿಂದ ಮಾ. 18ರ ವರೆಗೆ ಪಿಎಸ್‌ಎಲ್‌ ನಡೆದರೆ, ಐಪಿಎಲ್‌ ಮಾರ್ಚ್‌ 22ರಿಂದ ಮೇ 26ರ ವರೆಗೆ ನಡೆದಿತ್ತು.

ಒಂದೇ ಸಮಯ ಎರಡೂ ಟೂರ್ನಿಗಳನ್ನು ನಡೆದರೆ, ಹೆಚ್ಚಿನ ಆಟಗಾರರು ಐಪಿಎಲ್‌ಗೆ ಆದ್ಯತೆ ಕೊಡುವ ಸಾಧ್ಯತೆಯಿರುವುದರಿಂದ ಪಿಸಿಬಿಗೆ ನಷ್ಟವಾಗಬಹುದು ಎಂಬುದೊಂದು ಲೆಕ್ಕಾಚಾರ.