Paris Olympics: ಇಂದು ಕುಸ್ತಿ ಆರಂಭ

Team Udayavani, Aug 5, 2024, 5:55 AM IST

ಪ್ಯಾರಿಸ್‌: ಪ್ಯಾರಿಸ್‌ ಒಲಿಂಪಿಕ್ಸ್‌ನ ಕುಸ್ತಿ ಸ್ಪರ್ಧೆಗಳು ಸೋಮವಾರದಿಂದ ಆರಂಭಗೊಳ್ಳಲಿವೆ. ಭಾರತದ ಕುಸ್ತಿ ತಂಡದ ಪುರುಷರ ವಿಭಾಗದಲ್ಲಿ ಅಮನ್‌ ಸೆಹ್ರಾವತ್‌ (57 ಕೆಜಿ) ಮತ್ತು ಮಹಿಳಾ ತಂಡದಲ್ಲಿ ವಿನೇಶ್‌ ಫೊಗಟ್‌ (50 ಕೆಜಿ), ಅಂತಿಮ್‌ ಪಂಗಲ್‌ (53 ಕೆಜಿ), ಅಂಶು ಮಲಿಕ್‌ (57 ಕೆಜಿ), ನಿಶಾ ದಹಿಯಾ (68 ಕೆಜಿ), ರೀತಿಕಾ ಹೂಡಾ (76 ಕೆಜಿ)ಕಣಕ್ಕಿಳಿಯಲಿದ್ದಾರೆ. ಇದರಲ್ಲಿ 2 ಬಾರಿಯ ಒಲಿಂಪಿಯನ್‌ ವಿನೇಶ್‌ ಮೇಲೆ ನಿರೀಕ್ಷೆ ಹೆಚ್ಚಿದೆ.

2016ರ ರಿಯೋ ಒಲಿಂಪಿಕ್ಸ್‌ನಲ್ಲಿ ಕಾಲು ಮುರಿತಕ್ಕೊಳಗಾಗಿ ವಾಪಸ್ಸಾಗಿದ್ದ ವಿನೇಶ್‌, 2021ರ ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಕ್ವಾರ್ಟರ್‌ ಫೈನಲ್‌ನಲ್ಲಿ ನಿರಾಸೆ ಅನುಭವಿಸಿದ್ದರು. ಈ ಬಾರಿ, ಕುಸ್ತಿ ಸಂಸ್ಥೆಯ ಮುಖ್ಯಸ್ಥ ಬ್ರಿಜ್‌ಭೂಷಣ್‌ ಶರಣ್‌ ಸಿಂಗ್‌ ವಿರುದ್ಧ ಲೈಂಗಿಕ ದೌರ್ಜನ್ಯದ ಆರೋಪ ಹೊರಿಸಿದ್ದರು. ಈ ಬಗ್ಗೆ ಹೊಸದಿಲ್ಲಿಯಲ್ಲಿ ನಡೆದ ಪ್ರತಿಭಟನೆಯ ವೇಳೆ ಹಲವಾರು ದಿನ ಬೀದಿಯಲ್ಲೇ ಮಲಗುವ ಪರಿಸ್ಥಿತಿ ಎದುರಾಗಿತ್ತು. ಹೀಗೆ, ಸಂಕಷ್ಟಗಳ ಸಾಲುಗಳನ್ನು ದಾಟಿ ಬಂದಿರುವ ವಿನೇಶ್‌ಗೆ ಪ್ಯಾರಿಸ್‌ನಲ್ಲಿ ಪದಕ ಗೆದ್ದು ಮಿಂಚುವ ಅವಕಾಶ ಬಂದೊದಗಿದೆ. ಕಳೆದ ಒಲಿಂಪಿಕ್ಸ್‌ನಲ್ಲಿ 53 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ್ದ ವಿನೇಶ್‌, ಈ ಬಾರಿ 50 ಕೆಜಿ ವಿಭಾಗದಲ್ಲಿ ಕಣಕ್ಕಿಳಿಯಲಿದ್ದಾರೆ.

ಸೋಮವಾರ ನಡೆಯುವ ಮಹಿಳೆಯರ 68 ಕೆಜಿ ಫ್ರೀಸ್ಟೈಲ್‌ನಲ್ಲಿ ನಿಶಾ ದಹಿಯಾ ಭಾರತ ಪರ ಸ್ಪರ್ಧೆ ಆರಂಭಿಸಲಿದ್ದಾರೆ. ಉಳಿದವರ ಸ್ಪರ್ಧೆಗಳು ಆ. 7ರಿಂದ ನಡೆಯಲಿವೆ.