100 ದಿನ ರಜೆ ಕೇಳಿದ ಪೇದೆ

Team Udayavani, Mar 15, 2020, 3:05 AM IST

ಮುಳಬಾಗಿಲು: ಕೊರೊನಾ ದಾಳಿಗೆ ಹೆದರಿದ ಪೊಲೀಸ್‌ ಪೇದೆಯೊಬ್ಬ, “ನನ್ನ ತಂದೆ-ತಾಯಿಗೆ ನಾನೊಬ್ಬನೇ ಮಗನಾಗಿದ್ದು, 100 ದಿನ ರಜೆ ನೀಡಬೇಕು’ ಎಂದು ಕೋರಿ ರಾಜ್ಯ ಪೊಲೀಸ್‌ ಮಹಾನಿರ್ದೇಶಕ ಪ್ರವೀಣ್‌ ಸೂದ್‌ ಅವರಿಗೆ ಪತ್ರ ಬರೆದಿದ್ದು, ಈ ಪತ್ರ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. ಕೋಲಾರ ಜಿಲ್ಲೆ ಮುಳಬಾಗಿಲು ತಾಲೂಕಿನ ನಂಗಲಿ ಪೊಲೀಸ್‌ ಠಾಣೆ ಪೇದೆ ಪ್ರಶಾಂತ್‌, ಈ ಪತ್ರ ಬರೆದಿದ್ದಾರೆ.

“ನಾನು 2 ವರ್ಷಗಳಿಂದ ಇಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದೇನೆ. ದಿನ ನಿತ್ಯ 24 ಗಂಟೆ ಹಾಗೂ ವಾರ ಪೂರ್ತಿ ಜನರ ಸಂಪರ್ಕದಲ್ಲಿ ಕರ್ತವ್ಯ ನಿರ್ವಹಿಸಬೇಕಾಗಿದೆ. ಈಗ ಕೊರೊನಾ ವೈರಸ್‌ ಎಲ್ಲಿ ನನಗೆ ಹರಡುತ್ತೋ ಎಂದು ಭಯದಿಂದ ಬದುಕುವಂತಾಗಿದೆ. ನನ್ನ ತಂದೆ-ತಾಯಿಗೆ ನಾನೊಬ್ಬನೇ ಮಗ. ಈ ವೈರಸ್‌ ತಮ್ಮ ಮಗನಿಗೆ ಎಲ್ಲಿ ಹರಡುತ್ತದೆಯೋ ಎಂದು ಅವರು ಭಯ ಬೀಳುತ್ತಿದ್ದಾರೆ.

ಹೀಗಾಗಿ, ನನಗೆ ನೂರು ಅಥವಾ ನೂರಕ್ಕಿಂತ ಹೆಚ್ಚು ದಿನಗಳ ಕಾಲ ರಜೆ ನೀಡಬೇಕು’ ಎಂದು ಪತ್ರದಲ್ಲಿ ಮನವಿ ಮಾಡಿದ್ದಾರೆ. ಈ ವಿಚಾರವಾಗಿ ಜಿಲ್ಲಾ ಪೊಲೀಸ್‌ ವರಿಷ್ಟಾಧಿಕಾರಿ ಕಾರ್ತಿಕ್‌ ರೆಡ್ಡಿಯವರು, ಶನಿವಾರ ಸದರಿ ಪೇದೆಯನ್ನು ಕಚೇರಿಗೆ ಕರೆಸಿ, ಚರ್ಚಿಸಿದ್ದಾರೆ ಎಂದು ತಿಳಿದು ಬಂದಿದೆ.