ಕೃಷ್ಣನ ಸಂಗಕ್ಕೆ ಸೈ ಎಂದ ಭಾವನಾ

Team Udayavani, Aug 7, 2020, 3:32 PM IST

ಈ ವರ್ಷದ ಆರಂಭದಲ್ಲಿಯೇ, “ಲವ್‌ ಮಾಕ್ಟೇಲ್‌’ ಚಿತ್ರದ ಮೂಲಕ ಭರ್ಜರಿ ಇನ್ನಿಂಗ್ಸ್‌ ಶುರು ಮಾಡಿರುವ ನಟ ಮದರಂಗಿ ಕೃಷ್ಣ , ಸದ್ಯ “ಶ್ರೀಕೃಷ್ಣ ಆ್ಯಟ್‌ ಜಿಮೇಲ್‌ ಡಾಟ್‌ ಕಾಂ’ ಎನ್ನುವ ಹೊಸಚಿತ್ರಕ್ಕೆ ತಯಾರಿ ಮಾಡಿಕೊಳ್ಳುತ್ತಿದ್ದಾರೆ. ಸಂದೇಶ್‌ ನಾಗರಾಜ್‌ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ, ನಾಗಶೇಖರ್‌ ಆ್ಯಕ್ಷನ್‌-ಕಟ್‌ ಹೇಳುತ್ತಿದ್ದಾರೆ.

ಅಂದಹಾಗೆ, ರೊಮ್ಯಾಂಟಿಕ್‌ ಕಾಮಿಡಿ ಕಥಾಹಂದರ ಹೊಂದಿರುವ “ಶ್ರೀಕೃಷ್ಣ ಆ್ಯಟ್‌ ಜಿ ಮೇಲ್‌ ಡಾಟ್‌ ಕಾಮ…’ ಚಿತ್ರದ ಮೂಲಕ ನಟಿ ರಾಧಿಕಾ ಕುಮಾರಸ್ವಾಮಿ, ಮತ್ತೆ ಸ್ಯಾಂಡಲ್‌ವುಡ್‌ಗೆ ಕಂ ಬ್ಯಾಕ್‌ ಮಾಡುತ್ತಿದ್ದಾರೆ ಎಂಬ ಸುದ್ದಿ ಕಳೆದ ಕೆಲ ದಿನಗಳಿಂದ ಹರಿದಾಡುತಿತ್ತು. ಆದರೆ ಇದೀಗ ಆ ಸುದ್ದಿ ಹುಸಿಯಾಗಿದೆ. “ಶ್ರೀಕೃಷ್ಣ ಆ್ಯಟ್‌ ಜಿ ಮೇಲ್‌ ಡಾಟ್‌ ಕಾಂ’ ಚಿತ್ರಕ್ಕೆ ಸಂಬಂಧಿಸಿದಂತೆ ಗಾಂಧಿನಗರದಲ್ಲಿ ಹರಿದಾಡುತ್ತಿದ್ದ ಸಾಕಷ್ಟು ಅಂತೆ-ಕಂತೆಗಳಿಗೆ ಈಗ ತೆರೆ ಬಿದ್ದಿದೆ. ಈ ಬಗ್ಗೆ ಒಂದಷ್ಟು ಸ್ಪಷ್ಟನೆ ನೀಡಿರುವ ನಿರ್ದೆಶಕ ನಾಗಶೇಖರ್‌, ತಮ್ಮ ಚಿತ್ರದಲ್ಲಿ ಡಾರ್ಲಿಂಗ್‌ ಕೃಷ್ಣಗೆ ಜೋಡಿ ಆಗುವ ನಾಯಕಿ ಯಾರು ಎಂಬುದನ್ನು ಬಹಿರಂಗಪಡಿಸಿದ್ದಾರೆ.

ಹೌದು, “ಶ್ರೀಕೃಷ್ಣ ಆ್ಯಟ್‌ ಜಿ ಮೇಲ್‌ ಡಾಟ್‌ ಕಾಂ’ ಚಿತ್ರಕ್ಕೆ “ಜಾಕಿ’ ಖ್ಯಾತಿಯ ಮಲೆಯಾಳಂ ಚೆಲುವೆ ಭಾವನಾ ಮೆನನ್‌ ನಾಯಕಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ಡಾರ್ಲಿಂಗ್‌ ಕೃಷ್ಣ ಅವರಿಗೆ ಭಾವನಾ ಮೆನನ್‌ ಜೋಡಿಯಾಗುತ್ತಿರುವುದನ್ನು ನಿರ್ದೇಶಕ ನಾಗಶೇಖರ್‌ ಖಚಿತಪಡಿಸಿದ್ದಾರೆ. ಇನ್ನು ಚಿತ್ರತಂಡದ ಮೂಲಗಳ ಪ್ರಕಾರ, ಇದೇ ಸೆಪ್ಟೆಂಬರ್‌ 1ರಿಂದ ಚಿತ್ರದ ಚಿತ್ರೀಕರಣ ಆರಂಭಿಸಲು ಚಿತ್ರತಂಡ ಸಿದ್ಧತೆ ಮಾಡಿಕೊಂಡಿದೆಯಂತೆ. ಮೊದಲ ಹಂತದಲ್ಲಿ ಸುಮಾರು 14 ದಿನಗಳ ಕಾಲ ಚಿತ್ರೀಕರಣ ನಡೆಯಲಿದ್ದು, ಚಿತ್ರಕ್ಕೆ ಸತ್ಯ ಹೆಗಡೆ ಛಾಯಾಗ್ರಹಣ ಮಾಡುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ಜೆಸ್ಸಿ ಗಿಫ್ಟ್ ಸಂಗೀತ ಸಂಯೋಜನೆ ಮಾಡುತ್ತಿದ್ದಾರೆ. ಮದರಂಗಿ ಕೃಷ್ಣ, ಭಾವನಾ ಮೆನನ್‌ ಅವರೊಂದಿಗೆ ದತ್ತಣ್ಣ, ಸುಹಾಸಿನಿ, ಅರುಣ್‌ ಸಾಗರ್‌, ರಂಗಾಯಣ ರಘು ಮುಂತಾದವರು ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಲಿದ್ದಾರೆ.

ರವಿ ಪ್ರಕಾಶ್‌ ರೈ