ಆಂಧ್ರ ಸರ್ಕಾರದ ಡಿಸಿ ಹುದ್ದೆಗೆ ಸಿಂಧು ಒಪ್ಪಿಗೆ

Team Udayavani, Feb 25, 2017, 10:20 AM IST

ಹೈದ್ರಾಬಾದ್‌: ರಿಯೋ ಒಲಿಂಪಿಕ್ಸ್‌ ಬೆಳ್ಳಿ ಪದಕ ವಿಜೇತ ಬ್ಯಾಡ್ಮಿಂಟನ್‌ ಆಟಗಾರ್ತಿ ಪಿ.ವಿ.ಸಿಂಧು ಆಂಧ್ರ ಸರ್ಕಾರ ನೀಡಿರುವ ಡೆಪ್ಯುಟಿ ಕಲೆಕ್ಟರ್‌ ಹುದ್ದೆಗೆ ಒಪ್ಪಿಗೆ ನೀಡಿದ್ದಾರೆ ಎನ್ನಲಾಗಿದೆ. ಈ ಬಗ್ಗೆ ಸಿಂಧು ತಾಯಿ ಖಚಿತಪಡಿಸಿರುವುದಾಗಿ ಮಾಧ್ಯಮಗಳು ವರದಿ ಮಾಡಿವೆ. 

ರಿಯೋ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಗೆದ್ದಾಗ ಸಿಂಧುಗೆ ಗ್ರೂಪ್‌-1 ಆಫೀಸರ್‌ ಉದ್ಯೋಗ ನೀಡುವುದಾಗಿ ಚಂದ್ರಬಾಬು ನಾಯ್ಡು ನೇತೃತ್ವದ ಆಂಧ್ರ ಸರ್ಕಾರ ಭರವಸೆ ನೀಡಿತ್ತು. ಹಾಗೇ 3 ಕೋಟಿ ರೂ. ನಗದು ವಿತರಿಸಿತ್ತು. ಅದೇ ರೀತಿ ತೆಲಂಗಾಣ ಸರ್ಕಾರ ಕೂಡ 5 ಕೋಟಿ ರೂ. ವಿತರಿಸಿತ್ತು. ಸಿಂಧು ಸದ್ಯ ಭಾರತ್‌ ಪೆಟ್ರೋಲಿಯಂನಲ್ಲಿ ಉಪ ವ್ಯವಸ್ಥಾಪಕ ಹುದ್ದೆಯನ್ನು ನಿರ್ವಹಿಸುತ್ತಿದ್ದಾರೆ. ಭರ್ಜರಿ ಫಾರ್ಮ್ನಲ್ಲಿರುವ ಸಿಂಧು ಪ್ರಸಕ್ತ ಋತುವಿನಲ್ಲಿ ಉತ್ತಮ ಪ್ರದರ್ಶನ ಮುಂದುವರಿಸಿದ್ದಾರೆ. ಬಹುಶಃ ಮುಂದಿನ ಐದಾರು ವರ್ಷಗಳಲ್ಲಿ ಸಿಂಧುಗೆ ಐಎಎಸ್‌ ದರ್ಜೆ ಸಿಗುವ ಸಾಧ್ಯತೆಯಿದೆ.