ಅಫ್ಘಾನ್ ನಲ್ಲಿ ತಾಲಿಬಾನ್ ಅಟ್ಟಹಾಸ: ಮತ್ತೆ ಸಾವಿನ ಭೀತಿಯಲ್ಲಿ ಹಜಾರಸ್‌!

Team Udayavani, Aug 21, 2021, 1:12 PM IST

ಕಾಬೂಲ್: ಅಫ್ಘಾನಿಸ್ತಾನದಲ್ಲಿ ತಾಲಿಬಾನಿಗಳ ಆಡಳಿತ ಶುರುವಾಯಿತು ಎಂದರೆ ಸಾಕು, ಅಲ್ಲಿನ ಹೆಣ್ಣು ಮಕ್ಕಳಿಗಿಂತ ಮೊದಲು ಭಯ ಶುರುವಾಗುವುದು ಹಜಾರಸ್‌ ಸಮುದಾಯದ ಜನರಿಗೆ. ಇವರ ವಿಚಾರದಲ್ಲಿ ತಾಲಿಬಾನಿಗಳು, ಹಿಟ್ಲರ್‌ಗಿಂತ ಕ್ರೂರಿಗಳು. ಒಂದು ಕಾಲದಲ್ಲಿ ಇಡೀ ಅಫ್ಘಾನ್‌ನ ಜನಸಂಖ್ಯೆಯ ಶೇ.67ರಷ್ಟಿದ್ದ ಹಜಾರಸ್‌ ಸಮುದಾಯ ಈಗ ತೀರಾ ಶೇ.10ರಿಂದ 12ರಷ್ಟಕ್ಕೆ ಇಳಿಕೆಯಾಗಿದೆ. ಇದಕ್ಕೆ ಕಾರಣ ಸಾಮೂಹಿಕವಾಗಿ ಇವರನ್ನು ತಾಲಿಬಾನಿಗಳು ಕೊಂದು ಹಾಕಿದ್ದಾರೆ. ಈಗ ಇವರ ಆತಂಕ ಇನ್ನಷ್ಟು ಹೆಚ್ಚಾಗಲು ಕಾರಣವೂ ಇದೆ. ಮೊನ್ನೆಯಷ್ಟೇ ಇವರ ನಾಯಕ ಅಬ್ದುಲ್‌ ಅಲಿ ಮಝಾರಿ ಅವರ ಪ್ರತಿಮೆಯನ್ನು ತಾಲಿಬಾನಿಗಳು ಧ್ವಂಸಗೊಳಿಸಿದ್ದಾರೆ.

ಯಾರಿವರು ಹಜಾರಸ್‌ಗಳು

ಇದು ಅಫ್ಘಾನಿಸ್ತಾನದ ಅತ್ಯಂತ ಪ್ರಾಚೀನ ಬುಡಕಟ್ಟು ಸಮುದಾಯ. ಇವರು ತಮ್ಮನ್ನು ಮೊಂಗೊಲ್‌ ಸಾಮ್ರಾಟ ಜಿಂಗೀಸ್‌ ಖಾನ್‌ನ ವಂಶಸ್ಥರು ಎಂದು ಹೇಳಿಕೊಳ್ಳುತ್ತಾರೆ. ಇದು ಅತ್ಯಂತ ಸಂಪ್ರದಾಯ ಮತ್ತು ಧಾರ್ಮಿಕ ಸಮುದಾಯ. ಅಫ್ಘಾನಿಸ್ತಾನದಲ್ಲಿ ಇವರು ವಾಸಿಸುತ್ತಿರುವುದು ಗುಡ್ಡಗಾಡು ಪ್ರದೇಶಗಳಲ್ಲಿ. 13ನೇ ಶತಮಾನದಲ್ಲಿ ಮೊಂಗಲ್‌ ಸಾಮ್ರಾಜ್ಯದ ಅಧೀನದಲ್ಲೇ ಇಡೀ ಅಫ್ಘಾನಿಸ್ತಾನ ವಿತ್ತು.19ನೇ ಶತಮಾನದಲ್ಲಿ ಪಶ್ತುನ್‌ ರಾಜಅಹ್ಮದ್‌ ಶಾ ದುರಾನಿ ಅವರ ಆಳ್ವಿಕೆ ಮಾಡುತ್ತಿದ್ದ. ಪಶ್ತುನ್‌ ರಾಜ ಸುನ್ನಿಗೆ ಸೇರಿದನಾಗಿದ್ದು, ಹಜಾರಸ್‌ಗಳು ಶಿಯಾಗೆ ಸೇರಿದವರಾಗಿದ್ದಾರೆ.

ತಾಲಿಬಾನಿಗಳಿಗೇಕೆ ದ್ವೇಷ?

ಹಜಾರಸ್‌ಗಳು ಶಿಯಾ ಮುಸ್ಲಿಮರಾಗಿರುವುದೇ ತಾಲಿಬಾನ್‌ ಉಗ್ರರ ಪ್ರಮುಖ ದ್ವೇಷಕ್ಕೆ ಕಾರಣ. ಅಷ್ಟೇ ಅಲ್ಲ,ಅಫ್ಘಾನ್‌ ನಲ್ಲಿ ಸುನ್ನಿ ಮುಸ್ಲಿಮರೇ ಬಹಳಷ್ಟು ಸಂಖ್ಯೆಯಲ್ಲಿದ್ದು, ಇವರೂ ಶಿಯಾಗೆ ಸೇರಿದವರನ್ನು ವಿರೋಧಿಸುತ್ತಾರೆ. ಜತೆಗೆ ಪರ್ಶಿಯನ್‌ ಲಿಪಿ ಹೊಂದಿರುವ ಹಜಾರಗಿ ಎಂಬ ಭಾಷೆಯನ್ನು ಮಾತನಾಡುವ ಇವರು, ಸಾಮಾನ್ಯವಾಗಿ ದೇಶದ ಉಳಿದವರಿಗಿಂತ ಬೇರೆಯಾಗಿಯೇ ಗುರುತಿಸಲ್ಪಟ್ಟಿದ್ದಾರೆ.

ಶೇ.67ರಷ್ಟಿದ್ದಜನಸಂಖ್ಯೆ ಹಜಾರಸ್‌ ಅವರದ್ದು ಅಫ್ಘಾನಿಸ್ತಾನದಲ್ಲಿನ ಅತ್ಯಂತ ದೊಡ್ಡ ಜನಾಂಗೀಯ ಅಲ್ಪಸಂಖ್ಯಾತರು. ಸದ್ಯ ಇಲ್ಲಿನ ಜನಸಂಖ್ಯೆಯ ಶೇ.10-12ರಷ್ಟಿದ್ದಾರೆ. ಒಂದು ಕಾಲದಲ್ಲಿ ಇಡೀ ದೇಶದಲ್ಲಿ ಇವರ ಜನ ಸಂಖ್ಯೆ ಇದ್ದದ್ದು ಶೇ.67ರಷ್ಟು. ಆದರೆ, ಕಾಲ ಕ್ರಮೇಣ ಜನಸಂಖ್ಯೆ ಕಡಿಮೆಯಾಗುತ್ತಾ ಬಂದಿತು.

19ನೇ ಶತಮಾನದಿಂದ ಆಕ್ರಮಣ

ಹಜಾರಸ್‌ಗಳ ಮೇಲೆ ದಾಳಿ ಶುರುವಾಗಿದ್ದು 19ನೇ ಶತಮಾನ ಮಧ್ಯಭಾಗದಲ್ಲಿ. ಪಶ್ತುನ್‌ ರಾಜ ಅಮೀರ್‌ ಅಬ್ದುಲ್‌ ರೆಹಮಾನ್‌, ಶಿಯಾದವರ ಸಾಮೂಹಿಕ ಹತ್ಯೆಗೆ ಆದೇಶ ನೀಡಿದ್ದ. ಹೀಗಾಗಿ, ಇವರ ಜನಸಂಖ್ಯೆ ಒಮ್ಮೆಗೆ ಅರ್ಧದಷ್ಟು ಕಡಿಮೆಯಾಗಿತ್ತು. ಅಷ್ಟೇ ಅಲ್ಲ, ನಂತರದಲ್ಲೂ ಇವರನ್ನು ಗುಲಾಮರನ್ನಾಗಿ ಮಾಡಿ ಬೇರೆಕಡೆಗೆ ಮಾರಾಟ ಮಾಡಲಾಗುತ್ತಿತ್ತು.

ಇದನ್ನೂ ಓದಿ:ಅಫ್ಘಾನ್ ನಲ್ಲಿ ನಡೆಯುತ್ತಿರುವ ಘಟನೆಗಳು ಮನುಷ್ಯರು ತಲೆತಗ್ಗಿಸುವಂತಿದೆ: ಈಶ್ವರಪ್ಪ

ತಾಲಿಬಾನಿಗಳ ಕಾಲದಲ್ಲಿ

1990ರ ನಂತರದಲ್ಲಿ ಹಜಾರಸ್‌ಗಳ ಮೇಲಿನ ಆಕ್ರಮಣ ಮತ್ತಷ್ಟು ಹೆಚ್ಚಿಗೆಯಾಯಿತು. ತಾಲಿಬಾನ್‌ ಉಗ್ರರೇ ಶಿಯಾಗೆ ಸೇರಿದ ಇವರನ್ನು ಗುರುತಿಸಿ ಹತ್ಯೆ ಮಾಡುತ್ತಿದ್ದರು. 1990ರ ದಶಕದ ಮಧ್ಯಭಾಗದಲ್ಲಿ ಒಮ್ಮೆ ತಾಲಿಬಾನ್‌ ಕಮಾಂಡರ್‌ ಮೌಲಾವಾಯಿ ಮೊಹಮ್ಮದ್‌ ಹನೀಫ್, ಹಜಾರಸ್‌ಗಳು ಮುಸ್ಲಿಮರಲ್ಲ, ನೀವು ಅವರನ್ನುಕೊಲ್ಲಬಹುದು ಎಂದು ತನ್ನ ಸಂಗಡಿಗರಿಗೆ ಹೇಳಿದ್ದ. ಹೀಗಾಗಿಯೇ 1998ರಲ್ಲಿ ಮಝರ್‌ ಐ ಶರೀಫ್ನಲ್ಲಿ ಸಾವಿರಾರು ಹಜಾರಸ್‌ ಜನರನ್ನು ಸಾಮೂಹಿಕವಾಗಿ ಕೊಂದು ಹಾಗಲಾಗಿತ್ತು. ತಾಲಿಬಾನ್‌ ಉಗ್ರರನ್ನು ನಿಯಂತ್ರಣ ಮಾಡಲು ಅಮೆರಿಕ ಸೇನೆಯೇ ಅಫ್ಘಾನಿಸ್ತಾನಕ್ಕೆ ಬಂದು ಆಳ್ವಿಕೆ ಶುರು ಮಾಡಿತ್ತು. ಆದರೆ, ಈ ನಂತರದಲ್ಲೂ ಹಜಾರಸ್‌ಗಳಿಗೆ ನ್ಯಾಯ ಸಿಗಲಿಲ್ಲ. ಈ ಅವಧಿಯಲ್ಲೂ ಇವರ ಮೇಲೆ ಕಿರುಕುಳ ನಡೆಯುತ್ತಲೇ ಇತ್ತು. ಅಂದರೆ, ಐಸಿಸ್‌, ತಾಲಿಬಾನ್‌ ಉಗ್ರರು ಇವರ ಮಸೀದಿಗಳು, ಶಾಲೆಗಳು, ಆಸ್ಪತ್ರೆಗಳನ್ನು ಗುರಿಯಾಗಿ ದಾಳಿ ನಡೆಸುತ್ತಲೇ ಇದ್ದರು. ಕಳೆದ ಮೇನಲ್ಲಷ್ಟೇ ಕಾಬೂಲ್‌ನಲ್ಲಿ ಹಜಾರಸ್‌ಗಳೇ ಹೆಚ್ಚಿನ ಸಂಖ್ಯೆಯಲ್ಲಿ ಇರುವ ದಶ್ತ್ ಇ ಬರ್ಚಿಯಲ್ಲಿ ಬಾಂಬ್‌ ಸ್ಫೋಟವಾಗಿ 60 ಮಂದಿ ಅಸುನೀಗಿದ್ದರು.