ಇಂದಿನ ಗ್ರಹಬಲ: ಈ ರಾಶಿಯವರಿಗೆ ಹಿತಶತ್ರುಗಳ ಸಮಯಸಾಧಕತನ ಆಗಾಗ ಘಾಸಿಗೊಳಿಸಲಿದೆ!

Team Udayavani, Apr 8, 2021, 7:42 AM IST

08-04-2021

ಮೇಷ: ಮಾನಸಿಕವಾಗಿ ಹಾಗೂ ದೈಹಿಕವಾಗಿ ಆಗಾಗ ವ್ಯಾಕುಲತೆ ಹಾಗೂ ಉದ್ವೇಗದಿಂದ ಕ್ಷುಲ್ಲಕ ವಿಚಾರಗಳು ತೋರಿಬಂದು ಅಸಮಾಧಾನ ಹೊಂದುವಿರಿ. ನೂತನ ಕಾರ್ಯಾರಂಭ ಯಾ ವ್ಯಾಪಾರ, ವ್ಯವಹಾರದ ಚಿಂತೆ ಬೇಡ.

ವೃಷಭ: ನೂತನ ಕಾರ್ಯಾರಂಭ, ವ್ಯಾಪಾರ, ವ್ಯವಹಾರಗಳ ಚಿಂತನೆ ಕಾರ್ಯಗತವಾಗುತ್ತದೆ. ಸಾಂಸಾರಿಕವಾಗಿ ಗೃಹಿಣಿಯ ಸಹಕಾರ ಸುಪ್ರಸನ್ನತೆ ಹಾಗೂ ಸುಖಶಾಂತಿ ಅನುಭವಕ್ಕೆ ಬರುತ್ತದೆ. ನಿಮ್ಮ ಚಿಂತೆ ಧನಾತ್ಮಕವಾಗಿರಲಿ.

ಮಿಥುನ: ವಿದ್ಯಾರ್ಥಿಗಳ ಮನೋಕಾಮನೆಗಳು ಪೂರ್ಣಗೊಂಡಾವು. ಆರ್ಥಿಕವಾಗಿ ಎಷ್ಟೇ ಖರ್ಚು-ವೆಚ್ಚ ಗಳಿದ್ದರೂ ನಿರಂತರ ಧನಾಗಮನದಿಂದ ತೊಂದರೆ ಇರದು. ಧನಾಗಮನಕ್ಕೆ ವಿಪುಲ ಅವಕಾಶಗಳಿಗೂ ಕಠಿಣ ಪ್ರಯತ್ನ ಅಗತ್ಯ.

ಕರ್ಕ: ನಿಮ್ಮ ಆತ್ಮವಿಶ್ವಾಸ, ಪ್ರಯತ್ನಬಲದಿಂದ ನೀವು ಮುಂದೆ ಬರಲಿದ್ದೀರಿ. ಗೃಹದಲ್ಲಿ ಮಂಗಲಕಾರ್ಯಗಳ ಮಾತುಕತೆಗಳು ಫ‌ಲ ನೀಡಲಿದೆ. ಆರೋಗ್ಯವನ್ನು ಕಾಪಾಡಿಕೊಳ್ಳುವುದರ ಬಗ್ಗೆ ನಿರ್ಲಕ್ಷ್ಯ ತೋರದಿದ್ದರೆ ಒಳ್ಳೆಯದು.

ಸಿಂಹ: ಮಾತು ಕಡಿಮೆ ಮಾಡಿ ಕಾರ್ಯದತ್ತ ಗಮನಹರಿಸಿರಿ. ವೃತ್ತಿರಂಗದಲ್ಲಿ ಸಹೋದ್ಯೋಗಿಗಳ ಸಹಯೋಗದಿಂದ ಮುಂದುವರಿಯಿರಿ. ಹಿತಶತ್ರುಗಳ ಸಮಯಸಾಧಕತನ ಆಗಾಗ ಘಾಸಿಗೊಳಿಸಲಿದೆ. ಶುಭವಿದೆ.

ಕನ್ಯಾ: ತಾಳ್ಮೆ ಸಹನೆಯಿಂದ ಮುಂದುವರಿದಲ್ಲಿ ಮುನ್ನಡೆಗೆ ಸಾಧಕವಾಗುತ್ತದೆ. ಆಗಾಗ ಆರ್ಥಿಕವಾಗಿ ಹಿನ್ನಡೆಯನ್ನು ಅನುಭವಿಸಬೇಕಾಗುತ್ತದೆ. ಋಣಭಾದೆಯು ಕಾಡಲಿದೆ. ಕೆಲವೊಂದು ಬಹಿರಂಗಗೊಂಡು ರಾದ್ಧಾಂತವಾದೀತು.

ತುಲಾ: ಪಿತ್ತ ವಾಯುಪ್ರಕೋಪದಿಂದ ಅನಾರೋಗ್ಯ ಕಾಡಬಹುದು. ರಾಜಕೀಯದವರಿಗೆ ಉನ್ನತ ಸ್ಥಾನಮಾನವು ದೊರಕೀತು. ಪ್ರಯತ್ನಿಸಿರಿ. ವ್ಯಾಪಾರಿ ವರ್ಗದವರಿಗೆ ಚೇತರಿಕೆಯ ದಿನಗಳಿವು. ಸ್ವಂತ ದುಡಿಮೆಯವರಿಗೆ ಜಾಗ್ರತೆ.

ವೃಶ್ಚಿಕ: ಅನಿರೀಕ್ಷಿತ ಕಾರ್ಯಸಾಧನೆ ನಿಮಗೆ ಅಚ್ಚರಿ ತರಲಿದೆ. ಅವಿವಾಹಿತರ ವೈವಾಹಿಕ ಸಂಘಟನೆಗೆ ಪೂರಕವಾದ ಪ್ರಚೋದನೆ ಲಭಿಸೀತು. ಆಕಸ್ಮಿಕ ಧನಾನುಕೂಲ ಕಂಡುಬಂದೀತು. ನಿರುದ್ಯೋಗಿಗಳಿಗೆ ಉದ್ಯೋಗ ಪ್ರಾಪ್ತಿ.

ಧನು: ವಿದ್ಯಾರ್ಥಿಗಳಿಗೆ ನಿರೀಕ್ಷಿತ ಅವಕಾಶಗಳು ಮುನ್ನಡೆಗೆ ಸಾಧಕವಾಗುತ್ತದೆ. ಆಗಾಗ ಅಡೆತಡೆಗಳು ಕಂಡುಬಂದರೂ ಬೇಸರಿಸದಿರಿ. ಪ್ರಯತ್ನಬಲ, ಕಠಿಣ ಶ್ರಮ ನಿಮ್ಮನ್ನು ಗುರಿಯತ್ತ ಸಾಗಿಸಲಿದೆ. ಆರೋಗ್ಯ ಉತ್ತಮ.

ಮಕರ: ಸದಾಕಾಲವೂ ಕಾರ್ಯಪ್ರವೃತ್ತರಾಗಿ ದುಡಿಯುತ್ತಿರುವ ನಿಮಗೆ ಉತ್ತಮ ಫ‌ಲಗಳು ಗೋಚರಕ್ಕೆ ಬರುತ್ತವೆ. ದೈಹಿಕ ಆರೋಗ್ಯವು ತೃಪ್ತಿಕರವಾಗಿದ್ದರೂ ಜಾಗ್ರತೆ ಬೇಕೇಬೇಕು. ಉದ್ಯೋಗದಲ್ಲಿ ಎಡರುತೊಡರು ಕಂಡುಬಂದೀತು.

ಕುಂಭ: ಎಷ್ಟೇ ಕಿರಿಕಿರಿ ಉಂಟಾದರೂ ಸನ್ಮಿತ್ರರ ಸಹಕಾರಗಳಿಂದ ಪ್ರಗತಿ, ಸಮಾಧಾನಗಳು ದೊರಕಲಿದೆ. ಸಾಂಸಾರಿಕವಾಗಿ ಅಂತರಿಕ ಸ್ಥಿತಿಗತಿಗಳು ನಿರೀಕ್ಷಿತ ರೀತಿಯಲ್ಲಿ ಸಮಾಧಾನ ತಂದುಕೊಡಲಿದೆ. ಅತಿಥಿಗಳ ಆಗಮನವಿದೆ.

ಮೀನ: ಕೆಲವೊಂದು ವಿಚಾರಗಳು ನಿಮ್ಮ ಮಾನಸಿಕ ಸ್ಥಿತಿಯನ್ನು ಕೆಡಿಸಲಿದೆ. ಆದರೂ ಆರ್ಥಿಕವಾಗಿ ಅಭಿವೃದ್ಧಿ ಕಂಡುಬರುವುದು. ಅತೀ ಖರ್ಚು ಕಂಡುಬರುವುದು. ಅವಿವಾಹಿತರ ಮನೋಕಾಮನೆಗಳು ಪೂರ್ಣವಾದೀತು.

ಎನ್‌.ಎಸ್‌. ಭಟ್‌