7 ವಿಕೆಟ್‌ ಕಿತ್ತು ವಿಂಡೀಸಿಗೆ ಆಘಾತವಿಕ್ಕಿದ ರಶೀದ್‌

Team Udayavani, Jun 11, 2017, 3:45 AM IST

ಗ್ರಾಸ್‌ ಐಲೆಟ್‌ (ಸೇಂಟ್‌ ಲೂಸಿಯಾ): ಅಫ್ಘಾನಿಸ್ಥಾನದ 18ರ ಹರೆಯದ ಲೆಗ್‌ಸ್ಪಿನ್ನರ್‌ ರಶೀದ್‌ ಖಾನ್‌ ಘಾತಕ ಸ್ಪಿನ್‌ ದಾಳಿಯೊಂದನ್ನು ಸಂಘಟಿಸಿ ಮೊದಲ ಏಕದಿನ ಪಂದ್ಯದಲ್ಲಿ ಆತಿಥೇಯ ವೆಸ್ಟ್‌ ಇಂಡೀಸನ್ನು ಹೊಡೆದುರುಳಿಸಿದ್ದಾರೆ. ರಶೀದ್‌ ಸಾಧನೆ 18 ರನ್ನಿಗೆ 7 ವಿಕೆಟ್‌!

ಶುಕ್ರವಾರ ಇಲ್ಲಿನ “ಡ್ಯಾರನ್‌ ಸಮ್ಮಿ ಪಾರ್ಕ್‌’ನಲ್ಲಿ ಅಹರ್ನಿಶಿಯಾಗಿ ನಡೆದ ಸರಣಿಯ ಮೊದಲ ಪಂದ್ಯದಲ್ಲಿ ಬ್ಯಾಟಿಂಗ್‌ ಆಯ್ದುಕೊಂಡ ಅಫ್ಘಾನಿಸ್ಥಾನ ಗಳಿಸಿದ್ದು 6 ವಿಕೆಟಿಗೆ 212 ರನ್‌ ಮಾತ್ರ. ಇದನ್ನು ಬೆನ್ನಟ್ಟುವ ಹಾದಿಯಲ್ಲಿ ರಶೀದ್‌ ದಾಳಿಗೆ ಸಿಲುಕಿದ ವಿಂಡೀಸ್‌ 44.4 ಓವರ್‌ಗಳಲ್ಲಿ 149 ರನ್ನಿಗೆ ಕುಸಿಯಿತು.

ಐಪಿಎಲ್‌ನಲ್ಲಿ ಸನ್‌ರೈಸರ್ ಹೈದರಾಬಾದ್‌ ತಂಡದ ಪರ ಪರಿಣಾಮಕಾರಿ ದಾಳಿ ಸಂಘಟಿಸಿದ್ದ ರಶೀದ್‌ ಖಾನ್‌ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಹೊಸ ಎತ್ತರವನ್ನು ಏರಿದರು. ಏಕದಿನ ವಿಕೆಟ್‌ ಸಾಧಕರ ಯಾದಿಯಲ್ಲಿ ಅವರಿಗೀಗ 4ನೇ ಸ್ಥಾನ. 19ಕ್ಕೆ 8 ವಿಕೆಟ್‌ ಕಿತ್ತ ಚಾಮಿಂಡ ವಾಸ್‌ ಅಗ್ರಸ್ಥಾನದಲ್ಲಿದ್ದಾರೆ. ವಾಸ್‌ 8 ವಿಕೆಟ್‌ ಹಾರಿಸಿದ ವಿಶ್ವದ ಏಕೈಕ ಬೌಲರ್‌. ಶಾಹಿದ್‌ ಅಫ್ರಿದಿ (12ಕ್ಕೆ 7), ಗ್ಲೆನ್‌ ಮೆಕ್‌ಗ್ರಾಥ್‌ (15ಕ್ಕೆ 7) 2ನೇ ಹಾಗೂ 3ನೇ ಸ್ಥಾನದಲ್ಲಿದ್ದಾರೆ.
ರಶೀದ್‌ ಖಾನ್‌ 23ನೇ ಓವರಿನಲ್ಲಿ ದಾಳಿಗಿಳಿಯುವಾಗ ವೆಸ್ಟ್‌ ಇಂಡೀಸ್‌ 2 ವಿಕೆಟಿಗೆ 68 ರನ್‌ ಗಳಿಸಿತ್ತು. ಬಳಿಕ ಅಫ್ಘಾನ್‌ ಲೆಗ್ಗಿ ದಾಳಿಗೆ ದಿಕ್ಕಾಪಾಲಾಯಿತು. 3 ಪಂದ್ಯಗಳ ಸರಣಿಯ ದ್ವಿತೀಯ ಪಂದ್ಯ ರವಿವಾರ ಇದೇ ಅಂಗಳದಲ್ಲಿ ನಡೆಯಲಿದೆ.

ಸಂಕ್ಷಿಪ್ತ ಸ್ಕೋರ್‌: ಆಫ್ಘಾನಿಸ್ಥಾನ-6 ವಿಕೆಟಿಗೆ 212 (ಅಹ್ಮದಿ 81, ನೈಬ್‌ ಔಟಾಗದೆ 41, ನಬಿ ಔಟಾಗದೆ 27, ನರ್ಸ್‌ 34ಕ್ಕೆ 2). ವೆಸ್ಟ್‌ ಇಂಡೀಸ್‌-44.4 ಓವರ್‌ಗಳಲ್ಲಿ 149 (ಹೋಪ್‌ 35, ಜೋಸೆಫ್ 27, ಲೂಯಿಸ್‌ 21, ರಶೀದ್‌ 18ಕ್ಕೆ 7, ದೌಲತ್‌ ಜದ್ರಾನ್‌ 25ಕ್ಕೆ 2). ಪಂದ್ಯಶ್ರೇಷ್ಠ: ರಶೀದ್‌ ಖಾನ್‌.