ಟಿವಿಗಿಂತ ನನ್ನ ಹೃದಯವೇ ಹೆಚ್ಚು ಹಾಳಾಗಿದೆ …

Team Udayavani, Aug 27, 2019, 5:00 AM IST

ಹಾಯ್‌ ಅಭಿಜ್ಞಾ,
ಇಡೀ ಊರಲ್ಲಿ ಟಿವಿ ರಿಪೇರಿ ಎಲೆಕ್ಟ್ರಿಷಿಯನ್‌ ಅಂತ ಇರುವುದು ನಾನೊಬ್ಬನೇ. ಅದಕ್ಕಿಂತ ಹೆಚ್ಚಾಗಿ, ಕಡಿಮೆ ದರದಲ್ಲಿ ಬೇಗ ರಿಪೇರಿ ಮಾಡಿ ಕೊಡ್ತಾನೆ. ಒಳ್ಳೆಯ ಹುಡುಗ ಅಂತ ಒಂದಿಷ್ಟು ಒಳ್ಳೆಯ ಹೆಸರು ಕೂಡ ಇದೆ. ಇಂತಿಪ್ಪ ಹಿನ್ನೆಲೆಯ ನನಗೆ, ಒಂದು ದಿನ ನಿನ್ನ ಫೋನು ಬಂತು. “ಸರ್‌, ನಮ್ಮನೇಲಿ ಟಿವಿ ಹಾಳಾಗಿದೆ. ಸ್ವಲ್ಪ ಬಂದು ರಿಪೇರಿ ಮಾಡಿ ಕೊಡ್ತೀರಾ’ ಎಂದು ಶುರು ಮಾಡಿದ ನೀನು, ಪಟಪಟನೆ ಒಂದೇ ಉಸುರಿನಲ್ಲಿ ಎಲ್ಲಾ ವಿಚಾರ ಹೇಳಿ, ಮನೆಯ ಅಡ್ರೆಸ್‌ ಕೂಡ ತಿಳಿಸಿಬಿಟ್ಟಿದ್ದೆ. ನಾನು, ಅದಾಗಿ ಹತ್ತು ನಿಮಿಷದಲ್ಲೇ ನಿಮ್ಮ ಮನೆಯೆದುರು ನಿಂತಿದ್ದೆ. ಜ್ಞಾಪಕ ಇದೆಯಾ?

ಅದೇ ಮೊದಲ ಸಲ ನಾನು ನಿನ್ನ ನೋಡಿದ್ದು. ನೀನವತ್ತು, ಕೆಂಪನೆಯ, ಉದ್ದ ಲಂಗದ ಮೇಲೊಂದು ನಸು ಹಳದಿ ಬಣ್ಣದ ಟಾಪ್‌ ಧರಿಸಿದ್ದೆ. ಕೂದಲನ್ನು ಮುಂದಕ್ಕೆ ಸ್ವಲ್ಪವೇ ಇಳಿಬಿಟ್ಟು, ಹಿಂದೆ ತುರುಬನ್ನು ಕಟ್ಟಿದ್ದೆ . ಏಕೋ ಗೊತ್ತಿಲ್ಲ. ನಿನ್ನ ಆ ಡ್ರೆಸ್‌ನ ಅಂದವನ್ನು ನೋಡಿಯೇ ಬಹಳ ಖುಷಿಯಾಗಿತ್ತು. ಅದರ ಮೇಲೆ ನಿನ್ನ ಮುಖದ ಮೇಲಿರುವ ಚಂದನೆಯ ನಗು ಹೃದಯದಲ್ಲಿ ಅಲೆಗಳೆಬ್ಬಿಸಿತ್ತು !

ಅವತ್ತು ಟಿವಿ ರಿಪೇರಿ ಮಾಡುತ್ತಿರುವಾಗ ನೀನು ಪಟಪಟನೆ ಅದು ಯಾಕೆ ಹಾಗೆ ? ಇದ್ಯಾಕೆ ಹೀಗೆ ಅಂತೆಲ್ಲಾ ಪ್ರಶ್ನೆಗಳನ್ನು ಕೇಳುತ್ತಾ ಅರಳು ಹುರಿದಂತೆ ಮಾತನಾಡುತ್ತಿದ್ದರೆ, ಒಳಗೊಳಗೇ ಮತ್ತಷ್ಟು ಖುಷಿಯಾಗಿ ಬೇಕೆಂದೇ ಕೆಲಸವನ್ನು ನಿಧಾನ ಮಾಡುತ್ತಿದ್ದೆ. ಒಂದೆರಡು ಹಾಳಾಗಿದ್ದ ಸರ್ಕಿಟ್‌ಗಳನ್ನು ಮತ್ತೆ ಹಾಕಿ ಟಿವಿ ಸರಿ ಮಾಡಿಯಾಗಿತ್ತು. ನಿಜ ಹೇಳ ಬೇಕೆಂದರೆ, ಅದರ ಒಳಗಿನ ಒಂದು ವಯರ್‌ ಸವೆದು ಲೂಸ್‌ ಕಾಂಟ್ಯಾಕ್ಟ್ ಸ್ಥಿತಿಯಲ್ಲಿರುವುದು ನನ್ನ ಗಮನಕ್ಕೆ ಬಂದಿದ್ದರೂ, ಮತ್ತೂಮ್ಮೆ ಕರೆಯಲಿ ನೀನು ಎನ್ನುವ ಒಂದೇ ಕಾರಣಕ್ಕೆ ಅದನ್ನು ಹಾಗೆ ಬಿಟ್ಟಿದ್ದೆ.

ಆವತ್ತು ಮನೆ ಬಿಡುವಾಗ ಹೇಳಿಯೇ ಬಂದಿದ್ದೆ. “ಮುಂದೆ ಸ್ವಲ್ಪ ಪ್ರಾಬ್ಲಿಂ ಬಂದರೂ ಬರಬಹುದು. ಒಂದೆರಡು ಪಾರ್ಟ್ಸ್ ಹೋಗಿದೆ. ಸದ್ಯ ತೊಂದರೆ ಇಲ್ಲ .ತೊಂದರೆ ಆದಾಗ ಹೇಳಿ, ತಕ್ಷಣ ಬರುತ್ತೀನಿ’ ಅಂತ. ಅಂದುಕೊಂಡ ಹಾಗೆ, ಸರಿಯಾಗಿ ಹದಿನೇಳು ದಿನಗಳ ಬಳಿಕ ನಿನ್ನ ಫೋನು ಬಂದಿತ್ತು. ಮೊಬೈಲ್‌ನಲ್ಲಿ “ಅಭಿಜ್ಞಾ’ ಎಂದು ತೋರಿಸಿದಾಗ ನನಗೆ ಉಲ್ಲಾಸ ಉತ್ಪಾಹ. ತೋರಿಸಿದೊಡನೆ ನೀನು, “ಸರ್‌’ ಎನ್ನುತ್ತಿದ್ದಂತೆ ನಾನು “ಹಾ ಗೊತ್ತಾಯ್ತು ಈಗಲೇ ಬರ್ತಿನಿ’ ಎಂದವನೆ ಫೋನು ಇಟ್ಟಿದ್ದೆ.

ಹೌದು ಅಭಿಜ್ಞಾ, ಅವತ್ತು ನೀನು ಮನೆಯಲ್ಲಿರಲಿಲ್ಲ. ಅಪ್ಪ ಅಮ್ಮ ಮಾತ್ರ ಇದ್ದರು. ಟಿವಿ ಬಿಚ್ಚಿ ಕುಳಿತವನಿಗೆ ರಿಪೇರಿ ಮಾಡಬೇಕು ಅಂತನ್ನಿಸಲಿಲ್ಲ. ಸುಮ್ಮನೆ ನಾಟಕವಾಡತೊಡಗಿದ್ದೆ. ಅಂತೂ ಕೊನೆಗೊಮ್ಮೆ ಧೈರ್ಯ ಮಾಡಿ ಮಗಳು ಇಲ್ಲವಾ ಅಂತ ನಿನ್ನ ಅಪ್ಪನ ಬಳಿ ಕೇಳಿದ್ದೆ. ಇಲ್ಲ ಕಾಲೇಜಿಗೆ ಹೋಗಿದ್ದಾಳೆ ಎನ್ನುವ ಉತ್ತರ ಬಂತು. ಅದೇಕೋ ಮತ್ತೆ ಕೆಲಸ ಮುಂದುವರೆಸುವ ಮನಸ್ಸಾಗಲಿಲ್ಲ. ಸ್ವಲ್ಪ ದೊಡ್ಡ ಪ್ರಾಬ್ಲಿಂ ಇದೆ. ನಾನು ಸಂಜೆ ಬಂದು ರಿಪೇರಿ ಮಾಡುತ್ತೀನಿ ಅಂತಂದು ಎದ್ದು ಬಂದೆ.

ಅಭಿಜ್ಞಾ, ಸತ್ಯ ಹೇಳ್ತೀನಿ. ಟಿವಿ ರಿಪೇರಿಗಾಗಿ ಕಾಲ್‌ ಮಾಡಿಯೇ ಮಾಡುತ್ತೀ ಅನ್ನುವ ಅದೊಂದೇ ಭರವಸೆಯಿಂದ ಮೊಬೈಲನ್ನು ಕೈಯಲ್ಲೇ ಹಿಡಿದುಕೊಂಡು ಪದೇ ಪದೇ ನೋಡುತ್ತಿದ್ದೇನೆ. ಟಿವಿ ಹಾಳಾಗಿದೆ, ಸ್ವಲ್ಪ ಬನ್ನಿ ಮರಾಯ್ರೆ ಅಂತ ಕೇಳಿಕೊಂಡು ಬಂದ ಬೇರೆ ಗ್ರಾಹಕರ ಕಾಲ್‌ಗ‌ಳನ್ನೆಲ್ಲಾ ಸ್ವೀಕರಿಸಿ, ನಾಳೆ ಬರುತ್ತೀನಿ ಎಂದು ಹೇಳುತ್ತಿದ್ದೇನೆ. ಯಾಕಂದ್ರೆ, ಅಲ್ಲಿಗೆ ಹೋದ ಮೇಲೆ ನಿನ್ನ ಕಾಲ್‌ ಬಂದ್ರೆ ನನಗೆ ರಿಪೇರಿ ಕೆಲಸದ ಮಧ್ಯೆ ಬಿಟ್ಟು ಬರಲಾಗುವುದಿಲ್ಲವಲ್ಲ. ಹಾಗಾಗಿ. ನಿಂಗೊತ್ತಾ ? ನಿಮ್ಮನೆ ಟಿವಿಗಿಂತ ನನ್ನ ಹೃದಯವೇ ಹೆಚ್ಚು ಹಾಳಾಗಿ ಹೋದಂತಿದೆ. ಅದನ್ನು ರಿಪೇರಿ ಮಾಡಲು ನಿನ್ನಿಂದ ಮಾತ್ರ ಸಾಧ್ಯವಾಗೋದು. ಪ್ಲೀಸ್‌, ಒಂದೇ ಒಂದು ಕಾಲ್‌ ಮಾಡು ಇವತ್ತೇ ಬರ್ತಿನಿ. ನಿಮ್ಮನೆ ಟಿವಿಯನ್ನು ಇವತ್ತೇ ರಿಪೇರಿ ಮಾಡಿ ಕೊಡ್ತೀನಿ.

ಇತೀ ಕಾಯುತ್ತಿರುವ
ಟಿವಿ ರಿಪೇರಿ ಹುಡುಗ

ನರೇಂದ್ರ ಎಸ್‌. ಗಂಗೊಳ್ಳಿ

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

  • ಸಂಗೀತ ಅನ್ನೋದು ದೇವರನ್ನು ಒಲಿಸಿಕೊಳ್ಳಲು ಇರುವ ಸಮೀಪದ ಹಾದಿ ಅಂತ ಅಂದುಕೊಳ್ಳುವ ಕಾಲ ಇದಲ್ಲ. ಈಗ ಸಂಗೀತ ಅನ್ನೋದು ಬದುಕಿನ ಬಂಡಿ ಹೊಡೆಯಲು ಇರುವ ಸಾಧನ. ಟಿ.ವಿಗಳಲ್ಲಿ,...

  • ಶಾಲೆ ಎಂದರೆ ಕೇವಲ ಸಿಲಬಸ್‌ ಸುತ್ತುತ್ತಲೇ ಓಡಾಡಿಕೊಂಡಿರುವ ಮೇಷ್ಟ್ರು, ವಿದ್ಯಾರ್ಥಿಗಳ ಕೂಟವಲ್ಲ.  ಇದ್ರ ‌ ಜೊತೆಗೆ, ಪಠ್ಯೇತರ ಚಟುವಟಿಕೆ ಕೂಡ ಮುಖ್ಯ. ಇದಕ್ಕೆ...

  • ಇಂಟರ್ವ್ಯೂ ಗೆ ಅಂತ ಹೋದಲ್ಲೆಲ್ಲ ಕರೆಯುತ್ತಿದ್ದ. ಸಿಕ್ಕಾಗಲೆಲ್ಲ ಡಬ್ಬ ಕೊಡುತ್ತಿದ್ದ. "ಇವೆಲ್ಲ ಮಾಮೂಲು ಗುರು' ಅಂತ ಆತ್ಮ ವಿಶ್ವಾಸ ತುಂಬುತ್ತಿದ್ದ. "ಅವತ್ತೂಂದು...

  • ಇತ್ತೀಚೆಗೆ ಯುವಕರು ಪ್ರತಿಯೊಂದು ವಿಚಾರವನ್ನೂ ಗೂಗಲ್‌ ಮಾಡಿ ನೋಡಿ ಕುತೂಹಲ ತಣಿಸಿಕೊಳ್ಳುತ್ತಿದ್ದಾರೆ. ಇದರಲ್ಲಿ, ಅನಾರೋಗ್ಯ ಪೀಡಿತರಾಗಿದ್ದವರಲ್ಲಿ ಶೇ....

  • ಎಸ್‌ಎಸ್‌ಎಲ್‌ಸಿಯಲ್ಲಿ ಫೇಲಾದಾಗ ಇಡೀ ಸಮಾಜ ಅಂಕಗಳ ತಕ್ಕಡಿಯಲ್ಲಿ ಈ ಚಿದಾನಂದರನ್ನು ತೂಕ ಹಾಕಿತು. ಆಗ ಅವರು ತೀರ್ಮಾನ ಮಾಡಿದ್ದು; ನನ್ನಂತೆ ಫೇಲಾದವರು ಬದುಕಲ್ಲಿ...

ಹೊಸ ಸೇರ್ಪಡೆ