ಬಾಲ್ಯಕಾಲದ ಬೊಜ್ಜು

ಪ್ರಮುಖವಾದ ಸಮಸ್ಯೆ ಆದರೆ ನಿರ್ಲಕ್ಷಿಸಲಾಗಿದೆ

Team Udayavani, Oct 6, 2019, 5:08 AM IST

“ಮಗು ದಪ್ಪವಾಗಿದೆ, ದೊಡ್ಡವರಾದಾಗ ಸರಿ ಹೋಗುತ್ತದೆ’ – ತಮ್ಮ ಮಕ್ಕಳು ಅಧಿಕ ದೇಹತೂಕ ಬೆಳೆಸಿಕೊಂಡಾಗ ಹೆತ್ತವರು ಸಾಮಾನ್ಯವಾಗಿ ಹೇಳುವುದಾಗಿದೆ. ಆದರೆ ಈ ತಪ್ಪು ಕಲ್ಪನೆಯು ಮಕ್ಕಳಲ್ಲಿ ಅತ್ಯಂತ ಹೆಚ್ಚು ನಿರ್ಲಕ್ಷಿತವಾಗಿರುವ ಗಂಭೀರ ಆರೋಗ್ಯ ಸಮಸ್ಯೆಯೊಂದಕ್ಕೆ ಕಾರಣವಾಗಬಲ್ಲುದು – ಅದುವೇ ಬಾಲ್ಯದ ಬೊಜ್ಜು.

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ 2016ರಲ್ಲಿ 0ಯಿಂದ 5 ವರ್ಷ ವಯೋಮಾನದ ಅಂದಾಜು 41 ಮಿಲಿಯ ಮಕ್ಕಳು ಅಧಿಕ ದೇಹತೂಕ ಅಥವಾ ಬೊಜ್ಜಿನ ಸಮಸ್ಯೆಯಿಂದ ಬಳಲುತ್ತಿದ್ದರು. ಬೊಜ್ಜು ಕಾಣಿಸಿಕೊಳ್ಳುವ ಪ್ರಮಾಣವು ಈಗ 1975ಕ್ಕಿಂತ ಮೂರು ಪಟ್ಟು ಹೆಚ್ಚಿದೆ! ಈ ಭಾರೀ ಹೆಚ್ಚಳವು ಅನೇಕ ಕಾರಣಗಳಿಂದ ಆಗಿರಬಹುದು. ಆದರೆ ಪ್ರಧಾನವಾದ ಒಂದು ಕಾರಣ ಎಂದರೆ, ಬಾಲ್ಯಕಾಲದಲ್ಲಿ ಬೊಜ್ಜು ಹೊಂದಿರುವ ಮಕ್ಕಳು ಬೊಜ್ಜು ಹೊಂದಿರುವ ಪ್ರೌಢರಾಗಿ ಬೆಳೆಯುವ ಸಾಧ್ಯತೆಯೇ ಹೆಚ್ಚು.

ಅನುವಂಶವಾಹಿ ಪ್ರಭಾವದಿಂದ ಬೊಜ್ಜು ಉಂಟಾಗುತ್ತದೆ ಎಂಬುದು ನಿಜವಾದರೂ ದೈಹಿಕ ಚಟುವಟಿಕೆಗಳು ಕಡಿಮೆಯಾಗಿ ಸೇವಿಸುವ ಆಹಾರ ಹೆಚ್ಚಿದಾಗ ಬೊಜ್ಜು ಸಂಗ್ರಹವಾಗುತ್ತದೆ. ಓಡುವುದು, ಸ್ಕಿಪ್ಪಿಂಗ್‌, ಸೈಕ್ಲಿಂಗ್‌ ಮತ್ತು ಹೊರಾಂಗಣ ಆಟಗಳಲ್ಲಿ ತೊಡಗಿಕೊಳ್ಳುವ ಮಕ್ಕಳು ಈಗ ಸತತವಾಗಿ ಮೊಬೈಲ್‌ ಇತ್ಯಾದಿ ಗ್ಯಾಜೆಟ್‌ಗಳ ಬಳಕೆ ಮಾಡುತ್ತಿದ್ದಾರೆ. ಇದರಿಂದ ಸಹಜವಾಗಿ ದೇಹದಲ್ಲಿ ಕ್ಯಾಲೊರಿಗಳು ದಹನವಾಗುವುದು ಕಡಿಮೆಯಾಗುತ್ತದೆ. ಹೆತ್ತವರು ತಮ್ಮ ಮಕ್ಕಳ ತುಂಟತನವನ್ನು ಕಡಿಮೆ ಮಾಡಲು ಮೊಬೈಲ್‌ ಫೋನ್‌ ಇತ್ಯಾದಿಗಳನ್ನು ಮಕ್ಕಳ ಕೈಗೆ ನೀಡುವ ಮೂಲಕ ತಮಗರಿವಿಲ್ಲದಂತೆಯೇ ಅನಾರೋಗ್ಯಕರ ಚಾಲಿ ಬೆಳೆದುಬರಲು ಪ್ರೋತ್ಸಾಹಿಸುತ್ತಿದ್ದಾರೆ. ಆಹಾರಾಭ್ಯಾಸದಲ್ಲೂ ಅನಾರೋಗ್ಯಕರ ಬದಲಾವಣೆಗಳು ಆಗಿವೆ. ಮಕ್ಕಳು ಮತ್ತು ಹದಿಹರಯದವರು ಆರೋಗ್ಯಕರ ಮತ್ತು ಪುಷ್ಟಿಯುತವಾದ ಹಣ್ಣುಹಂಪಲು ಅಥವಾ ಉಪಾಹಾರದ ಬದಲು ಬರ್ಗರ್‌ ಅಥವಾ ಪಿಜಾlವನ್ನು ಹೆಚ್ಚು ಇಷ್ಟಪಡುತ್ತಿದ್ದಾರೆ. ಇದು ಸಹಜವಾಗಿಯೇ ಹೆಚ್ಚು ಕ್ಯಾಲೊರಿಯುಳ್ಳ ಆಹಾರವಾಗಿದೆ. ಹೆಚ್ಚು ಕ್ಯಾಲೊರಿ ಸೇವನೆ ಮತ್ತು ಶಕ್ತಿ ಖರ್ಚಾಗುವುದು ಕಡಿಮೆಯಾಗಿರುವುದರಿಂದ ಅಸಮತೋಲನ ಉಂಟಾಗುತ್ತದೆ. ಈ ಅಸಮತೋಲನವು ದೀರ್ಘ‌ಕಾಲ ಹಾಗೆಯೇ ಉಳಿದರೆ ಕ್ರಮೇಣವಾಗಿ ಬೊಜ್ಜು ಉಂಟಾಗುತ್ತದೆ.

ಬೊಜ್ಜು ಹೊಂದಿರುವ ಮಕ್ಕಳು ಸಣ್ಣ ವಯಸ್ಸಿನಲ್ಲಿಯೇ ಮಧುಮೇಹ, ಹೃದ್ರೋಗಗಳಂತಹ ಕಾಯಿಲೆಗಳು ಮತ್ತು ಜೀವನಶೈಲಿಗೆ ಸಂಬಂಧಪಟ್ಟ ಕಾಯಿಲೆಗಳಿಗೆ ತುತ್ತಾಗುವ ಸಾಧ್ಯತೆ ಹೆಚ್ಚು. ಆತಂಕ, ಖನ್ನತೆ, ಉದ್ವಿಗ್ನತೆ ಮತ್ತು ಆತ್ಮವಿಶ್ವಾಸ ಕುಸಿತದಂತಹ ಮನಸ್ಸಿಗೆ ಸಂಬಂಧಿಸಿದ ಸಮಸ್ಯೆಗಳು ಕೂಡ ಕಾಣಿಸಿಕೊಳ್ಳಬಹುದು. ಇವು ಸಾಮಾಜಿಕ ಸಹಭಾಗಿತ್ವದ (Social Participation), ಒಳಗೊಳ್ಳುವಿಕೆಯ ಮೇಲೆ ಪರಿಣಾಮ ಬೀರುತ್ತವೆ. ಇಂತಹ ಮಕ್ಕಳು ಅಸ್ತಮಾದಂತಹ ಉಸಿರಾಟ ಸಮಸ್ಯೆ, ನಿದ್ರಾಹೀನತೆ, ಉಸಿರುಗಟ್ಟುವಿಕೆ ತೊಂದರೆಗಳಿಂದಲೂ ಬಳಲುವ ಸಾಧ್ಯತೆಯಿದೆ.

ಆದರೆ ನೋಡಲು ದಪ್ಪವಾಗಿರುವ ಮಕ್ಕಳೆಲ್ಲರೂ ಅಧಿಕ ದೇಹ ತೂಕ ಅಥವಾ ಬೊಜ್ಜನ್ನು ಹೊಂದಿರಲಾರರು. ಹಾಗಾದರೆ ನಿಮ್ಮ ಮಗು ಬೊಜ್ಜು ಹೊಂದಿದೆಯೇ ಇಲ್ಲವೇ ಎಂದು ತಿಳಿಯುವುದು ಹೇಗೆ? ರಾಷ್ಟ್ರೀಯ ಆರೋಗ್ಯ ಸಂಸ್ಥೆಯು ದೇಹತೂಕವನ್ನು ಬಿಎಂಐ (ಬಾಡಿ ಮಾಸ್‌ ಇಂಡೆಕ್ಸ್‌ – ದೇಹಪರಿಮಾಣ ಸೂಚ್ಯಂಕ)ನ ಮೂಲಕ ವ್ಯಾಖ್ಯಾನಿಸುತ್ತದೆ. ಇದು ವ್ಯಕ್ತಿಯ ದೇಹತೂಕ (ಕಿಲೊಗ್ರಾಮ್‌ಗಳಲ್ಲಿ) ವನ್ನು ಆತ/ಆಕೆಯ ಎತ್ತರ (ಮೀಟರ್‌ಗಳಲ್ಲಿ) ವಿಭಾಗಿಸಿ ದೊರೆಯುವ ಮೊತ್ತ. 30 ಅಥವಾ ಅದಕ್ಕಿಂತ ಹೆಚ್ಚು ಅಂಕವನ್ನು ಬೊಜ್ಜು ಎಂದು ಪರಿಗಣಿಸಲಾಗಿದೆ. ಆನ್‌ಲೈನ್‌ನಲ್ಲಿ ಈಗ ಬಿಎಂಐ ಕ್ಯಾಲ್ಕುಲೇಟರ್‌ಗಳು ಲಭ್ಯವಿದ್ದು, ನಮ್ಮ ನಮ್ಮ ಬಿಎಂಐಯನ್ನು ಸುಲಭವಾಗಿ ಪರಿಶೀಲಿಸಿಕೊಳ್ಳಬಹುದು.

ಅಕ್ಟೋಬರ್‌ 11ನ್ನು ಪ್ರತಿವರ್ಷ ಜಾಗತಿಕ ಬೊಜ್ಜು ದಿನವನ್ನಾಗಿ ಗುರುತಿಸಿ ಆಚರಿಸಲಾಗುತ್ತದೆ. ಬೊಜ್ಜು ಮತ್ತು ಅಧಿಕ ದೇಹತೂಕ ಎಂಬ ನಿರ್ಲಕ್ಷಿತ ಅನಾರೋಗ್ಯಕರ ದೇಹಸ್ಥಿತಿಯ ಬಗ್ಗೆ ಅರಿವು ಬೆಳೆಸಿಕೊಳ್ಳಲು ಇದು ಸುಸಂದರ್ಭ. ಆಕ್ಯುಪೇಶನಲ್‌ ಥೆರಪಿಯ ದೃಷ್ಟಿಕೋನದಿಂದ ಹೇಳುವುದಾದರೆ, ಆರೋಗ್ಯಕರ ಜೀವನಶೈಲಿಯನ್ನು ಸಾಧಿಸುವುದಕ್ಕೆ ಬದುಕಿನ ಎಲ್ಲ ಕ್ಷೇತ್ರಗಳಲ್ಲಿಯೂ ಸಮತೋಲನವನ್ನು ಕಾಪಾಡಿಕೊಳ್ಳುವುದು ಒಳಿತು.

ಆದ್ದರಿಂದ ಇಂದಿನಿಂದಲೇ ಮನೆಯ ಎಲ್ಲರೂ ಒಟ್ಟಾಗಿ ವಾಕಿಂಗ್‌ ಹೋಗುವಂತಹ ಸರಳ ವ್ಯಾಯಾಮ, ದೈಹಿಕ ಚಟುವಟಿಕೆಗಳನ್ನು ದಿನವೂ ಅನುಸರಿಸಲು ಆರಂಭಿಸಿ. ನಿಮ್ಮ ಮಕ್ಕಳು ಮನೆಯ ಹತ್ತಿರದ ಪಾರ್ಕ್‌ ಅಥವಾ ಅಂಗಣದಲ್ಲಿ ದಿನವೂ ಕೊಂಚ ಹೊತ್ತು ಬೆವರಿಳಿಯುವಂತೆ ಆಟವಾಡಲಿ.

ಮಕ್ಕಳು ಶಾಲಾ ಸಮಯದ ಬಳಿಕ ಆಟೋಟ, ನೃತ್ಯದಂತಹ ಕಲಾ ಚಟುವಟಿಕೆಗಳಲ್ಲಿ ಭಾಗವಹಿಸುವುದನ್ನು ಪ್ರೋತ್ಸಾಹಿಸಿ. ಇದರಿಂದ ಅವರ ದೈಹಿಕ ಚಟುವಟಿಕೆ ಮಾತ್ರವಲ್ಲದೆ ಸಾಮಾಜಿಕ ಸಂವಹನವೂ ಉತ್ತಮಗೊಳ್ಳುತ್ತದೆ. ಟಿವಿ ಮತ್ತು ಮೊಬೈಲ್‌ ಫೋನ್‌ನಂತಹ ಗ್ಯಾಜೆಟ್‌ಗಳ ಮುಂದೆ ಕಳೆಯುವ ಸಮಯ ದಿನಕ್ಕೆ ಒಂದೆರಡು ತಾಸುಗಳಿಗೆ ಮಿತಿಗೊಳ್ಳಲಿ. ಏನನ್ನು ತಿನ್ನಬೇಕು ಎಂಬ ಆಯ್ಕೆ ಎದುರಾದಾಗ ಆರೋಗ್ಯಕರವಾದವುಗಳನ್ನೇ ಆರಿಸಿಕೊಳ್ಳುವ ವಿವೇಕವನ್ನು ಮಕ್ಕಳಿಗೆ ಕಲಿಸಿಕೊಡಿ. ದೈನಿಕ ಆಹಾರದಲ್ಲಿ ಸಾಕಷ್ಟು ಪ್ರಮಾಣದಲ್ಲಿ ಹಣ್ಣುಹಂಪಲು ಮತ್ತು ತರಕಾರಿಗಳಿರಲಿ. ಪ್ರತಿದಿನವೂ ನಿಮ್ಮ ಮಗು ಅಗತ್ಯವಿದ್ದಷ್ಟು ಹೊತ್ತು ಚೆನ್ನಾಗಿ ನಿದ್ದೆ ಮಾಡಲಿ. ಈ ಸಮತೋಲನದಿಂದ ಆರೋಗ್ಯಕರ ಜೀವನ ಸಾಧ್ಯವಾಗುತ್ತದೆ. ಇದುವೇ ಆಕ್ಯುಪೇಶನಲ್‌ ಥೆರಪಿ ಎಂಬ ವೈದ್ಯಕೀಯ ವಿಭಾಗದ ಉದ್ದೇಶ ಮತ್ತು ಗುರಿಯಾಗಿದೆ. ಆದ್ದರಿಂದ ಯಾವುದೇ ಸಂಶಯಗಳು ಎದುರಾದಾಗ ನಿಮ್ಮ ಸನಿಹದ ಆಕ್ಯುಪೇಶನಲ್‌ ಥೆರಪಿಸ್ಟ್‌ ಬಳಿ ಸಲಹೆ ಪಡೆಯಿರಿ. ನಿಮ್ಮ ಮಕ್ಕಳು, ಅವರ ಮಕ್ಕಳು ಮತ್ತು ಭವಿಷ್ಯದ ಜನಾಂಗ ಆರೋಗ್ಯಕರ ಭವಿಷ್ಯವನ್ನು ಹೊಂದಲಿ.

– ಸುಝಾನಾ ರೂಪಾಲ್‌ ಗೆರಾರ್ಡ್‌,
ಅಂತಿಮ ವರ್ಷದ ಬಿಒಟಿ ವಿದ್ಯಾರ್ಥಿನಿ

– ಗುರುಪ್ರಸಾದ್‌ ವಿ.,
ಸಹಾಯಕ ಪ್ರಾಧ್ಯಾಪಕರು, ಆಕ್ಯುಪೇಶನಲ್‌ ಥೆರಪಿ ವಿಭಾಗ, ಎಂಸಿಎಚ್‌ಪಿ

ಶ್ರೀ ಅಷ್ಠ ಲಕ್ಷ್ಮೀ ಜೋತಿಷ್ಯ ಮಂದಿರ,
ಉದ್ಯೋಗ, ಮದುವೆ ವಿಳಂಬ, ಸತಿ-ಪತಿ ಕಲಹ, ಶತ್ರುಪೀಡೆ, ಅತ್ತೆ-ಸೊಸೆ ಕಲಹ, ವಶೀಕರಣ, ವ್ಯವಹಾರದಲ್ಲಿ ನಷ್ಟ, ಇನ್ನೂ ನಿಮ್ಮಸಮಸ್ಯೆ ಯಾವುದೇ ಇರಲಿ, ಎಷ್ಟೇ ಕಠಿಣವಾಗಿರಲಿ ಶಾಶ್ವತ ಪರಿಹಾರ ಶತಃ ಶಿದ್ದ , ನಿಮ್ಮ ಯಾವುದೇ ಇಷ್ಟಾರ್ಥ ಕಾರ್ಯಗಳಿದ್ದರೂ ಕೇವಲ 5 ದಿನಗಳಲ್ಲಿ ನೇರವೆರಿಸಿ ಕೋಡುತ್ತಾರೇ.
ಶ್ರೀ ಶ್ರೀ ಬಿ ಹೆಚ್ ಆಚಾರ್ಯ ಗೂರುಜೀ
ಜಯನಗರ ಬೆಂಗಳೂರು, ಮೋ- 8884889444

ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ