ಅಲಾಯ್‌ ವೀಲ್‌ ನಿರ್ವಹಣೆ ಹೇಗೆ? 

Team Udayavani, Feb 1, 2019, 7:54 AM IST

ಬೈಕ್‌ಗಳಲ್ಲಿ ಅಲಾಯ್‌ ವೀಲ್‌ ಮತ್ತು ರಿಮ್‌ಗಳೆಂಬ ಎರಡು ಮಾದರಿಗಳಲ್ಲಿ ವೀಲ್‌ ರಿಮ್‌ಗಳು ಬರುತ್ತವೆ. ಅಲಾಯ್‌ ವೀಲ್‌ ಈಗಿನ ತಲೆಮಾರಿನ ಬೈಕ್‌ಗಳಲ್ಲಿ ಸಾಮಾನ್ಯವಾಗಿದ್ದು, ಹೆಚ್ಚು ಮೈಲೇಜ್‌, ಬಾಳಿಕೆಗೆ ಪ್ರಸಿದ್ಧವಾಗಿವೆ. ಆದರೂ ಇವುಗಳ ನಿರ್ವಹಣೆ ಅಗತ್ಯ. ಈ ಹಿನ್ನೆಲೆಯಲ್ಲಿ ಅಲಾಯ್‌ ವೀಲ್‌ ವಿಶೇಷತೆಯೇನು? ನಿರ್ವಹಣೆ ಹೇಗೆ ಎಂಬುದರ ಬಗ್ಗೆ ನೋಡೋಣ.

ಅಲಾಯ್‌ ವೀಲ್‌ಗ‌ಳು ಮೆಗ್ನೀಶಿಯಂನ ಮಿಶ್ರಣದಿಂದ ನಿರ್ಮಾಣ ಮಾಡಿದರೆ, ರಿಮ್‌ ವೀಲ್‌ಗ‌ಳು ಅಲ್ಯುಮೀನಿಯಂನಿಂದ ಮಾಡಲಾಗುತ್ತದೆ. ಅಲಾಯ್‌ ವೀಲ್‌ಗ‌ಳು ಕಡಿಮೆ ಭಾರ ಮತ್ತು ಹೆಚ್ಚು ಕಾರ್ಯಕ್ಷಮತೆಯುಳ್ಳವು. ಟ್ಯೂಬ್‌ಲೆಸ್‌ ಟಯರ್‌ಗಳಿಗೆ ಇವುಗಳು ಉತ್ತಮ. ಆಫ್ರೋಡ್‌ಗೆ ಬಳಸುವ ಬೈಕ್‌ಗಳಿಗೆ, ಟೂರಿಂಗ್‌ ಬೈಕ್‌ಗಳಿಗೆ ರಿಮ್‌ ವೀಲ್‌ ಬಳಸುತ್ತಾರೆ. ಇವುಗಳು ಹೆಚ್ಚು ಭಾರ ಮತ್ತು ಕಠಿನ ರಸ್ತೆಗಳಲ್ಲೂ ಬಾಳಿಕೆ ಬರಬಲ್ಲವು.

ಅಲಾಯ್‌ನಿಂದ ಟಯರ್‌ ತೆಗೆಯದಿರಿ: ಅಲಾಯ್‌ ವೀಲ್‌ಗ‌ಳಲ್ಲಿರುವ ಟ್ಯೂಬ್‌ ಲೆಸ್‌ ಟಯರ್‌ ನಿರ್ವಹಣೆಯೂ ಸುಲಭ. ಪಂಕ್ಚರ್‌ ಆದರೆ ವೀಲ್‌ ಅನ್ನು ತೆಗೆಯದೆ ಅಲ್ಲೇ ಪಂಕ್ಚರ್‌ ಹಾಕಲು ಸಾಧ್ಯವಿದೆ. ಒಂದು ವೇಳೆ ಆಗಾಗ್ಗೆ ಟಯರ್‌ ಅನ್ನು ತೆಗೆದು ಪಂಕ್ಚರ್‌ ಹಾಕುತ್ತೀರಾದರೆ, ಇದರಿಂದ ಅಲಾಯ್‌ಗೆ ಹಾನಿಯಾಗುವ ಸಾಧ್ಯತೆ ಇದೆ. ಒಂದು ವೇಳೆ ಅಲಾಯ್‌ ವೀಲ್‌ ಬೆಂಡ್‌ ಬಂದರೆ ಅದನ್ನು ರಿಪೇರಿ ಮಾಡಿಸುವುದು ಸುಲಭವಲ್ಲ.

ಪ್ರಶರ್‌ ಸರಿಯಾಗಿಡಿ
ಅಲಾಯ್‌ ವೀಲ್‌ಗ‌ಳಲ್ಲಿ ಏರ್‌ ಪ್ರಶರ್‌ ಸರಿಯಾಗಿಡಬೇಕು. ತುಸು ಕಡಿಮೆಯಾದರೆ, ಅದರಿಂದ ವೀಲ್‌ ಗೆ ಹಾನಿಯಾಗುತ್ತದೆ. ಸುಗಮ ಚಾಲನೆಗೆ ಅಲಾಯ್‌ಗೆ ನೈಟ್ರೋಜನ್‌ ಹಾಕಿಸುವುದು ಪರಿಣಾಮಕಾರಿ.

ಸುತ್ತಿಗೆ ಬಳಸಬೇಡಿ
ಒಂದು ವೇಳೆ ಅಲಾಯ್‌ನಿಂದ ಟಯರ್‌ ತೆಗೆಯಬೇಕು ಎಂದಿದ್ದರೆ ಸುತ್ತಿಗೆ ಅಥವಾ ಹೊಡೆಯುವ ವಸ್ತು ಬಳಸಿ ಟಯರ್‌ ಕೀಳದಿರಿ.

ಕಡಿಮೆ ಸುತ್ತಳತೆಯ ಟಯರ್‌ ಬೇಡ
ಸುಂದರವಾಗಿ ಕಾಣುತ್ತದೆ ಎಂದು ಕಡಿಮೆ ಸುತ್ತಳತೆಯ ಟಯರ್‌ ಅನ್ನು ಅಲಾಯ್‌ ರಿಮ್‌ಗೆ ಅಳವಡಿಸಬಾರದು. ಇದರಿಂದ ಅಲಾಯ್‌ ಬದಿಗೆ ಒತ್ತಡ ಬಿದ್ದು ಹಾನಿಯಾಗುತ್ತದೆ.

ಹೊಂಡಗುಂಡಿಯಲ್ಲಿ ಜಾಗ್ರತೆ
ಹೊಂಡ ಗುಂಡಿಯ ರಸ್ತೆಯಲ್ಲಿ ಚಾಲನೆ ವೇಳೆ ತುಸು ಜಾಗರೂಕರಾಗುವುದು ಒಳ್ಳೆಯದು. ಒಂದು ವೇಳೆ ಅಲಾಯ್‌ ರಿಮ್‌ನ ಬದಿಗಳಿಗೆ ಹಾನಿಯಾದರೆ ಬೇಗನೆ ಬೆಂಡ್‌ ಬರುವ, ಗಾಳಿ ಕಡಿಮೆಯಾಗಿದ್ದರೆ ಹಾನಿಯಾಗುವ ಸಾಧ್ಯತೆ ಹೆಚ್ಚಿರುತ್ತದೆ.

ಅಲಾಯ್‌ಗೆ ಡಿಸ್ಕ್ ಬೆಸ್ಟ್‌
ಅಲಾಯ್‌ ರಿಮ್‌ ಇರುವ ಬೈಕ್‌ ಖರೀದಿಸುತ್ತೀರಿ ಎಂದಾದರೆ, ಡಿಸ್ಕ್ ಇರುವ ಬೈಕ್‌ ಅನ್ನೇ ಖರೀದಿಸಿ. ಅಲಾಯ್‌ ರಿಮ್‌ನ ಬೇಸ್‌ನಲ್ಲೇ ಡ್ರಮ್‌ ಇರುವುದರಿಂದ ಇದಕ್ಕೆ ಹಾನಿಯಾದರೆ, ಅಲಾಯ್‌ ರಿಮ್‌ಗೂ ಹಾನಿಯಾಗುತ್ತದೆ. ಆದರೆ ಡಿಸ್ಕ್ ನಲ್ಲಿ ಹೀಗಾಗಲು ಸಾಧ್ಯವಿಲ್ಲ.

ಆಫ್ರೋಡ್‌ಗೆ ಸೂಕ್ತವಲ್ಲ
ಕಡಿದಾದ ಮಣ್ಣಿನ ಮಾರ್ಗ, ಗುಡ್ಡ ಬೆಟ್ಟಗಳಲ್ಲಿ ಚಾಲನೆಗೆ ಅಲಾಯ್‌ರಿಮ್‌ಗಳು ಸೂಕ್ತವಲ್ಲ. ರಸ್ತೆ ಬದಿಯಲ್ಲಿರುವ ಕಲ್ಲುಗಳು ತಾಗಿದರೆ ಇದಕ್ಕೆ ಹಾನಿಯಾಗುತ್ತದೆ. ಜತೆಗೆ ತೀರಾ ಒತ್ತಡ ಸಹಿಸುವುದು ಕಷ್ಟ. ಆದ್ದರಿಂದ ಇಂತಹ ಮಾರ್ಗಗಳಲ್ಲಿ ಬಳಕೆ ಕಡಿಮೆ ಮಾಡಬೇಕು.

  ಈಶ