ಲುವ್ಯೂ ಮೇಲೆ ದಾಳಿ: 7 ಸಾವು; ಧ್ವಂಸಗೊಂಡ ಮೂರು ಸೇನಾ ಕಟ್ಟಡಗಳು, ನಿರಾಶ್ರಿತರ ತಾಣಗಳು

Team Udayavani, Apr 19, 2022, 7:20 AM IST

ಕೀವ್‌: ಉಕ್ರೇನ್‌ನ ಲುವ್ಯೂನಲ್ಲಿ ಸೋಮ­ವಾರ ರಷ್ಯಾ ಪಡೆಗಳು ನಡೆಸಿದ ಕ್ಷಿಪಣಿ ದಾಳಿಗೆ ಏಳು ನಾಗರಿಕರು ಸಾವನ್ನಪ್ಪಿದ್ದಾರೆ. ಘಟನೆಯಲ್ಲಿ ಎಂಟು ಜನರಿಗೆ ಗಾಯಗಳಾಗಿವೆ.

ನಾಗರಿಕರು ವಾಸ್ತವ್ಯ ಹೂಡಿರುವ ಕಟ್ಟಡಗಳ ಮೇಲೆ ನಡೆಸಲಾದ ದಾಳಿಗಳಲ್ಲಿ ಗಾಯ­ಗೊಂಡವರಲ್ಲಿ ಪುಟ್ಟ ಮಗು­ವೊಂದು ಸೇರಿದ್ದು ಅವರೆಲ್ಲ­ರನ್ನೂ ಸ್ಥಳೀಯ ಆಸ್ಪತ್ರೆಗೆ ಸೇರಿಸ­ಲಾ­ಗಿದೆ.

ರಷ್ಯಾ ಪಡೆಗಳಿಂದ ಉಕ್ರೇನ್‌ ಸೇನೆಗೆ ಸಂಬಂಧಿಸಿದ ಮೂರು ಕಟ್ಟಡಗಳು, ಉಕ್ರೇನ್‌ ನಿರಾಶ್ರಿತ­ರಿಗೆ ಆಶ್ರಯ ಕಲ್ಪಿಸಿದ್ದ ಸ್ಥಳೀಯ ಹೊಟೇಲ್‌ನ ಮೇಲೂ ದಾಳಿ ನಡೆಸಲಾಗಿದೆ.

ಇದನ್ನೂ ಓದಿ:ಛತ್ತೀಸ್‌ಗಢ: ನಕ್ಸಲರ ದಾಳಿಯಲ್ಲಿ ನಾಲ್ವರು ಪೊಲೀಸ್‌ ಸಿಬ್ಬಂದಿಗೆ ಗಾಯ

ರಷ್ಯಾಕ್ಕೆ ಆರ್ಥಿಕ ಸಂಕಷ್ಟ: ಐರೋಪ್ಯ ರಾಷ್ಟ್ರಗಳು, ಅಮೆರಿಕ, ಆಸ್ಟ್ರೇಲಿಯಾ ಸೇರಿ­ದಂತೆ ಜಗತ್ತಿನ ಹಲವಾರು ರಾಷ್ಟ್ರಗಳು ಹೇರಿರುವ ಆರ್ಥಿಕ ದಿಗ್ಬಂಧನ­ದಿಂದಾಗಿ ರಷ್ಯಾವು 1994ರ ಅನಂತರ ಕಂಡ ತೀವ್ರ ತೆರನಾದ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ ಎಂದು ಖುದ್ದು ರಷ್ಯಾವೇ ಹೇಳಿದೆ. ಖರ್ಚು ವೆಚ್ಚ ಹೊಂದಾ­­ಣಿಕೆಗಾಗಿ ಬ್ಯಾಂಕುಗಳ ಠೇವಣಿ ಮೇಲಿನ ಬಡ್ಡಿ ದರ ಇಳಿಸುವುದಾಗಿ ಹೇಳಿದೆ.

ಸಹಾಯ ಘೋಷಣೆ ನಿರೀಕ್ಷೆ : ಉಕ್ರೇನ್‌ನ ಮರುನಿರ್ಮಾಣಕ್ಕಾಗಿ ಹಾಗೂ ಅಲ್ಲಿನ ಜನರಿಗೆ ಮೂಲಸೌಕರ್ಯ ಗಳನ್ನು ಕಲ್ಪಿಸ­ಲಿಕ್ಕಾಗಿ ವಿಶ್ವಸಂಸ್ಥೆಯ “ಮಲ್ಟಿ ಡೋನರ್‌ ನಿಧಿ’ಯಿಂದ ಉಕ್ರೇನ್‌ಗೆ ದೇಣಿಗೆ ನೀಡುವ ಸಂಬಂಧ ಶೀಘ್ರವೇ ಘೋಷಣೆ ಮಾಡಲಾಗುತ್ತದೆ ಎಂದಿದೆ ವಿಶ್ವಸಂಸ್ಥೆ.