ನನಗಿರುವುದು ಎರಡೇ ಕಾಲು: ಡಿಕೆಶಿ

Team Udayavani, Nov 19, 2019, 3:03 AM IST

ಚಿಕ್ಕಬಳ್ಳಾಪುರ: ರಾಜ್ಯವನ್ನೆಲ್ಲಾ ಸುತ್ತುವುದಕ್ಕೆ ನನಗೆ ಇರುವುದು ಎರಡು ಕಾಲು, ಎರಡು ಕೈ, ಎರಡು ಕಿವಿ, ಎರಡು ಕಣ್ಣು ಅಷ್ಟೆ. ಹೀಗಾಗಿ, ಉಪ ಚುನಾವಣೆಯಲ್ಲಿ ಎಷ್ಟು ಸಾಧ್ಯವೋ ಅಷ್ಟು ಪ್ರಚಾರ ನಡೆಸುತ್ತೇನೆ ಎಂದು ಮಾಜಿ ಸಚಿವ ಡಿ.ಕೆ.ಶಿವಕುಮಾರ್‌ ಹೇಳಿದ್ದಾರೆ.

ನಗರದಲ್ಲಿ ಸೋಮವಾರ ಕಾಂಗ್ರೆಸ್‌ ಅಭ್ಯರ್ಥಿ ನಂದಿ ಅಂಜನಪ್ಪ ನಾಮಪತ್ರ ಸಲ್ಲಿಸುವ ವೇಳೆ ಪಕ್ಷದಿಂದ ಹಮ್ಮಿಕೊಂಡಿದ್ದ ಬೃಹತ್‌ ಮೆರವಣಿಗೆಯಲ್ಲಿ ಭಾಗವಹಿಸಿ ಅವರು ಮಾತನಾಡಿದರು. ರಾಜ್ಯದಲ್ಲಿ ನ್ಯಾಯ, ಧರ್ಮ ಉಳಿಯಬೇಕಾದರೆ ಯಾರೆಲ್ಲಾ ಪಕ್ಷಾಂತರ ಮಾಡಿದ್ದಾರೆ ಅವರಿಗೆಲ್ಲಾ ರಾಜ್ಯದ 15 ಕ್ಷೇತ್ರಗಳಲ್ಲಿ ಮತದಾರರು ತಕ್ಕಪಾಠ ಕಲಿಸಬೇಕು. ಇದು ಅವರ ಸ್ವಾಭಿಮಾನದ ಪ್ರಶ್ನೆ ಆಗಿದೆ ಎಂದರು.

ಮಾಜಿ ಸಚಿವ ಡಿ.ಕೆ.ಶಿವಕುಮಾರ್‌ ಅವರು ಕನಕಪುರಕ್ಕೆ ಅಥವಾ ಚನ್ನಪಟ್ಟಣಕ್ಕೆ ಹುಲಿ ಆಗಿರಬಹುದು. ಆದರೆ, ಇಡೀ ರಾಜ್ಯಕ್ಕೆ ಅಲ್ಲ. ಚಿಕ್ಕಬಳ್ಳಾಪುರದಲ್ಲಿ ಅವರು ಬಂದರೂ ಅವರ ಆಟ ನಡೆಯಲ್ಲ. ಅವರು ಬಂದಷ್ಟು ನಮಗೆ ಹೆಚ್ಚು ಲಾಭ.
-ಸಿ.ಟಿ.ರವಿ, ಸಚಿವ