ಸಿಂಪಲ್ Tricks : ದುಡ್ಡು ಗೆಲ್ಲೋದು ಯಾರು?
ಗಿಲಿಗಿಲಿ ಮ್ಯಾಜಿಕ್
Team Udayavani, Apr 25, 2019, 6:30 AM IST
ದುಡ್ಡಿನ ಮ್ಯಾಜಿಕ್ ಅಂದ್ರೆ ಯಾರು ಇಷ್ಟ ಪಡೋಲ್ಲ ಹೇಳಿ? ಆದ್ರೆ ಈಗ ನಾನು ಹೇಳ್ತಾ ಇರೋದು ದುಡ್ಡು ಮಾಡೋ ಮ್ಯಾಜಿಕ್ ಅಲ್ಲ, ಕವರ್ನಲ್ಲಿ ಇಟ್ಟಿರೋ ದುಡ್ಡು ಗೆಲ್ಲೋ ಮ್ಯಾಜಿಕ್. ಜಾದೂಗಾರ, ನಾಲ್ಕು ಮಂದಿಯನ್ನು ವೇದಿಕೆಗೆ ಕರೆದು ಸಾಲಾಗಿ ನಿಲ್ಲಿಸಿ ತನ್ನಲ್ಲಿರುವ ಐದು ಸೀಲ್ ಮಾಡಿದ ಕವರ್ಗಳನ್ನು ಚೆನ್ನಾಗಿ ಕಲಸಲು ಹೇಳುತ್ತಾನೆ.
‘ಯಾವುದೋ ಒಂದು ಕವರ್ನಲ್ಲಿ ದೊಡ್ಡ ಕ್ಯಾಶ್ ಬಹುಮಾನ ಇದೆ, ಅದನ್ನು ಗೆಲ್ಲೋಕೆ ಲಕ್ ಬೇಕು’ ಎಂದು ಹೇಳುತ್ತಾ ಮೊದಲನೆಯವನ ಕೈಗೆ ಕವರ್ಗಳನ್ನು ಕೊಡುತ್ತಾನೆ. ಆತ ಮಾಡಬೇಕಾದುದು ಇಷ್ಟೆ-ಎಂ ಓ ಎನ್ ಇ ವೈ- ಮನಿ (money) ಎಂದು ಸ್ಪೆಲ್ಲಿಂಗ್ ಹೇಳುತ್ತಾ ಒಂದು ಅಕ್ಷರಕ್ಕೆ ಒಂದೊಂದು ಕವರನ್ನು ಮೇಲಿನಿಂದ ಕೆಳಕ್ಕೆ ಇಡುತ್ತಾ ಹೋಗಬೇಕು. ಕೊನೆಯ ವೈ ಅಕ್ಷರಕ್ಕೆ ಬರುವ ಕವರನ್ನು ತಾನು ಇಟ್ಟುಕೊಂಡು ಉಳಿದ ನಾಲ್ಕು ಕವರ್ಗಳನ್ನು ಎರಡನೆಯವನಿಗೆ ಕೊಡಬೇಕು. ಇದೇ ರೀತಿ ಎರಡು, ಮೂರು ಮತ್ತು ನಾಲ್ಕನೆಯವನು ವೈ ಅಕ್ಷರಕ್ಕೆ ಬರುವ ಕವರನ್ನು ಆರಿಸಿಕೊಂಡ ಬಳಿಕ ಒಂದು ಕವರ್ ಉಳಿಯುತ್ತದೆ. ಅದನ್ನು ಜಾದೂಗಾರ ತೆಗೆದುಕೊಳ್ಳುತ್ತಾನೆ.
ಈಗ ಒಬ್ಬೊಬ್ಬರಿಗೆ ಅವರವರ ಕವರ್ಗಳನ್ನು ತೆರೆದು ನೋಡಲು ಹೇಳುತ್ತಾನೆ. ಎಲ್ಲರ ಕವರ್ಗಳಲ್ಲೂ ಲಕ್-ನೆಕ್ಸ್ಟ್ ಟೈಮ್ ಎಂದು ಬರೆದಿರುತ್ತದೆ. ಆದರೆ ಜಾದೂಗಾರನ ಕವರಲ್ಲಿ ಎರಡು ಸಾವಿರ ರೂಪಾಯಿ ಗರಿ ಗರಿ ನೋಟು!!!
ರಹಸ್ಯ
ನೋಟು ಇಟ್ಟ ಕವರಿನ ಮೂಲೆಯಲ್ಲಿ ಪೆನ್ಸಿಲಿನಿಂದ ಒಂದು ಸಣ್ಣ ಗುರುತು ಮಾಡಿರಬೇಕು (ಚಿತ್ರ ನೋಡಿ). ಮೇಲೆ ಕೆಳಗೆ ಮಾಡಿದ ನಂತರ ಕವರ್ಗಳನ್ನು ಮೊದಲನೆಯವನಿಗೆ ಕೊಡಬೇಕಾದರೆ ಮಾತಾಡುತ್ತಾ ಇರುವಾಗ ಗುರುತಿನ ಕವರನ್ನು ಮೇಲಿನಿಂದ ಎರಡನೇ ಸ್ಥಾನಕ್ಕೆ ಬರುವಂತೆ ಉಪಾಯವಾಗಿ ಜೋಡಿಸಬೇಕು. ಆದರೆ ಯಾರೂ ಕವರ್ಗಳನ್ನು ಸ್ಥಾನಪಲ್ಲಟ ಮಾಡದಂತೆ ಜಾಗ್ರತೆ ವಹಿಸಬೇಕು.