ಸುಷ್ಮಾಗೆ ಡಿಎಸ್ಪಿ ಹುದ್ದೆ: ಹಿಮಾಚಲ ಸರಕಾರ ಘೋಷಣೆ
Team Udayavani, Jul 26, 2017, 7:25 AM IST
ಹೊಸದಿಲ್ಲಿ: ಮಹಿಳಾ ವಿಶ್ವಕಪ್ನಲ್ಲಿ ಭಾರತ ತಂಡದ ವಿಕೆಟ್ ಕೀಪರ್ ಆಗಿ ಮಿಂಚಿರುವ ಸುಷ್ಮಾ ವರ್ಮಾಗೆ ಹಿಮಾಚಲ ಪ್ರದೇಶ ಸರಕಾರ ಡಿಎಸ್ಪಿ (ಪೊಲೀಸ್ ಉಪ ಅಧೀಕ್ಷಕ) ಹುದ್ದೆ ನೀಡುವುದಾಗಿ ಘೋಷಿಸಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ಹಿಮಾಚಲ ಪ್ರದೇಶ ರಾಜ್ಯದ ಮುಖ್ಯಮಂತ್ರಿ ವೀರಭದ್ರ ಸಿಂಗ್, ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳಲ್ಲಿ ಸುಷ್ಮಾ ವರ್ಮ ಉತ್ತಮ ಪ್ರದರ್ಶನ ನೀಡುವ ಮೂಲಕ ರಾಜ್ಯಕ್ಕೆ ಕೀರ್ತಿ ತಂದಿದ್ದಾರೆ. ಅವರಿಗೆ ರಾಜ್ಯ ಸರಕಾರದಿಂದ ಡಿಎಸ್ಪಿ ಹುದ್ದೆಯನ್ನು ನೀಡಲಾಗುವುದು ಎಂದು ತಿಳಿಸಿದ್ದಾರೆ. ಸೋಮವಾರವಷ್ಟೇ ಭಾರತ ತಂಡದ ಸ್ಫೋಟಕ ಆಟಗಾರ್ತಿ ಹರ್ಮನ್ಪ್ರೀತ್ ಕೌರ್ಗೆ ಪಂಜಾಬ್ ಸರಕಾರ ಡಿಎಸ್ಪಿ ಹುದ್ದೆಯನ್ನು ನೀಡುವುದಾಗಿ ಘೋಷಿಸಿತ್ತು.
ಸುಷ್ಮಾ ವರ್ಮ ಒಂದು ಟೆಸ್ಟ್, 29 ಏಕದಿನ ಹಾಗೂ 19 ಟಿ-20 ಪಂದ್ಯ ಆಡಿದ್ದಾರೆ.