ಪುರಭವನಕ್ಕೆ ನೇರ ಸಂಚಾರ ವ್ಯವಸ್ಥೆಯಾಗಲಿ

Team Udayavani, Dec 16, 2018, 1:20 PM IST

ಹಲವು ವರ್ಷಗಳ ಹಿಂದೆ ವಾಹನಗಳು ಹಂಪನಕಟ್ಟೆಯಿಂದ ಬಂದು ಕ್ಲಾಕ್‌ ಟವರ್‌ ನಿಂದ ನೇರವಾಗಿ ಟೌನ್‌ ಹಾಲ್‌ಗೆ ಹೋಗಬಹುದಿತ್ತು. ಆದರೆ ಅನಂತರ ಟೌನ್‌ ಹೌಲ್‌ಗೆ ಹೋಗುವುದಿದ್ದರೆ ಮೊದಲು ಸರಕಾರಿ ಬಿ.ಎಡ್‌. ಕಾಲೇಜಿನ ಮುಂಭಾಗದಲ್ಲಿದ್ದ ಗೇಟ್‌ ಮೂಲಕ ತೆರಳಬಹುದಿತ್ತು. ಬಳಿಕ ಈ ಅವಕಾಶವನ್ನು ತೆಗೆದು ಹಾಕಲಾಯಿತು. ಹೀಗಾಗಿ ಪುರಭವನಕ್ಕೆ ತೆರಳುವವರು ಎ.ಬಿ. ಶೆಟ್ಟಿ ಸರ್ಕಲ್‌ ನಿಂದ ಮತ್ತೆ ವಾಪಸ್‌ ಬಂದು ಅಥವಾ ಎಸ್‌ಬಿಐ ಮಾರ್ಕೆಟ್‌ನಿಂದ ಬಂದು ಟೌನ್‌ಹಾಲ್‌ ಮುಂಭಾಗದ ಗೇಟ್‌ನಿಂದ ಒಳ ಬರಬಹುದಿತ್ತು. ಪುರಭವನಕ್ಕೆ ದಾರಿ ಕಲ್ಪಿಸಲು ಹಲವು ಅವಕಾಶಗಳಿರುವಾಗ ಸುತ್ತಿ ಬಳಸಿ ಬರುವ ಆವಶ್ಯಕತೆಯಾದರೂ ಏನು ಎಂಬ ಪ್ರಶ್ನೆ ಇಲ್ಲಿಗೆ ಆಗಮಿಸುವವರಲ್ಲಿ ಮೂಡದೇ ಇರಲಾರದು.

ನಗರದ ಹೃಯದ ಭಾಗದಲ್ಲಿರುವ ಪುರಭವನದಲ್ಲಿ ಮದುವೆ, ನಾಟಕ, ವೈಟ್‌ ಲಿಫ್ಟಿಂಗ್ , ಬಾಡಿ ಬಿಲ್ಡಿಂಗ್‌ ಹೀಗೆ ಹಲವಾರು ಕಾರ್ಯಕ್ರಮಗಳು ದಿನನಿತ್ಯವೂ ನಡೆಯುತ್ತಿರುತ್ತವೆ. ಇಂಥ ಕಾರ್ಯಕ್ರಮಗಳಿಗೆ ನೂರಾರು ವಾಹನಗಳು ಇಲ್ಲಿಗೆ ಬಂದು ಹೋಗುತ್ತವೆ. ಅವುಗಳು ಸುತ್ತಿ ಬಳಸಿಯೇ ಒಳಗೆ ಪ್ರವೇಶಿಸಬೇಕು.

ವಿಪರ್ಯಾಸವೆಂದರೆ ಗಣ್ಯವ್ಯಕ್ತಿಗಳು ಯಾವುದೇ ಸಂಚಾರ ನಿಯಮ ಪಾಲನೆ ಮಾಡದೆ ನೇರವಾಗಿ ಸೆಂಟ್ರಲ್‌ ಟಾಕೀಸ್‌ನ ಮುಂಭಾಗ ರಸ್ತೆಯಿಂದಲೇ ಟೌನ್‌ಹಾಲ್‌ಗೆ ಹೋಗುತ್ತಾರೆ. ಈ ತಾರತಮ್ಯ ಏಕೆ? ಇದು ದೊಡ್ಡ ಮಟ್ಟದಲ್ಲಿ ಚರ್ಚೆಯಾಗುವ ಬದಲು ಸಂಬಂಧ ಪಟ್ಟವರು ಕೂಡಲೇ ಕ್ರಮ ಕೈಗೊಂಡರೆ ಸಾಮಾನ್ಯ ಜನರಿಗೆ ಆಗುವ ತೊಂದರೆಯನ್ನು ನಿವಾರಿಸಿದಂತಾಗುವುದು.

ಪುರಭವನದ ಮುಂಭಾಗದಲ್ಲಿ ಪಾರ್ಕ್‌ ಇದ್ದು, ಅದರ ಎರಡೂ ಬದಿಗಳಲ್ಲಿ ಸಾಕಷ್ಟು ಜಾಗವಿದೆ. ಸೆಂಟ್ರಲ್‌ ಟಾಕೀಸ್‌ನ ಮುಂಭಾಗದಲ್ಲಿರುವ ಪಾರ್ಕ್‌ನ ಜಾಗದಲ್ಲಿ 20- 25 ಅಡಿ ಅಗಲದ ರಸ್ತೆ ಮಾಡಿದರೆ ಪುರಭವನಕ್ಕೆ ಕ್ಲಾಕ್‌ಟವರ್‌ನಿಂದಲೇ ಹೋಗಲು ಅನುವು ಮಾಡಿಕೊಡಬಹುದು. ಸ್ಮಾರ್ಟ್‌ ನಗರಿಯಾಗುತ್ತಿರುವ ಮಂಗಳೂರಿನಲ್ಲಿ ಅನಗತ್ಯ ಸುತ್ತಿ ಬಳಸಿ ಬರುವಂಥ ದಾರಿಗಳಿಗೆ ಪರ್ಯಾಯ ಹಾಗೂ ಸುಲಭವಾಗುವಂಥ ವ್ಯವಸ್ಥೆ ಕಲ್ಪಿಸಿದರೆ ನಗರದೊಳಗಿನ ವಾಹನ ದಟ್ಟಣೆಯನ್ನೂ ನಿಯಂತ್ರಿಸಬಹುದು.

 ಜೆ.ಎಫ್.ಡಿ’ಸೋಜಾ, ಅತ್ತಾವರ