ವನಿತಾ ಟಿ20 ವಿಶ್ವಕಪ್‌ ಅಭ್ಯಾಸ: ವಿಂಡೀಸ್‌ ವಿರುದ್ಧ ಭಾರತ ಗೆಲುವು

Team Udayavani, Nov 6, 2018, 6:00 AM IST

ಕೂಲಿಜ್‌ (ಆ್ಯಂಟಿಗುವಾ): ಟಿ20 ವನಿತಾ ವಿಶ್ವಕಪ್‌ ಅಭ್ಯಾಸ ಪಂದ್ಯವೊಂದರಲ್ಲಿ ಭಾರತ ಆತಿಥೇಯ ವೆಸ್ಟ್‌ ಇಂಡೀಸಿಗೆ ಸೋಲುಣಿಸಿದೆ. ಮಳೆಯಿಂದ ಅಡಚಣೆಗೊಳಗಾದ ಈ ಮುಖಾಮುಖೀಯನ್ನು ಹರ್ಮನ್‌ಪ್ರೀತ್‌ ಕೌರ್‌ ಬಳಗ ಡಿ-ಎಲ್‌ ನಿಯಮದಂತೆ 5 ವಿಕೆಟ್‌ಗಳಿಂದ ಜಯಿಸಿದೆ.

ಆ್ಯಂಟಿಗುವಾದ ಕೂಲಿಜ್‌ ಸ್ಟೇಡಿಯಂನಲ್ಲಿ ರವಿವಾರ ನಡೆದ ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ವೆಸ್ಟ್‌ ಇಂಡೀಸ್‌ 8 ವಿಕೆಟಿಗೆ 115 ರನ್‌ ಗಳಿಸಿತು. ಮಳೆಯಿಂದಾಗಿ ಭಾರತಕ್ಕೆ 12 ಓವರ್‌ಗಳಲ್ಲಿ 75 ರನ್‌ ತೆಗೆಯುವ ಗುರಿ ಲಭಿಸಿತು. 11.3 ಓವರ್‌ಗಳಲ್ಲಿ 5 ವಿಕೆಟಿಗೆ 77 ರನ್‌ ಬಾರಿಸುವ ಮೂಲಕ ಭಾರತದ ವನಿತೆಯರು ಗೆದ್ದು ಬಂದರು.

ಮಿಥಾಲಿ ರಾಜ್‌ ಅವರನ್ನು 2ನೇ ಎಸೆತದಲ್ಲೇ ಶೂನ್ಯಕ್ಕೆ ಕಳೆದುಕೊಂಡ ಭಾರತ, ಜೆಮಿಮಾ ರೋಡ್ರಿಗಸ್‌ (1), ತನ್ಯಾ ಭಾಟಿಯ (1) ಅವರನ್ನೂ ಬೆನ್ನು ಬೆನ್ನಿಗೆ ಕಳೆದುಕೊಂಡಿತು. 4 ಓವರ್‌ ಮುಕ್ತಾಯಕ್ಕೆ 24 ರನ್ನಿಗೆ 3 ವಿಕೆಟ್‌ ಉರುಳಿತು. ಆದರೆ ಸ್ಮತಿ ಮಂಧನಾ (32), ಹರ್ಮನ್‌ಪ್ರೀತ್‌ ಕೌರ್‌ (18), ವೇದಾ ಕೃಷ್ಣಮೂರ್ತಿ (ಔಟಾಗದೆ 11) ಸೇರಿಕೊಂಡು ತಂಡವನ್ನು ದಡ ಮುಟ್ಟಿಸಿದರು.ಅರುಂಧತಿ ರೆಡ್ಡಿ, ರಾಧಾ ಯಾದವ್‌, ಪೂನಂ ಯಾದವ್‌ ತಲಾ 2 ವಿಕೆಟ್‌ ಕಿತ್ತು ಮಿಂಚಿದರು.