ಸಮೃದ್ಧ ಆಸ್ವಾದನೆ ಒದಗಿಸಿದ ರಾಗಧನ ಸಂಗೀತೋತ್ಸವ 

Team Udayavani, Mar 9, 2018, 8:15 AM IST

ಫೆ.4ರಂದು ಪೂರ್ವಾಹ್ನ “ರಾಗಧನಶ್ರೀ’ ಪತ್ರಿಕೆಯ ದಶಮಾನೋತ್ಸವ ಸಂಭ್ರಮದೊಂದಿಗೆ “ಸಂಘಟಕರ ಹಾಗೂ ಸಂಗೀತ ಪ್ರೇಮಿಗಳ’ ಒಂದು ಸೌಹಾರ್ದ ಸಂವಾದ ಕಾರ್ಯಕ್ರಮ ನಡೆಯಿತು.

ಇಳಿ ಹಗಲಿನ ಗಾಯನವನ್ನು ನಡೆಸಿಕೊಟ್ಟವರು ಪುತ್ತೂರಿನ ಅನೀಶ್‌ ಭಟ್‌. ಗಂಟೆಯಂತೆ ಗಂಭೀರವಾದ ಗಂಡು ಶಾರೀರ, ಸ್ಪುಟವಾದ ಸಾಹಿತ್ಯ, ಸ್ವರಸ್ಥಾನಗಳ ನಿಖರತೆ ಮತ್ತು ಶ್ರುತಿ ಲೀನತೆ. ಹಂಸಧ್ವನಿಯ (ರಘುನಾಯಕ) ಚೇತೋಹಾರಿಯಾದ ಪ್ರಾರಂಭ ಉ¤ಮವಾದ ರಾಗ ವಿಸ್ತಾರದೊಂದಿಗೆ ಮೂಡಿಬಂದ ಧರ್ಮವತಿಯ (ಪರಂಧಾಮವತಿ) ಕೃತಿ ನಿರೂಪಣೆ ಮತ್ತು ಸ್ವರ ಚಮತ್ಕಾರಗಳು ಪ್ರೌಢವಾಗಿದ್ದು ಗುಣಗ್ರಾಹಿ ಶ್ರೋತೃಗಳಿಗೆ ಮುದ ನೀಡಿದವು. ಪ್ರಧಾನ ರಾಗವಾಗಿದ್ದ ಕಾಂಭೋಜಿ (ಎವರಿಮಾಟ) ಸಂಪ್ರದಾಯಬದ್ಧವಾದ ಆಲಾಪನೆ, ರಾಜ ನಡಿಗೆಯಲ್ಲಿ ಸಾಗಿದ ಕೃತಿ ನಿರೂಪಣೆ, “ಭಕ್ತ ಪರಾಧೀನ’…. ಎಂಬಲ್ಲಿ ನೆರವಲ್‌ ಮತ್ತು ಸ್ವರವಿನಿಕೆಗಳಿಂದ ಕೂಡಿತ್ತು.ಈ ಎರಡೂ ಪ್ರಸ್ತುತಿಗಳಲ್ಲೂ ತಮ್ಮ ಪಕ್ವವಾದ ಬೆರಳುಗಾರಿಕೆಯಿಂದ ಜನಮನ ಸೆಳೆದ ಗಣರಾಜ ಕಾರ್ಲೆ ಅಭಿನಂದನಾರ್ಹರು.

ಕಲ್ಯಾಣ ವಸಂತ (ಇನ್ನೂ ದಯ ಬಾರದೇ), ಸಿಂಧುಭೈರವಿ (ವೆಂಕಟಾಚಲ), ಯಮನ್‌ (ಶ್ರೀರಾಮಚಂದ್ರ ಕೃಪಾಲು), ಲಘು ಪ್ರಸ್ತುತಿಗಳು, ಹಂಸಾನಂದಿ ತಿಲ್ಲಾನಾದೊಂದಿಗೆ ಈ ಯುವ ಗಾಯಕರು ತಮ್ಮ ಕಛೇರಿಯನ್ನು ಸಮಾಪನಗೊಳಿಸಿದರು. ಮುಕ್ತವಾದ ಕಂಠವನ್ನು ಹೊಂದಿರುವ ಗಾಯಕರು ತಾರಸ್ಥಾಯಿ ಸಂಚಾರಗಳಲ್ಲಿ ಧ್ವನಿಯನ್ನು ತುಸು ಸಂಸ್ಕರಿಸುವ ಅಗತ್ಯವಿದೆ.ಗಾಯಕರ ಬಿರುಸಾದ ನಿರೂಪಣೆಗೆ ಅನುಗುಣವಾಗಿ ಸಹವಾದನ ಮತ್ತು ತನಿ ಆವರ್ತನ ನೀಡಿದ ನಿಕ್ಷಿತ್‌ ಪುತ್ತೂರು ಪ್ರಶಂಸನೀಯರು.

ಉತ್ಸವದ ಕೊನೆಯ ಹಾಡುಗಾರಿಕೆ ಚೆನ್ನೈನ ಅಮೃತಾ ಮುರಳಿ ಅವರಿಂದ. ಈ ತರುಣಿ ತುಸು ಘನವಾದ, ಆಕರ್ಷಕ ಕಂಠಸಿರಿಯನ್ನು ಹೊಂದಿದ್ದು, ಅವನ್ನು ತನ್ನ ಗಾಯನದಲ್ಲಿ ಧನಾತ್ಮಕವಾಗಿ ಬಳಸಿಕೊಂಡಿದ್ದಾರೆ. ಕಛೇರಿಯುದ್ಧಕ್ಕೂ ಬಹುಶ್ರುತವಲ್ಲದ ಪ್ರಸ್ತುತಿಗಳನ್ನೇ ಹಾಡಿದ ಗಾಯಕಿ ತನ್ಮೂಲಕ ಶ್ರೋತೃಗಳ ಕುತೂಹಲವನ್ನು ಕಾಯ್ದುಕೊಂಡರು.

ಬೇಗಡೆ ರಾಗದ ವರ್ಣ (ದಯಾನಿಧೇ), ಶ್ರೀರಾಗ (ಯುಕ್ತಮು ಕಾದು), ಸರಸ್ವತಿ ಮನೋಹರಿ ಕೃತಿಗಳ ಅನಂತರ ಗಾಯಕಿ “ವರಾಳಿ’ (ಕರುಣ ಜೂಡವಮ್ಮ) ರಾಗವನ್ನು ಎತ್ತಿಕೊಂಡರು. ಅಲ್ಲಿಯವರೆಗೂ ತುಸು ಗೊಂದಲದಲ್ಲಿದ್ದ ಶ್ರೋತೃಗಳಿಗಾದರೂ ಕಛೇರಿಯ ಹಿಡಿತ ಸಿಕ್ಕಿದ್ದು ಅನಂತರವೇ.

ವರಾಳಿಯ ಲಕ್ಷಣಯುತವಾದ ರಾಗ ವಿಸ್ತಾರದ ನಂತರ ಮೂಡಿಬಂದ ಕೃತಿ ನಿರೂಪಣೆ ಗಾಯಕಿಯ ಅನುರಣಿಸುವ “ಹಸ್ಕಿ’ ಶಾರೀರದಲ್ಲಿ ಇನ್ನಷ್ಟು ಮೆರುಗು ಪಡೆಯಿತು. (ವಿಶೇಷವಾಗಿ ಶುದ್ಧ ಗಾಂಧಾರ ಪ್ರಯೋಗಗಳಲ್ಲಿ). ಮುಂದೆ ಹಾಡಲಾದ 14 ರಾಗಗಳ ರಾಗಮಾಲಿಕೆ (ಶ್ರೀ ವಿಶ್ವನಾಥಂ) ಮತ್ತು ತ್ವರಿತಗತಿಯ ಉಸೇನಿ (ರಾಮಾ ನಿನ್ನೇ ನಮ್ಮಿ ನಾನು) ರಸಿಕರಲ್ಲಿ ಹೊಸ ಸಂಚಲನವನ್ನು ಉಂಟು ಮಾಡಿದವು.

ಪ್ರಧಾನ ರಾಗ ಕಾಂಭೋಜಿ. ರಾಗದ ಸೌಂದರ್ಯಕ್ಕೆ ಪೂರಕವಾಗುವಂತಹ ಗಮಕಗಳು, ಮೂಛìನೆಗಳು ಮತ್ತು ಆಕರ್ಷಕವಾದ ಬಿರ್ಕಾ ಪ್ರಯೋಗಗಳಿಂದ ಆಲಂಕೃತವಾಗಿದ್ದ ಆಲಾಪನೆಯ ಅನಂತರ ಕಲಾವಿದೆ “ಕಂಡೆನಾ ಉಡುಪಿಯ’ ದೇವರನಾಮವನ್ನು ಕೃತಿಯ ಚೌಕಟ್ಟಿನಲ್ಲಿ ಅಳಪಡಿಸಿ ಸಂಗತಿಗಳೊಂದಿಗೆ ಹಾಡಿದರು. “ಪುರಂದರ ವಿಠಲನ ಪಾದವ’ ಎಂಬಲ್ಲಿ ರೋಚಕವಾದ ನೆರವಲ್‌ ಮತ್ತು ಸ್ವರಹಂದರಗಳೊಂದಿಗೆ ಈ ಪ್ರಸ್ತುತಿ ರಂಜನೀಯವಾಗಿತ್ತು.

ರಾಮಕುಮಾರ್‌ ಅವರು ಗಾಯಕಿಯ ಇಂಗಿತವರಿತು ಹಿತಮಿತವಾಗಿ ವಯಲಿನ್‌ ಸಹಕಾರ ನೀಡಿದರು.ಅರುಣಪ್ರಕಾಶ್‌ ಅವರ ಮೃದಂಗವಾದನ ಶ್ರೋತೃಗಳಿಗೆ ಒಂದು ವಿಶೇಷವಾದ ಅನುಭವವಾಗಿತ್ತು. ತ್ವರಿತಗತಿಯ ಕೃತಿ ನಿರೂಪಣೆ, ನೆರವಲ್‌ ಯಾ ಸ್ವರವಿನಿಕೆಗಳಲ್ಲಿ ಮುಖ್ಯ ಗಾಯಕಿಯ ಜತೆಗೂಡಿದ ಮೃದಂಗ, ಉಳಿದಂತೆ ಹೆಚ್ಚಿನ ಹೊತ್ತು “ತಟಸ್ಥವಾಗಿಯೇ’ ಇತ್ತು. ಬಹುಶಃ ಗಾಯಕಿ ನೀಡುವಂತಹ ನಾಜೂಕಾದ ಪಲುಕುಗಳು, ಮಾಧುರ್ಯ ಪೂರ್ಣ ಸ್ವರಾಂತ್ಯಗಳು ಅಥವಾ ಮನಸೂರೆಗೊಳ್ಳುವ ಮಂದ್ರ ಸಂಚಾರಗಳು ಹಾಗಿದ್ದ ಹಾಗೇ ಶ್ರೋತೃಗಳನ್ನು ತಲುಪಲು, ಮೃದಂಗ ವಾದನ ಹಿನ್ನೆಲೆಗೆ ಸರಿಯುವ ಅಗತ್ಯವಿತ್ತೇನೋ? ಅವರ ತನಿ ಆವರ್ತನ ಉತ್ತಮವಾಗಿತ್ತು.

ಸರೋಜಾ ಆರ್‌. ಆಚಾರ್ಯ