ತಲೆನೋವಾ? ತಲೆ ಕೆಡಿಸ್ಕೋಬೇಡಿ…

Team Udayavani, Oct 30, 2019, 3:56 AM IST

ಬೆಳಗ್ಗೆದ್ದರೆ ಮನೆಕೆಲಸ, ಮಕ್ಕಳ ಕಿರಿಕಿರಿ, ಗಂಡನ ಗಡಿಬಿಡಿ, ಆಫೀಸಿನಲ್ಲಿ ಬಾಸ್‌ ಕೊಡುವ ಟಾಸ್ಕ್ಗಳು. ಇವನ್ನೆಲ್ಲ ಮುಗಿಸಿ ಮತ್ತೆ ಸಂಜೆ ಬಂದಾಗ ಅದೇ ಮನೆಗೆಲಸ… ಔದ್ಯೋಗಿಕ ಮಹಿಳೆಯ ಒತ್ತಡದ ಬದುಕು ಅನೇಕ ಸಲ ತಲೆಚಿಟ್ಟು ಹಿಡಿಸುವಂತೆ ಮಾಡುತ್ತದೆ. ತಲೆನೋವನ್ನು ಸೃಷ್ಟಿಸುತ್ತದೆ. ಆಗಿಂದಾಗ್ಗೆ ಬರುವ ಈ ತಲೆನೋವನ್ನು ಸುಲಭದಲ್ಲಿ ಓಡಿಸುವುದು ಹೇಗೆ? ಹತ್ತೇ ನಿಮಿಷದಲ್ಲಿ ಮೊದಲಿನಂತಾಗುವುದು ಹೇಗೆ?

-ಮೂರ್ನಾಲ್ಕು ಹನಿ ಲವಂಗದ ಎಣ್ಣೆಗೆ, ಒಂದೂವರೆ ಚಮಚ ಕೊಬ್ಬರಿ ಎಣ್ಣೆಯನ್ನು ಬೆರೆಸಿಕೊಂಡು, ಹಣೆಗೆ ಚೆನ್ನಾಗಿ ಮಸಾಜ್‌ ಮಾಡಿಕೊಳ್ಳಬೇಕು. ಹತ್ತೇ ನಿಮಿಷದಲ್ಲಿ ತಲೆನೋವು ಓಡಿಹೋಗುತ್ತದೆ.

-ಅಡಿಕೆ-ವೀಳ್ಯದೆಲೆಯನ್ನು ಚೆನ್ನಾಗಿ ಜಜ್ಜಿ ಪೇಸ್ಟ್‌ ಮಾಡಿ, ಅದನ್ನು ಹಣೆಗೆ ಹಚ್ಚಿಕೊಂಡರೆ, ಆರಾಮದಾಯಕ ಅನುಭವವಾಗುತ್ತದೆ. ವಿಕ್ಸ್‌ , ಝಂಡೂಬಾಮ್‌ನಂತೆ ತಲೆನೋವನ್ನು ಹೀರಿಕೊಳ್ಳುವ ಶಕ್ತಿ ಈ ಪೇಸ್ಟ್‌ಗಿರುತ್ತದೆ.

-ಎರಡು ಹನಿ ಪುದೀನ ಎಣ್ಣೆಗೆ, ತುಸು ಬಾದಾಮಿ ಎಣ್ಣೆಯನ್ನು ಮಿಕ್ಸ್‌ ಮಾಡಿ, ಹಣೆಗೆ ಚೆನ್ನಾಗಿ ಹಚ್ಚಿಕೊಂಡರೆ ರಿಲ್ಯಾಕ್ಸ್‌ ಸಿಗುತ್ತದೆ. ತಲೆ ಹಗುರವಾದಂತೆ ಅನ್ನಿಸುತ್ತದೆ.

-ತುಳಸಿ ಎಲೆಗಳನ್ನು ಚೆನ್ನಾಗಿ ಕುದಿಸಿ, ಆ ನೀರಿಗೆ ಜೇನುತುಪ್ಪ ಬೆರೆಸಿ, ಕುಡಿದರೆ ಮೆದುಳಿಗೆ ರಕ್ತಸಂಚಾರ ಸುಗಮಗೊಂಡು, ತಲೆನೋವು ನಿವಾರಣೆಯಾಗುತ್ತದೆ.

-ನಿಶ್ಶಬ್ದ ಜಾಗದಲ್ಲಿ ಕುಳಿತು, ಹತ್ತಿಪ್ಪತ್ತು ನಿಮಿಷ “ಕೋಳಿನಿದ್ರೆ’ ಮಾಡಿದರೂ ತಲೆನೋವು ನಿವಾರಣೆಯಾಗುತ್ತದೆ.