ಮೇರಿ ಸೀರೆ ಉಟ್ಟ ಕತೆ!

Team Udayavani, Aug 16, 2017, 2:51 PM IST

‘ನಿಮ್ಮನ್ನು ನೋಡಿ ಸಿನಿಮಾದಲ್ಲಿ ಗೌರಿಯೇನೋ ಹೊಟ್ಟೆಕಿಚ್ಚು ಪಟ್ಟಳು. ಆದರೆ, ಗೌರಿಯನ್ನು ನೋಡಿ ನಿಮಗೆ ಹೊಟ್ಟೆ ಕಿಚ್ಚಾಗಿತ್ತೇ?’
‘ನಿಜಕ್ಕೂ ಆಗಿತ್ತು… ಅವಳ ಸೀರೆಯನ್ನು ನೋಡಿ, ಆ ಸೀರೆಯಲ್ಲಿ ಅವಳ ಅಂದವನ್ನು ನೋಡಿ…’! 

‘ಲಗಾನ್‌’ ಚಿತ್ರ ತೆರೆಕಂಡ ಸಂದರ್ಭದಲ್ಲಿ ಬ್ರಿಟಿಷ್‌ ರಾಜಕುಮಾರಿಯಾಗಿ ಕಾಣಿಸಿಕೊಂಡ ರೇಚೆಲ್‌ ಶೆಲ್ಲಿ ಒಮ್ಮೆ ಸಂದರ್ಶನದಲ್ಲಿ ಹೀಗೆ ಹೇಳಿಕೊಂಡಿದ್ದರು. ಅಲ್ಲಿ ದೇಸಿ ನಾಯಕಿಯಾಗಿ ಗೌರಿಯನ್ನು ಕಂಡು ಈ ವಿದೇಶಿ ನಾಯಕಿ ಕರುಬಿದ ಕತೆ ಹಳೆಯದಾಯಿತು ಬಿಡಿ. ಬಿಳಿ ಗೌನು, ಸ್ಕರ್ಟು, ಪ್ಯಾಂಟು, ಬಿಕಿನಿಯಂಥ ಆಕರ್ಷಕ, ಒನಪು ತೋರ್ಪಡಿಸುವ ಉಡುಗೆಗಳನ್ನು ವಿದೇಶಿ ಮಹಿಳೆ ತೊಟ್ಟರೂ, ಆಕೆಯ ಒಂದು ಕಣ್ಣು ಮಾತ್ರ ಸೀರೆ ಮೇಲೆ ಇದ್ದೇ ಇದೆ. ಆ ದೃಷ್ಟಿ ಮತ್ತೆ ಈಗ ಸುದ್ದಿಮಾಡಿದೆ. ಈ ಸಲ ಸೀರೆಯ ಹುಚ್ಚು ಹಿಡಿದಿದ್ದು, ಭಾರತದಲ್ಲಿನ ಅಮೆರಿಕ ರಾಯಭಾರಿ ಮೇರಿ ಕಾರ್ಲ್ಸನ್‌ಗೆ.

ಭಾರತದ ಸ್ವಾತಂತ್ರ್ಯೋತ್ಸವ ಸಮಾರಂಭಕ್ಕೆ ಅವರು ಸೀರೆ ಉಡಬೇಕಿತ್ತಂತೆ. ಆದರೆ, ಯಾವ ಸೀರೆ ಉಡುವುದು ಎನ್ನುವ ಕನ್‌ಫ್ಯೂಶನ್‌ ಅವರನ್ನು ಕಾಡಿತ್ತು. ಟ್ವಿಟ್ಟರಿನಲ್ಲಿ ‘ಸಾರಿ ಸರ್ಚ್‌’ ಎಂಬ ಹ್ಯಾಶ್‌ಟ್ಯಾಗ್‌ ಸೃಷ್ಟಿಸಿದ ಅವರು, ಜಮಾªನಿ, ಕಾಂಜೀವರಂ, ತುಸ್ಸಾರ್‌, ಡುಪಿಯಾನ್‌ ಸೀರೆಯುಟ್ಟು ಫೋಟೊ ಅಪ್‌ಲೋಡ್‌ ಮಾಡಿ, “ಇವುಗಳಲ್ಲಿ ನಾನು ಯಾವುದನ್ನು ಧರಿಸಲಿ?’ ಎಂದು ನೆಟ್ಟಿಗರನ್ನು ಕೇಳಿದ್ದಾರೆ. ಸಹಸ್ರಾರು ಅನುಯಾಯಿಗಳು, ಬೇರೆ ಬೇರೆ ಸೀರೆಯ ಹೆಸರು ಹೇಳಿ, “ಇದು ನಿಮ್ಗೆ ಒಪ್ಪುತ್ತೆ’ ಎಂಬ ಸಲಹೆ ಕೊಟ್ಟಿದ್ದಾರೆ. 
ಇದಪ್ಪಾ, ಸೀರೆಯ ಸೆಳೆತ ಅಂದ್ರೆ..!