ಇನ್ ಫೋಕಸ್: ಹೊಸ ನೀತು
Team Udayavani, Aug 18, 2017, 4:10 PM IST
ಕನ್ನಡ ಚಿತ್ರರಂಗದಲ್ಲಿ ಒಂದೇ ಹೆಸರಿನ ಅನೇಕ ನಾಯಕಿ ನಟಿಯರಿದ್ದಾರೆ. ಆದರೆ, ನೀತು ಹೆಸರಿನ ನಾಯಕಿ ಇದ್ದಿದ್ದು ಒಬ್ಬರೇ. ಆದರೆ ಈಗ ಮತ್ತೂಬ್ಬರು ಬಂದಿದ್ದಾರೆ. ಅಲ್ಲಿಗೆ ಕನ್ನಡ ಚಿತ್ರರಂಗದಲ್ಲಿ ಇಬ್ಬಿಬ್ಬರು ನೀತು ಇದ್ದಂತಾಗಿದೆ. “ಮೇಘ ಅಲಿಯಾಸ್ ಮ್ಯಾಗಿ’ ಎಂಬ ಸಿನಿಮಾವೊಂದು ಬರುತ್ತಿರುವ ವಿಚಾರ ನಿಮಗೆ ಗೊತ್ತೇ ಇರಬಹುದು. ಸುಕೃತಾ ವಾಗೆ ನಾಯಕಿಯಾಗಿರುವ ಈ ಚಿತ್ರದಲ್ಲಿ ಮತ್ತೂಬ್ಬಳು ನಾಯಕಿ ಕೂಡಾ ಇದ್ದಾರೆ. ಅವರು ನೀತು. ಬರೀ ನೀತು ಅಲ್ಲ, ಇವರ ಪೂರ್ಣ ಹೆಸರು ನೀತು ಬಾಲ.
ನೀತು ಬಾಲ ಮೂಲತಃ ಕೇರಳದವರು. ಹಾಗಂತ ಕನ್ನಡ ಬರಲ್ವೆ ಎಂದು ನೀವು ಕೇಳುವಂತಿಲ್ಲ. ಸ್ಪಷ್ಟವಾಗಿ ಕನ್ನಡ ಮಾತನಾಡುವ ನೀತುಗೆ “ಮೇಘ ಅಲಿಯಾಸ್ ಮ್ಯಾಗಿ’ ಮೊದಲ ಚಿತ್ರ. ಅಂದಹಾಗೆ, ಈ ನೀತು ಮೂಲತಃ ಇಂಜಿನಿಯರ್. ಈಗಲೂ ಕೆಲಸ ಮಾಡುತ್ತಿದ್ದಾರೆ. ಕಟ್ಟಡಗಳ, ಮಾಲ್ಗಳ ವಿನ್ಯಾಸ ಮಾಡುವ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ವೃತ್ತಿಗೂ, ಪ್ರವೃತ್ತಿಗೂ ಸಂಬಂಧವಿರೋದಿಲ್ಲ ಎಂಬಂತೆ, ನೀತುಗೆ ಚಿಕ್ಕಂದಿನಲ್ಲೇ ಸಿನಿಮಾ ಆಸಕ್ತಿ ಇತ್ತಂತೆ. ಆ ಆಸಕ್ತಿಗೆ ತಕ್ಕಂತೆ ಅವರಿಗೆ “ಮೇಘ ಅಲಿಯಾಸ್ ಮ್ಯಾಗಿ’ ಚಿತ್ರದಲ್ಲಿ ಅವಕಾಶ ಸಿಕ್ಕಿದೆ. ಇಲ್ಲಿ ಅವರು ತನು ಎಂಬ ಪಾತ್ರ ಮಾಡಿದ್ದಾರೆ. ತುಂಬಾ ಸೂಕ್ಷ್ಮ ಸ್ವಭಾವದ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ಮೊದಲ ಚಿತ್ರದಲ್ಲೇ ಒಳ್ಳೆಯ ಪಾತ್ರ ಸಿಕ್ಕ ಖುಷಿ ಕೂಡಾ ನೀತು ಅವರಿಗಿದೆ. ಕೆಲವರು ಸಿನಿಮಾ ಅವಕಾಶ ಸಿಕ್ಕ ಕೂಡಲೇ ತಮ್ಮ ವೃತ್ತಿ ತೊರೆಯುತ್ತಾರೆ. ಆದರೆ, ನೀತು ಮಾತ್ರ ಅಂತಹ ಕೆಲಸ ಮಾಡಿಲ್ಲ. “ಸಿನಿಮಾಕ್ಕಾಗಿ ಕೆಲಸ ಬಿಟ್ಟಿಲ್ಲ, ಬಿಡೋದು ಇಲ್ಲ. ಒಳ್ಳೆಯ ಅವಕಾಶ ಸಿಕ್ಕರೆ ನಟಿಸುತ್ತೇನೆ, ಇಲ್ಲದಿದ್ದರೆ ನನ್ನ ವೃತ್ತಿಯಲ್ಲಿ ಮುಂದುವರಿಯುತ್ತೇನೆ’ ಎನ್ನುತ್ತಾರೆ.