ವಿಭಿನ್ನ ಪಾತ್ರಗಳ ಅನ್ವೇಷಿ
Team Udayavani, Sep 22, 2017, 3:41 PM IST
ಸಣ್ಣ ಪಾತ್ರಗಳ ಮೂಲಕವೇ ದೊಡ್ಡ ಕನಸು ಕಾಣುವ ಸಾಕಷ್ಟು ಮಂದಿ ಇದ್ದಾರೆ. ಕನಸಿನ ಜೊತೆಗೆ ಶ್ರಮ ಹಾಕಿದರೆ ಕನಸು ಸಾಕಾರಗೊಳ್ಳುವ ನಂಬಿಕೆ ಅವರದು. ಈ ರಘು ಭಟ್ ಕೂಡಾ ಅದೇ ಸಾಲಿಗೆ ಸೇರುವವರು. ಯಾವ ರಘು ಭಟ್ ಎಂದು ಕೇಳಿದರೆ ತೋರಿಸಲು ದೊಡ್ಡ ಸಿನಿಮಾವಲ್ಲ. ಈಗಷ್ಟೇ ಚಿತ್ರರಂಗದಲ್ಲಿ ಅಲ್ಲೊಂದು-ಇಲ್ಲೊಂದು ಪಾತ್ರ ಮಾಡುತ್ತಾ, ಸಿಕ್ಕ ಪಾತ್ರಗಳಲ್ಲಿ ತಮ್ಮ ಪ್ರತಿಭೆ ತೋರಿಸುತ್ತಾ ಬರುತ್ತಿರುವ ರಘು ಭಟ್ ಸದ್ಯ “ಅನ್ವೇಷಿ’ಯಾಗಿದ್ದಾರೆ. ಹೀಗೆಂದರೆ ನೀವು ಆಶ್ಚರ್ಯಪಡುವ ಅಗತ್ಯವಿಲ್ಲ. “ಅನ್ವೇಷಿ’ ಎಂಬುದು ರಘು ಭಟ್ ನಟಿಸಿರುವ ಹೊಸ ಸಿನಿಮಾ.
ವೇಮಗಲ್ ಜಗನ್ನಾಥ ರಾವ್ ನಿರ್ದೇಶನದ ಈ ಸಿನಿಮಾದಲ್ಲಿ ರಘು ಭಟ್ ಗೆ ಪ್ರಮುಖ ಪಾತ್ರ ಸಿಕ್ಕಿದೆ. ಚಿತ್ರದಲ್ಲಿ ತಿಲಕ್ ಕೂಡಾ ನಟಿಸಿದ್ದಾರೆ. ಹಾಗಾಗಿ, ರಘು ಭಟ್ ಕೂಡಾ “ಅನ್ವೇಷಿ’ಯ ಒನ್ ಆಫ್ ದಿ ಹೀರೋ ಎಂದರೆ ತಪ್ಪಲ್ಲ. ಅವರಿಗೊಂದು ರೊಮ್ಯಾಂಟಿಕ್ ಕೂಡಾ ಇದೆ. ಜೊತೆಗೆ ಖಡಕ್ ಆದ ಪಾತ್ರ ಕೂಡಾ ಸಿಕ್ಕಿದೆ. ಇವೆಲ್ಲದರಿಂದ ರಘು ಭಟ್ ಖುಷಿಯಾಗಿರೋದು ಸುಳ್ಳಲ್ಲ. ಸದ್ಯ ರಘು ಭಟ್ಗೆ ಸಿನಿಮಾಗಳಿಂದ ಒಂದಷ್ಟು ಅವಕಾಶ ಬರುತ್ತಿರೋದು ಸುಳ್ಳಲ್ಲ. ಒಳ್ಳೆಯ ಪಾತ್ರಗಳ ಮೂಲಕ ಗುರುತಿಸಿಕೊಳ್ಳಬೇಕೆಂಬ ಆಸೆ ರಘು ಅವರಿಗಿದೆ.
ರವಿ ರೈ