ಅಂಟಾರ್ಟಿಕಾದಲ್ಲಿ ದಾಖಲೆಯ 20.75 ಡಿಗ್ರಿ ಸೆಲ್ಷಿಯಸ್ ತಾಪಮಾನ ದಾಖಲು

Team Udayavani, Feb 14, 2020, 9:42 PM IST

ಅಂಟಾರ್ಟಿಕಾದಲ್ಲಿ ದಾಖಲೆಯ ತಾಪಮಾನ ದಾಖಲುಗೊಂಡಿರುವುದಾಗಿ ವಿಜ್ಞಾನಿಗಳು ತಿಳಿಸಿದ್ದಾರೆ. ಈ ಹಿಂದೆ ಹಿಮಾವೃತ ಈ ಪ್ರದೇಶದಲ್ಲಿ ಗರಿಷ್ಠ ತಾಪಮಾನ 20 ಡಿಗ್ರಿ ಸೆಲ್ಷಿಯಸ್ ದಾಖಲುಗೊಂಡಿದ್ದೇ ಅಧಿಕ ತಾಪಮಾನವಾಗಿತ್ತು. ಇದೀಗ 20.75 ಡಿಗ್ರಿ ಸೆಲ್ಷಿಯಸ್ ಅಂದರೆ 69.35 ಫ್ಯಾರನ್ ಹೀಟ್ ತಾಪಮಾನ ದಾಖಲುಗೊಂಡಿರುವುದು ವಿಜ್ಞಾನಿಗಳನ್ನು ಕಳವಳಕ್ಕೀಡುಮಾಡಿದೆ.

ಬ್ರಝಿಲ್ ವಿಜ್ಞಾನಿ ಕಾರ್ಲೋಸ್ ಚಾಫೆರ್ ಅವರು ಪ್ರತಿಕ್ರಿಯಿಸಿ, ‘ಇಷ್ಟು ಅಧಿಕ ತಾಪಮಾನವನ್ನು ಈ ಪ್ರದೇಶದಲ್ಲಿ ಹಿಂದೆಂದೂ ನಾವು ಕಂಡಿರಲಿಲ್ಲ’ ಎಂದಿದ್ದಾರೆ.

ಈ ಹಿಮಖಂಡದ ದ್ವೀಪ ಪ್ರದೇಶವೊಂದರಲ್ಲಿ ಇರುವ ನಿಗಾವಣೆ ಕೇಂದ್ರದಲ್ಲಿ ಫೆಬ್ರವರಿ 9ರಂದು ಈ ತಾಪಮಾನವನ್ನು ದಾಖಲುಮಾಡಿಕೊಳ್ಳಲಾಗಿದೆ.

ಅಂಟಾರ್ಟಿಕದಲ್ಲಿರುವ ಸೇಮೌರ್ ದ್ವೀಪ ಪ್ರದೇಶದಲ್ಲಿ ಈ ತಾಪಮಾನ ದಾಖಲುಗೊಂಡಿದ್ದು ಇದು ಅರ್ಜೇಂಟಿನಾದ ಮರಂಬಿಯೋ ಸಂಶೋಧನಾ ಕೇಂದ್ರವಿರುವ ಸ್ಥಳವೂ ಆಗಿದೆ.