ಸ್ವಹಿತಾಸಕ್ತಿ ಸಮಸ್ಯೆಇಲ್ಲ: ಗಂಗೂಲಿ

Team Udayavani, Apr 9, 2019, 6:30 AM IST

ಹೊಸದಿಲ್ಲಿ: ಡೆಲ್ಲಿ ತಂಡದ ಸಲಹೆಗಾರನಾಗಿ ಕಾರ್ಯ ನಿರ್ವಹಿಸುತ್ತಿರುವ ಸೌರವ್‌ ಗಂಗೂಲಿ, ತನ್ನ ನೂತನ ಹುದ್ದೆಯಿಂದ ಯಾವುದೇ ಸ್ವಹಿತಾಸಕ್ತಿ ಸಮಸ್ಯೆ ಉದ್ಭವಿಸುವುದಿಲ್ಲ ಎಂದು ಹೇಳಿದ್ದಾರೆ.

ಬಿಸಿಸಿಐ ನೀಡಿದ ನೋಟಿಸ್‌ಗೆ ಉತ್ತರ ನೀಡಿದ ಅವರು, ತಾನು ಬಿಸಿಸಿಐ ಹಾಗೂ ಐಪಿಎಲ್‌ನ ಯಾವುದೇ ಸಮಿತಿಗಳಲ್ಲಿಲ್ಲ, ಆಡಳಿತಾತ್ಮಕ ಜವಾಬ್ದಾರಿಯನ್ನೂ ಹೊಂದಿಲ್ಲ. ಈ ಹಿಂದೆ ಬಿಸಿಸಿಐ, ಐಪಿಎಲ್‌ ತಾಂತ್ರಿಕ ಸಮಿತಿ ಜವಾಬ್ದಾರಿ ಹೊಂದಿದ್ದೆ. ಈಗ ಅದರಲ್ಲೂ ಇಲ್ಲ. ಹಾಗೆಯೇ ಕೆಕೆಆರ್‌ ತಂಡದಲ್ಲಿ ನನ್ನ ಷೇರುಗಳಾಗಲೀ, ಆಡಳಿತಾತ್ಮಕ ಜವಾಬ್ದಾರಿಯಾಗಲೀ ಇಲ್ಲ. ನಾನು ಕೇವಲ ಬಂಗಾಲ ರಾಜ್ಯ ಕ್ರಿಕೆಟ್‌ ಸಂಸ್ಥೆಯ ಅಧ್ಯಕ್ಷ ಮಾತ್ರ. ಆದ್ದರಿಂದ ಡೆಲ್ಲಿಗೆ ಸಲಹೆಗಾರನಾಗುವುದರಲ್ಲಿ ಯಾವುದೇ ಸ್ವಹಿತಾಸಕ್ತಿ ಸಮಸ್ಯೆ ಬಾಧಿಸುವುದಿಲ್ಲ ಎಂದು ವಿವರಣೆ ನೀಡಿದ್ದಾರೆ.