ಶೂಟಿಂಗ್‌ನಲ್ಲಿ ಒಲಿಯಿತು ಮೊದಲ ಪದಕ

Team Udayavani, Aug 20, 2018, 6:00 AM IST

ಪಾಲೆಂಬಾಂಗ್‌: ನಿರೀಕ್ಷೆಯಂತೆ ಶೂಟರ್‌ಗಳು 18ನೇ ಏಶ್ಯನ್‌ ಗೇಮ್ಸ್‌ನಲ್ಲಿ ಭಾರತದ ಪದಕ ಖಾತೆ ತೆರೆದಿದ್ದಾರೆ. ರವಿವಾರ ಮೊದಲ್ಗೊಂಡ ಶೂಟಿಂಗ್‌ ಸ್ಪರ್ಧೆಯ 10 ಮೀ. ಏರ್‌ ರೈಫ‌ಲ್‌ ಮಿಕ್ಸೆಡ್‌ ಟೀಮ್‌ ವಿಭಾಗದ ಸ್ಪರ್ಧೆಯಲ್ಲಿ ಅಪೂರ್ವಿ ಚಾಂಡೇಲ-ರವಿ ಕುಮಾರ್‌ ಕಂಚಿನ ಪದಕ ಗೆದ್ದರು. ಆದರೆ 10 ಮೀ. ಏರ್‌ ಪಿಸ್ತೂಲ್‌ ಮಿಕ್ಸೆಡ್‌ ಟೀಮ್‌ ಸ್ಪರ್ಧೆಯಲ್ಲಿ ಮನು ಭಾಕರ್‌-ಅಭಿಷೇಕ್‌ ವರ್ಮ ಫೈನಲ್‌ ತಲುಪದೆ ನಿರಾಸೆ ಮೂಡಿಸಿದರು.

48 ಶಾಟ್‌ಗಳ ಫೈನಲ್‌ನಲ್ಲಿ ಅಪೂರ್ವಿ ಚಾಂಡೇಲ-ರವಿ ಕುಮಾರ್‌ 429.9 ಅಂಕ ಸಂಪಾದಿಸಿ ತೃತೀಯ ಸ್ಥಾನಿಯಾದರು. ಚೈನೀಸ್‌ ತೈಪೆಯ ಯಿಂಹ್‌ಶಿನ್‌ ಲಿನ್‌-ಶೊಚುವಾನ್‌ ಲು ಚಿನ್ನ ಗೆದ್ದರೆ (494.1 ಅಂಕ), ಚೀನದ ರೌಝು ಜಾವೊ-ಹೊರಾನ್‌ ಯಾಂಗ್‌ ರಜತವನ್ನು ತಮ್ಮದಾಗಿಸಿಕೊಂಡರು (492.5 ಅಂಕ).

ಕೊರಿಯ ಮತ್ತು ಮಂಗೋಲಿಯಾ ಕ್ರಮವಾಗಿ 4ನೇ ಹಾಗೂ 5ನೇ ಸ್ಥಾನ ಪಡೆದವು. ಏಶ್ಯಾಡ್‌ನ‌ಲ್ಲಿ ಏರ್‌ ರೈಫ‌ಲ್‌ ಮಿಕ್ಸೆಡ್‌ ಟೀಮ್‌ ಸ್ಪರ್ಧೆಯನ್ನು ಇದೇ ಮೊದಲ ಅಳವಡಿಸಲಾಗಿತ್ತು.ಮೊದಲ ಸರಣಿಯಲ್ಲಿ 102.9 ಅಂಕ ಗಳಿಸಿದ್ದ ಭಾರತ ದ್ವಿತೀಯ ಸ್ಥಾನದಲ್ಲಿತ್ತು. 3ನೇ ಸುತ್ತಿನ ತನಕವೂ ಭಾರತ ಈ ಸ್ಥಾನವನ್ನು ಕಾಯ್ದುಕೊಂಡಿತ್ತು. ಬಳಿಕ ಚೀನ ಮುನ್ನುಗ್ಗಿತು. ಮಂಗೋಲಿಯಾ ಮೊದಲು ಹೊರಬಿತ್ತು. ಬಳಿಕ ಕೊರಿಯ ನಿರ್ಗಮಿಸಿತು.

ಅಪೂರ್ವಿಗೆ ಮೊದಲ ಏಶ್ಯಾಡ್‌ ಪದಕ
ಇದು ಅಪೂರ್ವಿ ಚಾಂಡೇಲ ಪಾಲಾದ ಮೊದಲ ಏಶ್ಯಾಡ್‌ ಪದಕ. 10 ಮೀ. ಏರ್‌ ರೈಫ‌ಲ್‌ ವೈಯಕ್ತಿಕ ಸ್ಪರ್ಧೆಯಲ್ಲೂ ಅವರು ಕಣಕ್ಕಿಳಿಯುವರು. ಇದೇ ವಿಭಾಗದ 2014ರ ಗ್ಲಾಸೊY ಕಾಮನ್ವೆಲ್ತ್‌ ಗೇಮ್ಸ್‌ ಸ್ಪರ್ಧೆಯಲ್ಲಿ ಅವರು ಬಂಗಾರದಿಂದ ಸಿಂಗಾರಗೊಂಡಿದ್ದರು.

ವಿಶ್ವಕಪ್‌ನಲ್ಲಿ ಕಂಚಿನ ಪದಕ ಜಯಿಸಿದ್ದ ರವಿ ಕುಮಾರ್‌ ಕಳೆದ ಏಶ್ಯಾಡ್‌ನ‌ಲ್ಲಿ 10 ಮೀ. ರೈಫ‌ಲ್‌ ತಂಡ ಸ್ಪರ್ಧೆಯಲ್ಲೂ ಕಂಚಿನ ಪದಕ ಗೆದ್ದಿದ್ದರು. ಒಲಿಂಪಿಕ್ಸ್‌ ಹೀರೋ ಅಭಿನವ್‌ ಬಿಂದ್ರಾ ಅವರು ರವಿ ಕುಮಾರ್‌ ಅವರ ಮೆಂಟರ್‌ ಆಗಿದ್ದಾರೆ.
“ಅಪೂರ್ವಿಯಿಂದಾಗಿ ಈ ಕಂಚು ನನಗೆ ಲಭಿಸಿತು. ಅರ್ಹತಾ ಸುತ್ತಿನಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ ಫೈನಲ್‌ ಸ್ಪರ್ಧೆ ನಿರಾಸೆ ತಂದಿದೆ. ನಮ್ಮಿಬ್ಬರಿಗೆ ಒಟ್ಟಾಗಿ ಅಭ್ಯಾಸ ನಡೆಸಲು ಹೆಚ್ಚಿನ ಅವಕಾಶ ಲಭಿಸಲಿಲ್ಲ’ ಎಂಬುದು ರವಿ ಕುಮಾರ್‌ ಪ್ರತಿಕ್ರಿಯೆ.

“ವಿಶ್ವಕಪ್‌ನಲ್ಲಿ ನಾವಿಬ್ಬರೂ 4ನೇ ಸ್ಥಾನ ಸಂಪಾದಿಸಿದ್ದೆವು. ಇದು ನನ್ನ ಮೊದಲ ಏಶ್ಯಾಡ್‌ ಪದಕ ಹಾಗೂ ಈ ಕೂಟದಲ್ಲಿ ದೇಶಕ್ಕೆ ಲಭಿಸಿದ ಮೊದಲ ಪದಕವೂ ಆಗಿದೆ. ಇದಕ್ಕಾಗಿ ಬಹಳ ಖುಷಿಯಾಗುತ್ತಿದೆ. ಇದು ನಾಳಿನ 10 ಮೀ. ರೈಫ‌ಲ್‌ ಸ್ಪರ್ಧೆಗೆ ಸ್ಫೂರ್ತಿ ತುಂಬಿದೆ’
– ಅಪೂರ್ವಿ ಚಾಂಡೇಲ