ಧೋನಿ ಸ್ಥಾನಕ್ಕೆ ಕಣ್ಣಿಟ್ಟಿದ್ದಾರ ರಿಷಬ್ ಪಂತ್ ?

Team Udayavani, Oct 21, 2018, 12:34 PM IST

ಗುವಾಹಟಿ: ಭಾರತ ಕ್ರಿಕೆಟ್ ತಂಡದಲ್ಲಿ ಹೊಸ ಹುಡುಗರು ಅಬ್ಬರಿಸುತ್ತಿದ್ದಾರೆ. ಭಾರತ ಎ, ತಂಡ ಅಂಡರ್  19 ಕ್ರಿಕೆಟ್ ನಲ್ಲಿ ಉತ್ತಮ ಪ್ರದರ್ಶನ ನೀಡಿದವರು ಟೀಂ ಇಂಡಿಯಾ ಕ್ಯಾಪ್ ನಲ್ಲಿ ಆಡಲು ಕಾತರಿಸುತ್ತಿದ್ದಾರೆ. ಸದ್ಯ ಟೀಂ ಇಂಡಿಯಾ ಏಕದಿನ ಜೆರ್ಸಿ ತೊಡಲು ಸಿದ್ದವಾಗಿರುವುದು ರಿಷಭ್ ಪಂತ್. 

ಕಳೆದ ಎರಡು ಸರಣಿಗಳಲ್ಲಿ ಭಾರತ ಟೆಸ್ಟ್ ತಂಡದಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ವಿಕೆಟ್ ಕೀಪರ್ ಬ್ಯಾಟ್ಸ್ ಮನ್ ರಿಷಭ್ ಪಂತ್ ಭಾರತ ಏಕದಿನ ತಂಡದ ಬಾಗಿಲು ಬಡಿಯುವಲ್ಲಿ ಸಫಲರಾಗಿದ್ದಾರೆ. ವೆಸ್ಟ್ ಇಂಡೀಸ್ ವಿರುದ್ದದ ಏಕದಿನ ಸರಣಿಗೆ ಆಯ್ಕೆಯಾಗಿರುವ ಪಂತ್ ಗುವಾಹಟಿ ಪಂದ್ಯದಿಂದಲೇ ಆಡುವ ಬಳಗದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. 

ಈಗಾಗಲೇ ಟೆಸ್ಟ್ ತಂಡದಲ್ಲಿ ತನ್ನ ಹೊಡಿಬಡಿ ಆಟದಿಂದಲೇ ಏಕದಿನ ಕ್ರಿಕೆಟ್ ಗೆ ಆಯ್ಕೆ ಬಯಸಿದ್ದ ಈ ಎಡಗೈ ಆಟಗಾರ ಪ್ರಸ್ತುತ ಸರಣಿಯಲ್ಲಿ ಕೇವಲ ಬ್ಯಾಟ್ಸ್ ಮನ್ ಆಗಿ ಕಣಕ್ಕಿಳಿಯಲಿದ್ದಾರೆ. ವಿಕೆಟ್ ಕೀಪರ್ ಆಗಿ ಮಹೇಂದ್ರ ಸಿಂಗ್ ಧೋನಿ ತಂಡದಲ್ಲಿರುವುದರಿಂದ ಪಂತ್ 5ನೇ ಕ್ರಮಾಂಕದಲ್ಲಿ ಆಡಲಿದ್ದಾರೆ. 

ಮಹೆಂದ್ರ ಸಿಂಗ್ ಧೋನಿ ಕಳಪೆ ಫಾರ್ಮ್ ನಲ್ಲಿರುವುದು ಟೀಂ ಮ್ಯಾನೇಜ್ ಮೆಂಟ್ ಗೆ ತಲೆ ನೋವಾಗಿದೆ. ಮುಖ್ಯ ಆಯ್ಕೆಗಾರ ಎಂ.ಎಸ್.ಕೆ.ಪ್ರಸಾದ್, 2019ರ ವಿಶ್ವಕಪ್ ವರೆಗೆ ಧೋನಿಯೇ ಮೊದಲ ಆಯ್ಕೆಯ ವಿಕೆಟ್ ಕೀಪರ್ ಎಂದು ಹೇಳಿರುವುದರಿಂದ ಅಲ್ಲಿಯವರೆಗೆ ನಿಯಮತ ಕ್ರಿಕೆಟ್ ನಲ್ಲಿ ಪಂತ್ ಕೀಪಿಂಗ್ ಗ್ಲೌಸ್ ತೊಡುವುದು ಕಷ್ಟ. ಆದರೆ ವಿಶ್ವಕಪ್ ನಂತರ ಧೋನಿ ಕ್ರಿಕೆಟ್ ಬದುಕಿಗೆ ವಿದಾಯ ಹೇಳುವುದು ಬಹುತೇಕ ಖಚಿತವಾಗಿರುವುದರಿಂದ ಅಲ್ಲಿಯವರೆಗೆ ಪಂತ್ ರನ್ನು ತಂಡದಲ್ಲಿ ಆಡಿಸಿ ಗಟ್ಟಿಗೊಳಿಸುವುದು ಬಿಸಿಸಿಐನ ಲೆಕ್ಕಾಚಾರ. 

ಈಗಾಗಲೇ ಭಾರತ ಪರ 4 ಟಿ-20 ಕ್ರಿಕೆಟ್ ಪಂದ್ಯ ಆಡಿರುವ ಡೆಲ್ಲಿ ಮೂಲದ ಆಟಗಾರ ಹೇಳಿಕೊಳ್ಳುವ ಸಾಧನೆ ಮಾಡಿಲ್ಲ. 4 ಪಂದ್ಯಗಳಿಂದ ಗಳಿಸಿದ್ದು ಮಾತ್ರ 73 ರನ್. ಏಕದಿನ ತಂಡದ ಮಧ್ಯಮ ಕ್ರಮಾಂಕದಲ್ಲಿ ಈಗಾಗಲೇ ಭಾರಿ ಪೈಪೋಟಿ ಇರುವುದರಿಂದ ಮೊದಲ ಪಂದ್ಯದಿಂದಲೇ ಉತ್ತಮ ಪ್ರದರ್ಶನ ನೀಡುವ ಅನಿವಾರ್ಯತೆ ಇದೆ.