ಶಿವಾಜಿ ಜಗತ್ತಲ್ಲಿ ರಾಧಿಕಾ ನಾರಾಯಣ್‌

Team Udayavani, Mar 17, 2023, 4:29 PM IST

radhika narayan about shivaji surathkal 2

ನಟಿ ರಾಧಿಕಾ ನಾರಾಯಣ್‌ ಈ ವರ್ಷ “ಶಿವಾಜಿ ಸುರತ್ಕಲ್‌-2′ ಸಿನಿಮಾದ ಮೂಲಕ ಪ್ರೇಕ್ಷಕರ ಮುಂದೆ ಬರುವ ತಯಾರಿಯಲ್ಲಿದ್ದಾರೆ. ಮೂರು ವರ್ಷಗಳ ಹಿಂದೆ ಬಂದಿದ್ದ “ಶಿವಾಜಿ ಸುರತ್ಕಲ್‌’ ಸಿನಿಮಾದ ಮುಂದುವರೆದ ಭಾಗವಾಗಿರುವ “ಶಿವಾಜಿ ಸುರತ್ಕಲ್‌-2′ ಸಿನಿಮಾದಲ್ಲಿ ರಾಧಿಕಾ ನಿರ್ವಹಿಸಿರುವ ಜನನಿ ಪಾತ್ರ ಕೂಡ ಮುಂದುವರೆಯಲಿದೆ.

ವರ್ಷದ ಮೊದಲ ಸಿನಿಮಾದ ಬಗ್ಗೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿರುವ ರಾಧಿಕಾ ನಾರಾಯಣ್‌, “ಶಿವಾಜಿ ಸುರತ್ಕಲ್‌-2′ ಸಿನಿಮಾ ಮತ್ತು ತಮ್ಮ ಪಾತ್ರದ ಬಗ್ಗೆ ಒಂದಷ್ಟು ಮಾತನಾಡಿದ್ದಾರೆ.

“2020ರಲ್ಲಿ ಬಿಡುಗಡೆಯಾಗಿದ್ದ “ಶಿವಾಜಿ ಸುರತ್ಕಲ್‌’ ಸಿನಿಮಾಕ್ಕೆ ತುಂಬ ಒಳ್ಳೆಯ ರೆಸ್ಪಾನ್ಸ್‌ ಸಿಕ್ಕಿತ್ತು. ನನ್ನ ಪಾತ್ರದ ಬಗ್ಗೆಯೂ ಎಲ್ಲರೂ ಮೆಚ್ಚಿ ಮಾತನಾಡಿದ್ದರು. ಈಗ ಮತ್ತೂಮ್ಮೆ “ಶಿವಾಜಿ ಸುರತ್ಕಲ್‌-2′ ಸಿನಿಮಾದಲ್ಲಿ ಅದೇ ಪಾತ್ರದಲ್ಲಿ ಆಡಿಯನ್ಸ್‌ ಮುಂದೆ ಬರುತ್ತಿರುವುದಕ್ಕೆ ಖುಷಿಯಾಗುತ್ತಿದೆ. ನನಗೂ ಸಿನಿಮಾದ ಮೇಲೆ ಮತ್ತು ನನ್ನ ಪಾತ್ರದ ಮೇಲೆ ಸಾಕಷ್ಟು ನಿರೀಕ್ಷೆಯಿದೆ’ ಎನ್ನುವುದು ರಾಧಿಕಾ ನಾರಾಯಣ್‌ ಮಾತು.

“ಕೋವಿಡ್‌ ನಿಂದಾಗಿ “ಶಿವಾಜಿ ಸುರತ್ಕಲ್‌’ ಸಿನಿಮಾಕ್ಕೆ ಥಿಯೇಟರ್‌ನಲ್ಲಿ ಹೆಚ್ಚು ಸಮಯ ಸಿಗದಿದ್ದರೂ, ಬೇರೆ ಬೇರೆ ಪ್ಲಾಟ್‌ಫಾರ್ಮ್ಗಳಲ್ಲಿ “ಶಿವಾಜಿ ಸುರತ್ಕಲ್‌’ ನೋಡಿದ ಆಡಿಯನ್ಸ್‌ ಸಿನಿಮಾದ ಬಗ್ಗೆ ಸಾಕಷ್ಟು ಮೆಚ್ಚುಗೆ ಸೂಚಿಸಿದ್ದರು. ಆಡಿಯನ್ಸ್‌ ಕಡೆಯಿಂದ ಸಿಕ್ಕಿದ ಇಂಥದ್ದೊಂದು ಬಿಗ್‌ ರೆಸ್ಪಾನ್ಸ್‌ “ಶಿವಾಜಿ ಸುರತ್ಕಲ್‌-2′ ಮಾಡೋದಕ್ಕೆ ನಮ್ಮ ತಂಡಕ್ಕೆ ಪ್ರೇರಣೆಯಾಯಿತು. ಈ ಸಿನಿಮಾದಲ್ಲಿ ಶಿವಾಜಿಯ ಮತ್ತೂಂದು ಹೊಸ ಜಗತ್ತಿನ ಅನಾವರಣವಾಗಲಿದೆ. ಮತ್ತೂಮ್ಮೆ “ಶಿವಾಜಿ ಸುರತ್ಕಲ್‌-2′ ಮತ್ತೂಮ್ಮೆ ನಮ್ಮೆಲ್ಲರನ್ನೂ ಒಟ್ಟಾಗಿ ಸೇರುವಂತೆ ಮಾಡಿದೆ’ ಎನ್ನುತ್ತಾರೆ ರಾಧಿಕಾ.

“ಈ ಸಿನಿಮಾದಲ್ಲಿ ಶಿವಾಜಿ ಮತ್ತು ಆತನ ಪತ್ನಿ ಜನನಿ, ಶಿವಾಜಿಯ ಕುಟುಂಬ, ಶಿವಾಜಿಯ ವೈಯಕ್ತಿಕ ವಿಷಯಗಳ ಜೊತೆಗೆ “ಶಿವಾಜಿ ಸುರತ್ಕಲ್‌-2’ನಲ್ಲಿ ಹೊಸ ಕೇಸ್‌ ತೆರೆದುಕೊಳ್ಳುತ್ತದೆ. ಶಿವಾಜಿ ಪತ್ನಿ ಜನನಿ ಪಾತ್ರ ಇಲ್ಲೂ ಮುಂದುವರೆಯುವುದರಿಂದ, ನನ್ನ ಪಾತ್ರದ ಬೇರೆ ಬೇರೆ ಆಯಾಮಗಳೂ ಸಿನಿಮಾದಲ್ಲಿ ತೆರೆದುಕೊಳ್ಳುತ್ತದೆ. ಈಗಾಗಲೇ ಒಮ್ಮೆ ಕೆಲಸ ಮಾಡಿದ ತಂಡದ ಜೊತೆಗೆ ಮತ್ತೂಮ್ಮೆ ಕೆಲಸ ಮಾಡುವ ಅವಕಾಶ ಸಿಕ್ಕಿದ್ದರಿಂದ, ನಟಿಯಾಗಿ ನನಗೂ ತುಂಬ ಕಂಫ‌ರ್ಟ್‌ ಆಗಿತ್ತು’ ಎನ್ನುವುದು ರಾಧಿಕಾ ಮಾತು.

“ನನ್ನ ಪ್ರಕಾರ, “ಶಿವಾಜಿ ಸುರತ್ಕಲ್‌-2′ ಆಡಿಯನ್ಸ್‌ನ ಸೀಟಿನ ತುದಿಯಲ್ಲಿ ಕೂರಿಸುವಂಥ ಸಿನಿಮಾ. ಒಂದೇ ಸಿನಿಮಾದಲ್ಲಿ ಸಸ್ಪೆನ್ಸ್‌, ಕ್ರೈಂ, ಥ್ರಿಲ್ಲರ್‌, ಸೆಂಟಿಮೆಂಟ್‌ ಎಲ್ಲವನ್ನೂ ಹೇಳುವುದು ಕಷ್ಟ. “ಶಿವಾಜಿ ಸುರತ್ಕಲ್‌-2′ ನಲ್ಲಿ ನಿರ್ದೇಶಕ ಆಕಾಶ್‌ ಶ್ರೀವತ್ಸ ಅದೆಲ್ಲವನ್ನೂ ಅಚ್ಚುಕಟ್ಟಾಗಿ ಕಟ್ಟಿಕೊಟ್ಟಿದ್ದಾರೆ. ರಮೇಶ್‌ ಅರವಿಂದ್‌ ಸೇರಿದಂತೆ ಎಲ್ಲ ಕಲಾವಿದರೂ ತಮ್ಮ ಪಾತ್ರದಲ್ಲಿ ಅದ್ಭುತವೆನಿಸುವಂತೆ ಅಭಿನಯಿಸಿದ್ದಾರೆ. ಆಡಿಯನ್ಸ್‌ಗೆ ಖಂಡಿತಾ ಇದೊಂದು ಹೊಸ ಎಕ್ಸ್‌ಪೀರಿಯನ್ಸ್‌ ಕೊಡುವ ಸಿನಿಮಾ’ ಎಂಬ ಭರವಸೆ ವ್ಯಕ್ತಪಡಿಸುತ್ತಾರೆ ರಾಧಿಕಾ ನಾರಾಯಣ್‌.

ಪ್ರೊಪೋಸಲ್‏ಗೆ ನಿರೀಕ್ಷಿಸುತ್ತಿದ್ದೀರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ನೋಂದಣಿ ಉಚಿತ !