ಮತ್ತೂಂದು ಸುತ್ತಿನ ಹಿಂಸಾಚಾರಕ್ಕೆ ಸಂಚು?

Team Udayavani, Jan 13, 2021, 7:47 AM IST

ವಾಷಿಂಗ್ಟನ್‌: ಹಿಂದೆಂದೂ ಕಂಡರಿಯ ದಂತಹ ಕ್ಯಾಪಿಟಲ್‌ ಹಿಲ್‌ ದಾಂಧ‌ಲೆಯನ್ನು ಕಂಡ ಅಮೆರಿಕದಲ್ಲಿ ಮತ್ತೂಮ್ಮೆ ಹಿಂಸಾಚಾರ ಸ್ಫೋಟಿಸಲಿದೆ ಯೇ? ಜ.20ರಂದು ನಿಯೋಜಿತ ಅಧ್ಯಕ್ಷ ಜೋ ಬೈಡೆನ್‌ ಅವರು ಪ್ರಮಾಣ ಸ್ವೀಕಾರ ಮಾಡಲಿದ್ದು, ಅದಕ್ಕೂ ಮುನ್ನವೇ “ಸಶಸ್ತ್ರ ಪ್ರತಿಭಟನೆ’ ನಡೆಸಲು ಸಂಚು ನಡೆದಿದೆ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ. ಈ ಹಿನ್ನೆಲೆಯಲ್ಲಿ ಎಚ್ಚರಿಕೆ ವಹಿಸುವಂತೆ ಅಮೆರಿಕದ ತನಿಖಾ ಸಂಸ್ಥೆ ಎಫ್ಬಿಐ ಸೂಚಿಸಿದೆ.

ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಬೆಂಬಲಿಗರು ದೊಡ್ಡ ಮಟ್ಟದ ಹಿಂಸಾಚಾರ ಹಾಗೂ ಪ್ರತಿಭಟನೆ ನಡೆಸಲು ಸಂಚು ರೂಪಿಸಿದ್ದಾರೆ. ಟ್ರಂಪ್‌ ಪರವಾದ ಆನ್‌ಲೈನ್‌ ನೆಟ್‌ವರ್ಕ್‌ಗಳಲ್ಲಿ ಅಮೆರಿಕದ ಎಲ್ಲ 50 ಪ್ರಾಂತ್ಯಗಳು ಹಾಗೂ ವಾಷಿಂಗ್ಟನ್‌ ಡಿಸಿಯಲ್ಲಿ ಸಶಸ್ತ್ರ ಹೋರಾಟ ಸಹಿತ ಬೇರೆ ಬೇರೆ ದಿನಾಂಕಗಳಂದು ಪ್ರತಿಭಟನೆ ಹಮ್ಮಿಕೊಳ್ಳುವ ಕುರಿತು ಚರ್ಚೆ ನಡೆದಿದೆ ಎಂದು ಎಫ್ಬಿಐ ಹೇಳಿದೆ.

ಇದೇ ವೇಳೆ, ಕಳೆದ ವಾರ ಕ್ಯಾಪಿಟಲ್‌ ಹಿಲ್‌ನಲ್ಲಿ ಟ್ರಂಪ್‌ ಹಿಂಬಾಲಕರು ನಡೆಸಿದ ಹಿಂಸಾಚಾರದಲ್ಲಿ 12ಕ್ಕೂ ಅಧಿಕ ಜನಪ್ರತಿನಿಧಿಗಳೂ ಭಾಗಿಯಾಗಿದ್ದರು ಎಂಬ ಮಾಹಿತಿ ಬಹಿರಂಗವಾಗಿದೆ.

ತುರ್ತು ಪರಿಸ್ಥಿತಿ ಘೋಷಣೆ: ಬೈಡೆನ್‌ ಪ್ರಮಾಣ ಕ್ಕೂ ಮುನ್ನ ಮತ್ತೂಂದು ಸುತ್ತಿನ ಹಿಂಸಾಚಾರ ನಡೆಯುವ ಸಾಧ್ಯತೆ ಬಗ್ಗೆ ಎಫ್ಬಿಐ ಎಚ್ಚರಿಕೆ ನೀಡಿದ ಬೆನ್ನಲ್ಲೇ ಅಧ್ಯಕ್ಷ ಟ್ರಂಪ್‌ ಮಂಗಳವಾರ ರಾಷ್ಟ್ರ ರಾಜಧಾನಿಯಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಿ ದ್ದಾರೆ. ಸೋಮವಾರದಿಂದ ಅನ್ವಯವಾಗಿ ಜ.24ರ ವರೆಗೆ ಇದು ಜಾರಿಯಲ್ಲಿರಲಿದೆ.

ಇಂದು ಟ್ರಂಪ್‌ ವಿರುದ್ಧ ವಾಗಂಡನೆ?: ಹಿಂಸಾಚಾರಕ್ಕೆ ಸಂಬಂಧಿಸಿ ಟ್ರಂಪ್‌ ವಿರುದ್ಧ ಸೋಮವಾರವೇ ಹೌಸ್‌ ಆಫ್ ರೆಪ್ರಸೆಂಟೇಟಿವ್ಸ್‌ ನಲ್ಲಿ ವಾಗ್ಧಂಡನೆ ನಿರ್ಣಯ ಮಂಡನೆಯಾಗಿದ್ದು, ಬುಧವಾರ ಈ ಕುರಿತು ಮತದಾನ ನಡೆಯಲಿದೆ. ಮಹಾಭಿಯೋಗ ಪ್ರಕ್ರಿಯೆಗೆ ಸರಳ ಬಹುಮತವಿದ್ದರೆ ಸಾಕು. ಟ್ರಂಪ್‌ ವಾಗ್ಧಂಡನೆಗೆ ಅಗತ್ಯವಾದ ಸಂಖ್ಯಾಬಲ ಡೆಮಾಕ್ರಾಟ್‌ಗಿದೆ.

ಕ್ಯೂಬಾದ ಮೇಲೆ ಅಮೆರಿಕ ನಿರ್ಬಂಧ :

ಟ್ರಂಪ್‌ ಆಡಳಿತವು ಕಮ್ಯುನಿಸ್ಟ್‌ ರಾಷ್ಟ್ರ ಕ್ಯೂಬಾವನ್ನು “ಉಗ್ರವಾದ ಪ್ರಾಯೋಜಕತ್ವ ರಾಷ್ಟ್ರ’ ಎಂದು ಘೋಷಿಸಿದೆ. ಬೈಡೆನ್‌ ಅವರು ಅಧ್ಯಕ್ಷರಾಗಲು ಇನ್ನೇನು ಕೆಲವೇ ದಿನಗಳು ಉಳಿದಿರುವಂತೆಯೇ ಟ್ರಂಪ್‌ ಆಡಳಿತ ಈ ನಿರ್ಣಯಕ್ಕೆ ಬಂದಿರುವುದು ಡೆಮಾಕ್ರಾಟ್‌ಗಳ ಕಳವಳ ಹೆಚ್ಚುವಂತೆ ಮಾಡಿದೆ. ದಶಕಗಳಿಂದಲೂ ಕ್ಯೂಬಾ ಮತ್ತು ಅಮೆರಿಕದ ನಡುವೆ ಹಗ್ಗಜಗ್ಗಾಟ ಇದೆಯಾದರೂ  ಒಬಾಮಾ ಅವಧಿಯಲ್ಲಿ ಎರಡೂ ರಾಷ್ಟ್ರಗಳ ನಡುವಿನ ಸಂಬಂಧ ಸುಧಾರಣೆಯಾಗಿತ್ತು. ಒಬಾಮಾ ಕ್ಯೂಬಾದ ಮೇಲಿದ್ದ ಉಗ್ರಪ್ರಾಯೋಜಕ ರಾಷ್ಟ್ರವೆಂಬ ಅಭಿದಾನ ಹಾಗೂ ಅದರ ಮೇಲಿದ್ದ ಹಲವು ನಿರ್ಬಂಧಗಳನ್ನು ತೆಗೆದುಹಾಕಿದ್ದರು. ಈಗ ಟ್ರಂಪ್‌ ಹೊರಹೋಗುವ ಮುನ್ನ, “”ಕ್ಯೂಬಾ ಅಂತಾರಾಷ್ಟ್ರೀಯ ಉಗ್ರಸಂಘಟನೆಗಳಿಗೆ ಸಹಕಾರ ನೀಡುತ್ತಿದೆ” ಎಂದು ಆರೋಪಿಸಿ, ನಿರ್ಬಂಧಗಳನ್ನು ಮತ್ತೆ ಜಾರಿ ಮಾಡಲು ಮುಂದಾಗಿದ್ದಾರೆ.