ಆಸ್ಟ್ರೇಲಿಯನ್‌ ಓಪನ್‌: ಸೆರೇನಾ ವಿಲಿಯಮ್ಸ್‌ಗೆ ಅಚ್ಚರಿಯ ಸೋಲು

Team Udayavani, Jan 23, 2019, 5:57 AM IST

ಸಿಡ್ನಿ : ಇಲ್ಲೀಗ ನಡೆಯುತ್ತಿರುವ ಆಸ್ಟ್ರೇಲಿಯನ್‌ ಓಪನ್‌ ನಲ್ಲಿ  ಅಮೆರಿಕನ್‌ ಟೆನಿಸ್‌ ತಾರೆ ಸೆರೇನಾ ವಿಲಿಯಮ್ಸ್‌ ಅವರನ್ನು ಕೆರೋಲಿನಾ ಪ್ಲಿಸ್ಕೋವಾ ಅವರು ಇಂದು ಬುಧವಾರ ಅತ್ಯಂತ ಅಚ್ಚರಿಯ ಮರು ಹೋರಾಟದಲ್ಲಿ 6-4, 4-6, 7-5 ಸೆಟ್ಟುಗಳ ಅಂತರದಲ್ಲಿ ಸೋಲಿಸಿದ್ದಾರೆ. 

24ನೇ ಗ್ರ್ಯಾನ್‌ ಸ್ಲಾಮ್‌ ಪ್ರಶಸ್ತಿಯನ್ನು ಗೆದ್ದು ಹೊಸ ಇತಿಹಾಸ ಬರೆಯಬೇಕೆಂಬ ತವಕದಲ್ಲಿ ಸೆರೇನಾ ಎಡವಿರುವುದು ಅಭಿಮಾನಿಗಳಿಗೆ ನಿರಾಶೆ ಉಂಟುಮಾಡಿದೆ. 

ಒಂದು ದೃಷ್ಟಿಯಲ್ಲಿ ಸೆರೇನಾ ವಿಲಿಯಮ್ಸ್‌ ಅವರು ತಮ್ಮ ಈ ಅಚ್ಚರಿಯ ಮತ್ತು ನಿರಾಶೆಯ ಸೋಲಿಗೆ ತಾವೇ ಮುನ್ನುಡಿ ಬರೆದುಕೊಂಡಿದ್ದರು.

ತಮ್ಮ ಪಾಲಿಗೆ ಒದಗಿದ್ದ ನಾಲ್ಕು ಮ್ಯಾಚ್‌ ಪಾಯಿಂಟ್‌ಗಳನ್ನು ವ್ಯರ್ಥ ಮಾಡಿಕೊಂಡದ ಸೆರೇನಾ, ನಿರ್ಣಾಯಕ ಸೆಟ್‌ನಲ್ಲಿ 5-1ರ ಲೀಡ್‌ ಹೊಂದಿದ್ದ ಹೊರತಾಗಿಯೂ ಸೋಲನುಭವಿಸಬೇಕಾಯಿತು. ಇದಕ್ಕೆ ಮುಖ್ಯ ಕಾರಣ ಕೆರೋಲಿನಾ ಅವರು ನಿರ್ಣಾಯಕ ಮರು ಹೋರಾಟವನ್ನು ಸಾದರಪಡಿಸಿ ಪಂದ್ಯವನ್ನು ತಮ್ಮೆಡೆಗೆ ತಿರುಗಿಸಿಕೊಳ್ಳುವಲ್ಲಿ ಯಶಸ್ವಿಯಾದದ್ದು. 

ಕೆರೋಲಿನಾ ಪ್ಲಿಸ್ಕೋವಾ ಅವರು ಈಗಿನ್ನು ನವೋಮಿ ಒಸಾಕಾ ಅವರನ್ನು ಸೆಮಿ ಫೈನಲ್‌ನಲ್ಲಿ ಎದುರಿಸುವರು.