ಪೂವಮ್ಮ ಪ್ರಕರಣ; ನಾಡಾ ಮೇಲ್ಮನವಿಗೆ ಜಯ

Team Udayavani, Sep 20, 2022, 9:01 PM IST

ಹೊಸದಿಲ್ಲಿ: ಕರ್ನಾಟಕದ ಆ್ಯತ್ಲೀಟ್‌, ಏಷ್ಯಾಡ್‌ ರಿಲೇಯಲ್ಲಿ ಬಂಗಾರ ವಿಜೇತ ತಂಡದ ಸದಸ್ಯೆ ಎಂ.ಆರ್‌. ಪೂವಮ್ಮ ಉದ್ದೀಪನ ಮದ್ದು ಸೇವಿಸಿ ಎರಡು ವರ್ಷಗಳ ನಿಷೇಧಕ್ಕೊಳಗಾಗಿದ್ದಾರೆ. ಈ ಪ್ರಕರಣದಲ್ಲಿ ನಾಡಾ ಸಲ್ಲಿಸಿದ ಮೇಲ್ಮನವಿಗೆ ಗೆಲುವಾಗಿದೆ.

ಫೆ. 18ರಂದು ಪಾಟಿಯಾಲದಲ್ಲಿ ನಡೆದ ಇಂಡಿಯನ್‌ ಗ್ರ್ಯಾನ್‌ಪ್ರಿಕ್ಸ್‌ ವೇಳೆ ಪೂವಮ್ಮ ಅವರ ಸ್ಯಾಂಪಲ್‌ ಪಡೆಯಲಾಗಿತ್ತು. ಇದರಲ್ಲಿ “ವಾಡಾ’ ನಿಷೇಧಿಸಿದ ಔಷಧಿ ಪತ್ತೆಯಾಗಿತ್ತು. ಅದರಂತೆ ಜೂನ್‌ನಲ್ಲಿ ಅವರಿಗೆ 3 ತಿಂಗಳ ನಿಷೇಧ ಹೇರಲಾಯಿತು.

ಶಿಸ್ತು ಸಮಿತಿಯ ಈ ನಿರ್ಧಾರದ ವಿರುದ್ಧ “ನಾಡಾ’ ಮೇಲ್ಮನವಿ ಸಲ್ಲಿಸಿತ್ತು. ಇದನ್ನು ಎತ್ತಿಹಿಡಿಯಲಾಗಿದ್ದು, ಈ ನಿಷೇಧವನ್ನು ಎರಡು ವರ್ಷಗಳಿಗೆ ವಿಸ್ತರಿಸಲಾಗಿದೆ. ಇದರಿಂದ ಪೂವಮ್ಮ ಮುಂದಿನ ಏಷ್ಯಾಡ್‌ ಸೇರಿದಂತೆ ಪ್ರಮುಖ ಜಾಗತಿಕ ಕ್ರೀಡಾಕೂಟಗಳಿಂದ ಹೊರಗುಳಿಯಬೇಕಾಗುತ್ತದೆ.