ಕೋವಿಡ್ ಕಾಲದಲ್ಲೂ ಮೂಡಿ ಬರುತ್ತಿದೆ ಭರವಸೆಯ ಬೆಳಕು; ವಾಹನ ಖರೀದಿ ದಿಢೀರ್‌ ಏರಿಕೆ

Team Udayavani, Sep 5, 2020, 6:10 AM IST

ಸಾಂದರ್ಭಿಕ ಚಿತ್ರ

ಬೆಂಗಳೂರು: ಅಟೋಮೊಬೈಲ್‌ ಕ್ಷೇತ್ರ ಈಗ ನಿರೀಕ್ಷೆಗೂ ಮೀರಿ ಪುಟಿದೇಳುತ್ತಿದೆ. ಲಾಕ್‌ಡೌನ್‌ ತೆರವಾದ ದಿನದಿಂದಲೇ ರಾಜ್ಯದಲ್ಲಿ ವಾಹನಗಳ ನೋಂದಣಿ ಪ್ರಮಾಣ 2ರಿಂದ 3 ಪಟ್ಟು ಏರಿದೆ. ಇದರ ಪರಿಣಾಮವಾಗಿ ಅಲ್ಪಾವಧಿಯಲ್ಲೇ ಸಾರಿಗೆ ಇಲಾಖೆಯ ಆದಾಯ ಸಂಗ್ರಹ ಗುರಿಯಲ್ಲಿ ಶೇ. 75ರಷ್ಟು ಸಾಧನೆ ಸಾಧ್ಯವಾಗಿದೆ.

ಕೋವಿಡ್ ಆತಂಕ ಈಗಲೂ ಜನರಲ್ಲಿ ಮನೆ ಮಾಡಿದ್ದು, ಸಾಮಾಜಿಕ ಅಂತರ ಸೇರಿದಂತೆ ಸುರಕ್ಷತೆಯ ದೃಷ್ಟಿಯಿಂದ ಖಾಸಗಿ ವಾಹನಗಳ ಮೊರೆಹೊಗುತ್ತಿರುವುದು ವಾಹನಗಳ ಮಾರಾಟ ದಲ್ಲಿ ದಿಢೀರ್‌ ಏರಿಕೆಗೆ ಪ್ರಮುಖ ಕಾರಣ. ಲಾಕ್‌ಡೌನ್‌ ಅವಧಿಯಲ್ಲಿ ಅಂದರೆ ಎಪ್ರಿಲ್‌ ಮತ್ತು ಮೇಯಲ್ಲಿ ರಾಜ್ಯದಲ್ಲಿ ಖಾಸಗಿ ವಾಹನಗಳ ನೋಂದಣಿ ಪ್ರಮಾಣ ಕ್ರಮವಾಗಿ 15,689 ಮತ್ತು 37,004 ಇತ್ತು. ಆದರೆ ಜೂನ್‌ -ಆಗಸ್ಟ್‌ ನಲ್ಲಿ 70ರಿಂದ 90 ಸಾವಿರಕ್ಕೆ ಜಿಗಿದಿದೆ. ಸರಾಸರಿ 1.20 ಲಕ್ಷ ನೋಂದಣಿ ಆಗುತ್ತಿದ್ದ ಜನವರಿ -ಮಾರ್ಚ್‌ಗೆ ಹೋಲಿ ಸಿದರೆ ವೇತನ ಕಡಿತ, ಉದ್ಯೋಗಕ್ಕೆ ನಷ್ಟದಂತಹ ಸಂಕಷ್ಟಗಳ ನಡುವೆ ಜನ ವಾಹನ ಖರೀದಿಗೆ ಆಸಕ್ತಿ ತೋರಿದ್ದಾರೆ.

ಸಾಮಾನ್ಯ ದಿನಗಳು, ಲಾಕ್‌ಡೌನ್‌ ಮತ್ತು ಅನ್‌ಲಾಕ್‌ ಅವಧಿಯಲ್ಲಿ ವಾಹನಗಳ ನೋಂದಣಿ ಟ್ರೆಂಡ್‌ ರಾಜ್ಯದಲ್ಲಿ ಹೀಗಿದೆ. ಇದ ರಲ್ಲಿ ಶೇ. 70-80ರಷ್ಟು ದ್ವಿಚಕ್ರ ವಾಹನ ಮತ್ತು ಕಾರುಗಳಾಗಿವೆ.

ವಿಜಯಕುಮಾರ್‌ ಚಂದರಗಿ