ಬಿಳಿಕೊಳ ತಟದ ಜೈನಮುನಿಗಳ ಬೀಡು

Team Udayavani, Dec 21, 2019, 6:05 AM IST

ಹಾಸನ ಜಿಲ್ಲೆಯ ಚನ್ನರಾಯ ಪಟ್ಟಣ ತಾಲೂಕಿನಲ್ಲಿರುವ ಜೈನರ ಪ್ರಸಿದ್ಧ ಪುಣ್ಯಕ್ಷೇತ್ರ. ಗಂಗರ ಆಳ್ವಿಕೆಯ ಕಾಲದಲ್ಲಿ ಪ್ರಮುಖ ಶ್ರದ್ಧಾಕೇಂದ್ರವಾಗಿದ್ದ ಈ ಊರಿನಲ್ಲಿ ಜೈನಮುನಿಗಳು ಹೆಚ್ಚಾಗಿ ವಾಸಿಸುತ್ತಿದ್ದರು ಎನ್ನುವುದು ಶಾಸನಗಳಿಂದ ತಿಳಿದುಬರುತ್ತದೆ. “ಶ್ರಮಣ ಅಥವಾ ಶ್ರವಣ’ ಎಂದರೆ, ಜೈನಮುನಿ ಎಂದರ್ಥ. “ಬೆಳಗೊಳ’ ಎಂದರೆ ಶುಭ್ರವಾದ ಕೊಳ. ಈ ಊರಿನ ನಡುವೆ ಶುಭ್ರವಾದ ಕೊಳವನ್ನು ಈಗಲೂ ಕಾಣಬಹುದಾಗಿದೆ. ಹೀಗಾಗಿ, ಇಲ್ಲಿಗೆ “ಶ್ರವಣ ಬೆಳಗೊಳ’ ಎಂಬ ಹೆಸರು ಬಂತು ಎನ್ನಲಾಗಿದೆ. ಕಟವಪ್ರ, ವೆಳ್ಗೊಳ, ಧವಳಸರ ತೀರ್ಥ ಎಂಬ ಹೆಸರುಗಳಿಂದಲೂ ಈ ಕ್ಷೇತ್ರ ಪ್ರಸಿದ್ಧಿ ಪಡೆದಿತ್ತು. ಶಿಲ್ಪಿ ಅರಿಷ್ಠನೇಮಿಯಿಂದ ಕೆತ್ತಲ್ಪಟ್ಟ ಬಾಹುಬಲಿಯ 57 ಅಡಿಗಳ ಬೃಹದಾಕಾರದ ವಿಗ್ರಹವಿದ್ದು, ಇದು ಏಷ್ಯಾ ಖಂಡದಲ್ಲೇ ಅತಿ ಎತ್ತರ ಹೊಂದಿದೆ.