ಇಂದಿನ ಗ್ರಹಬಲ :ವೃತ್ತಿರಂಗದಲ್ಲಿ ಯಾರದೋ ತಪ್ಪಿಗೆ ದಂಡ ತೆರಬೇಕಾದ ಪ್ರಸಂಗ ಕಂಡುಬಂದೀತು!

Team Udayavani, Apr 3, 2021, 7:39 AM IST

03-04-2021

ಮೇಷ: ಸಾಮಾಜಿಕರಂಗದಲ್ಲಿ ದುಷ್ಟ ವೈರಿಗಳು ಸಾಧುತನದ ಸೋಗು ಹಾಕಿ ಎಡೆಬಿಡದೆ ಪೀಡೆ ನೀಡಿಯಾರು. ಜಾಗ್ರತೆ ವಹಿಸಿರಿ. ಅನಂತರ ಪಶ್ಚಾತ್ತಾಪಕ್ಕೆ ಒಳಗಾಗದಿರಿ. ಸಾಂಸಾರಿಕವಾಗಿ ಸುಖದುಃಖ ಸಮ್ಮಿಶ್ರ ಫ‌ಲ ತೋರಲಿದೆ.

ವೃಷಭ: ವ್ಯಾಪಾರ, ವ್ಯವಹಾರಗಳಲ್ಲಿ ಲಾಭಾಂಶ ಕಡಿಮೆಯಾದರೂ ನಷ್ಟವಾಗಲಾರದು. ವೃತ್ತಿರಂಗದಲ್ಲಿ ಉನ್ನತಿ ತೋರಿ ಬಂದರೂ ವಿಘ್ನ ಭೀತಿ ಇದೆ. ಒಳಗೊಳಗೇ ಕತ್ತಿ ಮಸೆಯುವ ವೈರಿಗಳು ನಿಮ್ಮ ಅಭಿವೃದ್ಧಿಯಲ್ಲಿ ಅಡ್ಡ ಕಾಲಿಟ್ಟರು.ಜಾಗ್ರತೆ.

ಮಿಥುನ: ವಿದ್ಯಾರ್ಥಿಗಳ ಪ್ರಯತ್ನಬಲಕ್ಕೆ ಉನ್ನತ ವಿದ್ಯಾಭ್ಯಾಸದ ಅವಕಾಶಗಳು ಕಂಡುಬಂದಾವು. ದೇಹಾರೋಗ್ಯದ ಬಗ್ಗೆ ಉದಾಸೀನತೆ ಸಲ್ಲದು. ಹಾಗೇ ಹಣಕಾಸಿನ ವಿಚಾರದಲ್ಲಿ ಮನಸ್ತಾಪವಾಗದಂತೆ ಜಾಗ್ರತೆ ವಹಿಸಿದರೆ ಒಳ್ಳೆಯದು.

ಕರ್ಕ: ಹಣಕಾಸಿನ ವಿಚಾರದಲ್ಲಿ ಮನಸ್ತಾಪಕ್ಕೆ ಕಾರಣವಾಗದಂತೆ ಜಾಗ್ರತೆ ಮಾಡಿರಿ. ವಿವಾಹಾಪೇಕ್ಷಿಗಳಿಗೆ ವೈವಾಹಿಕ ಸಂಬಂಧಗಳು ಹುಡುಕಿ ಬಂದಾವು. ಉದ್ಯೋಗದಲ್ಲಿ ಆರ್ಥಿಕವಾಗಿ ಅಡಚಣೆಗಳು ಎದುರಾಗಲಿದೆ.

ಸಿಂಹ: ನಿಮ್ಮ ಆತ್ಮವಿಶ್ವಾಸ, ಧೈರ್ಯಬಲದಿಂದ ಮುನ್ನಡೆಯಲು ನಿಮಗೆ ಸಾಧ್ಯವಿದೆ. ಸಾಂಸಾರಿಕವಾಗಿ ಕೂಡಾ ಅಸಮಾಧಾನದ ವಾತಾವರಣದಿಂದ ಕಿರಿಕಿರಿಯೆನಿಸಲಿದೆ. ಸ್ಥಳ, ನಿವೇಶನಕ್ಕೆ ಸಂಬಂಧಿಸಿ ದಂತೆ ಆರ್ಥಿಕವಾಗಿ ಋಣಭಾದೆ ಕಂಡು ಬರಲಿದೆ.

ಕನ್ಯಾ: ಮನೆಮಂದಿಗೆಲ್ಲಾ ನಿಮ್ಮ ಸಿಡುಕುತನ ವರ್ತನೆಯ ಪರಿಣಾಮ ಬೀರಲಿದೆ. ಮಹತ್ಕಾರ್ಯ ಸಾಧನೆ ಕೈಖಾಲಿಯಾಗಲಿದೆ. ವೃತ್ತಿರಂಗದಲ್ಲಿ ಯಾರದೋ ತಪ್ಪಿಗೆ ದಂಡ ತೆರಬೇಕಾದ ಪ್ರಸಂಗ ಕಂಡುಬಂದೀತು. ಆಲೋಚಿಸಿ ಮುನ್ನಡೆಯಿರಿ.

ತುಲಾ:ಉದ್ಯೋಗದಲ್ಲಿ ನಿಮ್ಮ ಭಡ್ತಿಯ ವಿಚಾರ ಹಿಂದೆ ಹೋದೀತು ಆರೋಗ್ಯದ ದೃಷ್ಟಿಯಲ್ಲಿ ಹೆಚ್ಚಿನ ಗಮನವಿರಲಿ. ವ್ಯಾಪಾರ, ವ್ಯವಹಾರಗಳಲ್ಲಿ ಆರ್ಥಿಕವಾಗಿ ಕಷ್ಟನಷ್ಟಗಳು ಕಂಡು ಬರಲಿದೆ. ಅವಿವಾಹಿತರ ವಿವಾಹಕ್ಕೆ ಅಡ್ಡಿ ಆತಂಕ ಎದುರಾಗಲಿದೆ.

ವೃಶ್ಚಿಕ: ಹಿರಿಯರ ಕ್ಲೇಶದಿಂದಾಗಿ ದುಃಖವು ಕಂಡುಬಂದೀತು. ದಾಯಾದಿಗಳ ವಿವಾದ ನ್ಯಾಯಾಲಯದ ಮೆಟ್ಟಿಲು ಏರಲಿದೆ. ಮಕ್ಕಳ ವಿದ್ಯಾಭ್ಯಾಸಕ್ಕಾಗಿ ಹೆಚ್ಚಿನ ಖರ್ಚುವೆಚ್ಚ ತಲೆದೋರಲಿದೆ. ನಿರೀಕ್ಷಿತ ಕೆಲಸ ಕಾರ್ಯಗಳು ನಿಧಾನವಾಗಿ ಕೈಗೂಡಲಿದೆ.

ಧನು: ಉದ್ಯೋಗಿಗಳಿಗೆ ಕೈತುಂಬಾ ಕೆಲಸ ಇದ್ದೀತು. ವಿತ್ತಖಾತೆಯ ಉದ್ಯೋಗಿಗಳಿಗೆ ಮುಂಭಡ್ತಿಯ ಅವಕಾಶ ವಿರುತ್ತದೆ. ಮನೆಯಲ್ಲಿ ಶುಭಮಂಗಲ ಕಾರ್ಯಕ್ಕಾಗಿ ಓಡಾಟ ಒದಗಿ ಬರಲಿದೆ. ಈ ಸಮಯದಲ್ಲಿ ಬಂದ ಅವಕಾಶ ಸದುಪಯೋಗಿಸಿರಿ.

ಮಕರ: ಉತ್ತಮ ನಡತೆ, ಸದಾಚಾರ, ದೃಢ ಮನಸ್ಸಿನಿಂದ ಮುಂದುವರಿದಲ್ಲಿ ನಿಮ್ಮ ಕೈ ಹಿಡಿದ ಕಾರ್ಯಸಫ‌ಲ ವಾಗಲಿದೆ. ಯಾವುದೇ ಕಾರ್ಯಗಳನ್ನು ನೋಡುವುದಾದರೆ ಯೋಚಿಸಿ, ಚಿಂತಿಸಿ ಮುನ್ನಡೆಯುವುದು ಅಗತ್ಯವಾಗಿದೆ. ಜಾಗ್ರತೆ ಇರಲಿ.

ಕುಂಭ: ಆರ್ಥಿಕವಾಗಿ ಅಧಿಕ ರೂಪದಲ್ಲಿ ಖರ್ಚುಗಳು ಬರುವುದರಿಂದ ಆದಷ್ಟು ಜಾಗ್ರತೆ ಮಾಡಬೇಕಾಗುತ್ತದೆ. ಈ ಮಧ್ಯೆ ಆಕರ್ಷಕವಾದ ದುಡಿಮೆಗೆ, ನಿಮ್ಮ ಪ್ರಯತ್ನಬಲಕ್ಕೆ , ಕ್ರಿಯಾಶೀಲತೆ ಕೂಡ ಪೂರಕವಾಗಿದೆ. ಅದಮ್ಯ ಉತ್ಸಾಹ ನಿಮ್ಮದು.

ಮೀನ: ವಿದ್ಯಾರ್ಥಿಗಳಿಗೆ ವಿದ್ಯಾರ್ಜನೆಗಾಗಿ ದೂರ ಪ್ರಯಾಣವು ತೋರಿ ಬರುವುದು. ಅಜೀರ್ಣದ ಉಪದ್ರವ, ಬೆನ್ನುನೋವಿನ ಸಮಸ್ಯೆಗಳು ಕಂಡುಬರಲಿದೆ. ವ್ಯಾಪಾರ, ವ್ಯವಹಾರದಲ್ಲಿ ಚೇತರಿಕೆ ಇದ್ದರೂ ಸ್ಪರ್ಧಾತ್ಮಕ ರೀತಿ ಆತಂಕ ತರಲಿದೆ.

ಎನ್‌.ಎಸ್‌. ಭಟ್‌