ಹೆಸರು ಬದಲಿಸುವಾಗ…

Team Udayavani, Aug 26, 2019, 3:04 AM IST

ವಿಶ್ವವಿದ್ಯಾಲಯಗಳಲ್ಲಿ ವ್ಯಾಸಂಗ ಮಾಡುತ್ತಿರುವ ವಿದ್ಯಾರ್ಥಿಗಳು ಹೆಸರು ಬದಲಿಸಿಕೊಳ್ಳಿ ಬೇಕೆಂದರೆ, ತಾವು ಓದುತ್ತಿರುವ ಕಾಲೇಜಿನ ಪ್ರಿನ್ಸಿಪಾಲರಿಗೆ, ಅರ್ಜಿ ಸಲ್ಲಿಸಬೇಕು. ಅರ್ಜಿಗೆ ಕೆಳಗಿನ ದಾಖಲೆಗಳನ್ನು ಲಗತ್ತಿಸಬೇಕು.

* ಪ್ರಮಾಣಿತ ಘೋಷಣೆ

* ಹೆಸರು ಬದಲಾವಣೆಯನ್ನು ಸ್ಥಳೀಯ ಪತ್ರಿಕೆಯೊಂದರಲ್ಲಿ ಜಾಹೀರು ಮಾಡಿ ಹಾಗೆ ಜಾಹೀರಾತು ಪ್ರಕಟವಾದ ಪತ್ರಿಕೆಯ ಪ್ರತಿ.

* ಅಪ್ರಾಪ್ತ ವಯಸ್ಕನಾಗಿದ್ದರೆ ತಂದೆ- ತಾಯಿ ಪೋಷಕ ಕೊಟ್ಟ ಅನುಮತಿ ಪತ್ರ.

* ನಿಗದಿತ ಶುಲ್ಕವನ್ನು ಸಂದಾಯ ಮಾಡಿದ ಚಲನ್‌

ಕಾಲೇಜಿನ ಪ್ರಿನ್ಸಿಪಾಲರು ಅರ್ಜಿಯನ್ನು ಪರಿಶೀಲಿಸಿ ತಮ್ಮ ಅನುಮೋದನೆಯೊಂದಿಗೆ ವಿಶ್ವವಿದ್ಯಾಲಯದ ಕಚೇರಿಗೆ ಕಳುಹಿಸಿಕೊಡುತ್ತಾರೆ. ವಿಶ್ವವಿದ್ಯಾಲಯ ಅಗತ್ಯ ವಿಚಾರಣೆಯನ್ನು ಮಾಡಿ, ಹೆಸರು ಬದಲಾವಣೆಗೆ ಅನುಮತಿ ಕೊಡುತ್ತದೆ. ಅರ್ಜಿಯನ್ನು ನಿರಾಕರಿಸಿದಲ್ಲಿ ಅದಕ್ಕೆ ಕಾರಣವನ್ನು ವಿಶ್ವವಿದ್ಯಾಲಯ, ವಿದ್ಯಾರ್ಥಿಗೆ ತಿಳಿಸಬೇಕು.

ರಹದಾರಿ ಪತ್ರ: ಒಮ್ಮೆ ಒಂದು ಹೆಸರಿನಲ್ಲಿ ಪಡೆದುಕೊಂಡ ಪಾಸ್‌ಪೋರ್ಟ್‌ನಲ್ಲಿ ಹೆಸರು ಬದಲಾವಣೆ ಮಾಡಬೇಕಾದಲ್ಲಿ ನಿಗದಿತ ನಮೂನೆಯಲ್ಲಿ ಪ್ರಮಾಣಿತ ಘೋಷಣೆಯನ್ನು ಮಾಡಿ ಎರಡು ವರ್ತಮಾನ ಪತ್ರಿಕೆಗಳಲ್ಲಿ ಜಾಹೀರಾತು ನೀಡಿ, ನಿಗದಿತ ಶುಲ್ಕದೊಂದಿಗೆ, ಘೋಷಣೆ, ವರ್ತಮಾನ ಪತ್ರಿಕೆಗಳ ಪ್ರತಿಗಳು ಮತ್ತು ಅರ್ಜಿ ಇವುಗಳನ್ನು ಸ್ಥಳೀಯ ಪಾಸ್‌ಪೋರ್ಟ್‌ ಆಫೀಸಿಗೆ ಕಳುಹಿಸಿಕೊಡಬೇಕು. ಅರ್ಜಿಯ ಜೊತೆಗೆ ಪಾಸ್‌ಪೋರ್ಟನ್ನು ಕಳುಹಿಸಬೇಕು. ಇದಕ್ಕೆ ನಿಗದಿತ ಶುಲ್ಕ ಇರುತ್ತದೆ.

ಸಂಸ್ಥೆಯ ಹೆಸರು: ಒಬ್ಬ ವ್ಯಕ್ತಿ ಯಾವುದೇ ಹೆಸರನ್ನು ಇಟ್ಟುಕೊಳ್ಳಬಹುದು. ನಿಮ್ಮ ಹೆಸರು ಗೋಪಾಲನಾಗಿದ್ದರೆ, ನನ್ನ ಹೆಸರು ಗೋಪಾಲನಾಗಲು ಯಾವುದೇ ಅಡ್ಡಿಯೂ ಇಲ್ಲ. ಒಮ್ಮೆ ಇಟ್ಟುಕೊಂಡ ಹೆಸರನ್ನು ಬೇಕಾದಾಗ ಸುಲಭವಾಗಿ ಬದಲಾಯಿಸಿಕೊಳ್ಳಲೂಬಹುದು. ಸಂಸ್ಥೆಗಳಿಗೂ ಆ ಸ್ವಾತಂತ್ರ್ಯವಿದೆಯೇ ಎಂಬುದನ್ನು ನೋಡೋಣ. ಸಂಸ್ಥೆ ಎಂದರೆ ಕಂಪನಿ, ಸಹಕಾರ ಸಂಸ್ಥೆ ಅಥವಾ ಸಂಘ ಆಗಬಹುದು.
(ಮುಂದುವರಿಯುವುದು)

* ಎಸ್‌.ಆರ್‌. ಗೌತಮ್‌ (ಕೃಪೆ: ನವ ಕರ್ನಾಟಕ ಪ್ರಕಾಶನ)