ಬೈಸಿಕಲ್‌ ಫ್ರೆಂಡ್ಲಿ ಬ್ಯುಸಿನೆಸ್‌ ಡಿಸ್ಟ್ರಿಕ್‌ ಮಂಗಳೂರಿಗೂ ಬರಲಿ

Team Udayavani, Jan 20, 2019, 7:50 AM IST

ಒಂದು ನಗರ, ಅಲ್ಲಿ ಹೆಚ್ಚಾಗಿ ಎಲ್ಲರೂ ಸೈಕಲ್‌ ಗಳಲ್ಲೇ ಓಡಾಡುತ್ತಾರೆ ಎಂದಾದರೆ ಏನೋ ವಿಶೇಷ ಎಂದೆನಿಸದೇ ಇರದು. ಆದರೆ ಅಮೆರಿಕಾದ ಕ್ಯಾಲಿ ಫೋರ್ನಿಯಾದಲ್ಲಿರುವ ನಗರವೊಂದರಲ್ಲಿ ಜನರು ಹೆಚ್ಚಾಗಿ ಸೈಕಲ್‌ ನಲ್ಲೇ ನಿತ್ಯವೂ ಓಡಾಡುತ್ತಾರೆ. ಇದು ಅವರಿಗೆ ಸಾಕಷ್ಟು ಲಾಭವನ್ನೂ ತಂದುಕೊಡುತ್ತಿದೆ.

ಪರಿಸರ ಮಾಲಿನ್ಯ ತಡೆಗಟ್ಟುವ ನಿಟ್ಟಿನಲ್ಲಿ ನಾವು ಒಂದೆರಡು ದಿನ ಕಾರು, ಬೈಕ್‌ ಬಿಟ್ಟು ಓಡಾಡಬಹುದು. ಆದರೆ ವರ್ಷ ಪೂರ್ತಿ ಈ ರೀತಿ ಇರಲು ನಮ್ಮಿಂದ ಸಾಧ್ಯವೇ ಇಲ್ಲ. ಆದರೆ ಕ್ಯಾಲಿಫೋರ್ನಿಯಾದ ಜನರು ಬೈಸಿಕಲ್‌ ನಲ್ಲೇ ಹೆಚ್ಚಾಗಿ ತಿರುಗಾಡುವ ಮೂಲಕ ತಮ್ಮ ಪರಿಸರ ಪ್ರೇಮವನ್ನು ತೋರ್ಪಡಿಸಿದ್ದಾರೆ. ಜತೆಗೆ ಅಲ್ಲಿನ ಕೆಲವೊಂದು ಸಂಸ್ಥೆಗಳು ಇದಕ್ಕೆ ಉತ್ತೇಜನವನ್ನೂ ಕೊಡುತ್ತಿವೆ.

ಏನಿದು ಬೈಸಿಕಲ್‌ ಫ್ರೆಂಡ್ಲಿ ಡಿಸ್ಟ್ರಿಕ್‌?
ಸೈಕಲ್‌ ಕಂಪೆನಿಗಳು ಗ್ರಾಹಕರನ್ನು ಉತ್ತೇಜಿಸುವ ಸಲುವಾಗಿ ಹಾಕಿಕೊಂಡ ಬೈಸಿಕಲ್‌ ಫ್ರೆಂಡ್ಲಿ ಡಿಸ್ಟ್ರಿಕ್‌ ಯೋಜನೆ ಪರಿಸರ ಸ್ನೇಹಿಯಾಗಿದೆ. ಯಾರಾದರೂ ಸೈಕಲ್‌ ತೆಗೆದು ಕೊಂಡರೆ ಆತನಿಗೆ ಕೆಲವೊಂದು ವಿಶೇಷ ಆಫ‌ರ್‌ ಗಳನ್ನು ನೀಡಲಾಗುತ್ತದೆ. ಮುಖ್ಯವಾಗಿ ಆ ನಗರದಲ್ಲಿ ನಡೆಯುವ ಬೀಚ್‌ ಫೆಸ್ಟಿವಲ್‌ ಸಹಿತ ಇನ್ನೂ ಹಲವಾರು ಸಾರ್ವಜನಿಕ ಕಾರ್ಯಕ್ರಗಳಿಗೆ ಉಚಿತ ಪ್ರವೇಶ ಅಥವಾ ದರ ಕಡಿತದ ಆಫ‌ರ್‌ ಕೊಡಲಾಗುತ್ತದೆ. ಅಷ್ಟೇ ಅಲ್ಲದೇ ಕ್ಯಾಲಿಫೋರ್ನಿಯಾದ ಕೆಲವೊಂದು ರೆಸ್ಟೋರೆಂಟ್‌ಗಳಿಗೆ ಸೈಕಲ್‌ ನಲ್ಲಿ ಹೋಗುವುದಾದರೆ ಅಲ್ಲಿಯೂ ದರ ಕಡಿತವಿರುತ್ತದೆ.

ಈ ಕಾರಣದಿಂದಾಗಿ ಅಲ್ಲಿ ಸೈಕಲ್‌ನಲ್ಲೇ ನಗರವನ್ನು ಸುತ್ತು ವವರ ಸಂಖ್ಯೆ ಹೆಚ್ಚಾಗಿದೆ. ಇದರಿಂದಾಗಿ ಅಲ್ಲಿ ವಾಹನಗಳ ದಟ್ಟನೆಯನ್ನು ಕಡಿಮೆಯಾಗಿದೆ. ಜತೆಗೆ ವಾಯು ಮಾಲಿನ್ಯ ತಡೆಗಟ್ಟುವ ನಿಟ್ಟಿನಲ್ಲಿ ಮಹತ್ತರ ಸೇವೆ ಯನ್ನೂ ನೀಡಿದಂತಾಗಿದೆ.

ಮಂಗಳೂರಿನಲ್ಲೂ ಸ್ಥಾಪನೆಯಾಗಲಿ
ಸ್ಮಾರ್ಟ್‌ ನಗರಿಯಾಗಿ ಬೆಳೆಯುತ್ತಿರುವ ಮಂಗಳೂರು ನಗರದಲ್ಲೂ ಬೈಸಿ ಕಲ್‌ ಫ್ರೆಂಡ್ಲಿ ಡಿಸ್ಟ್ರಿಕ್‌ ಗಳು ಸ್ಥಾಪನೆಯಾಗಬೇಕಿದೆ. ನಗರದಲ್ಲಿ ನಡೆಯುವ ವಿವಿಧ ಕಾರ್ಯಕ್ರಮ, ಪ್ರವಾಸಿ ತಾಣ, ಮಾಲ್‌ಗ‌ಳಲ್ಲಿ ಇವರಿಗೆ ವಿಶೇಷ ಕೊಡುಗೆಗಳನ್ನು ನೀಡಬಹುದು.

ಜತೆಗೆ ಪ್ರಸಿದ್ಧ ಹೊಟೇಲ್‌ ಗಳಲ್ಲೂ ರಿಯಾಯಿತಿ ನೀಡಬಹುದು. ಈ ಮೂಲಕ ಮಂಗಳೂರು ನಗರವನ್ನು ಪರಿಸರ ಮಾಲಿನ್ಯ ಮುಕ್ತಗೊಳಿಸಬಹುದು. ಜತೆಗೆ ನಗರರದಲ್ಲಿ ಹೆಚ್ಚುತ್ತಿರುವ ವಾಹನ ದಟ್ಟಣೆಯನ್ನೂ ನಿಯಂತ್ರಿಸಬಹುದು.

 ವಿಶ್ವಾಸ್‌ ಅಡ್ಯಾರ್‌