ಮುಂಜಾವದಂಥ ಮಂಜರಿ!
Team Udayavani, Jan 26, 2018, 1:53 PM IST
ದೇಶಸೇವೆ ಮಾಡುವ ಸೈನಿಕರಿಗೂ ಸಿನೆಮಾರಂಗಕ್ಕೂ ನೇರವಾದ ನಂಟು ಇಲ್ಲದಿರಬಹುದು. ಆದರೆ ಹಲವು ಸೈನಿಕರ ಮಕ್ಕಳು ಸಿನೆಮಾ ರಂಗಕ್ಕೆ ಬಂದು ಮಿಂಚುತ್ತಿದ್ದಾರೆ. ಈ ಸಾಲಿಗೆ ಇನ್ನೊಂದು ಸೇರ್ಪಡೆ ಮಂಜರಿ ಫಡ್ನಿಸ್. ಹಾಗೆಂದು ಮಂಜರಿ ಬಾಲಿವುಡ್ಗೆ ಹೊಸಬಳೇನೂ ಅಲ್ಲ. ಅವಳು ಬಣ್ಣಹಚ್ಚ ತೊಡಗಿ ಆಗಲೇ ಹತ್ತು ವರ್ಷವಾಗಿದೆ. ಹಿಂದಿ ಮಾತ್ರವಲ್ಲದೆ ತಮಿಳು, ತೆಲುಗು, ಮಲಯಾಳ, ಕನ್ನಡ, ಬಂಗಾಲಿ ಎಂದು ಎಲ್ಲ ಪ್ರಮುಖ ಚಿತ್ರರಂಗಗಳಿಗೆ ಒಂದು ಸುತ್ತು ಬಂದು ಇದೀಗ ಪ್ರಾರಂಭಿಸಿದಲ್ಲಿಗೆ ಅಂದರೆ ಬಾಲಿವುಡ್ಗೆ ವಾಪಸಾಗಿದ್ದಾಳೆ.
ಬಾಲಿವುಡ್ನಲ್ಲಿ ಪ್ರೊಫೆಶನಲ್ ನೆಟ್ವರ್ಕ್ ಎಂಬುದೊಂದಿದೆ. ಅಂದರೆ, ಚಿತ್ರಗಳನ್ನು ಬುಟ್ಟಿಗೆ ಹಾಕಿಕೊಳ್ಳಲು ಯಾರ ಜತೆಗೆ ಸಂಪರ್ಕ ಇಟ್ಟುಕೊಳ್ಳಬೇಕು, ಹೇಗೆ ಸದಾ ಸುದ್ದಿಯಲ್ಲಿರಬೇಕು, ಸಿನೆಮಾ ಪಾರ್ಟಿಗಳಲ್ಲಿ ಹೇಗೆ ಮಿಂಚುವುದು ಇತ್ಯಾದಿ ವಿಚಾರಗಳನ್ನು ವೃತ್ತಿಪರವಾಗಿ ಮಾಡುವುದು. ಈ ಪ್ರೊಫೆಶನಲ್ ನೆಟ್ವರ್ಕ್ ಇಲ್ಲದಿದ್ದರೆ ಎಷ್ಟೇ ಪ್ರತಿಭೆ, ಗ್ಲಾಮರ್ ಇದ್ದರೂ ಮಿಂಚುವುದು ಸುಲಭವಲ್ಲ. ಈ ಪ್ರೊಫೆಶನಲ್ ನೆಟ್ವರ್ಕ್ ಇಲ್ಲದಿರುವುದೇ ತಾನು ಹಿಂದುಳಿಯಲು ಕಾರಣ ಎನ್ನುವುದು ಮಂಜರಿಯ ಅಭಿಮತ. ಎಳೆಯ ಪ್ರಾಯದಲ್ಲೇ ನಟಿಸಲು ತೊಡಗಿದ್ದರೂ ಸ್ವತಃ ಮಾರ್ಕೆಟಿಂಗ್ ಮಾಡಿಕೊಳ್ಳಲು ಗೊತ್ತಿಲ್ಲದಿರುವುದರಿಂದ ಮಂಜರಿಗೆ ಚಿತ್ರರಂಗದಲ್ಲಿ ನಿರೀಕ್ಷಿತ ಸಾಧನೆ ಮಾಡಲು ಸಾಧ್ಯವಾಗಿಲ್ಲವಂತೆ. ಹಾಗೆಂದು, ಅವಳಿಗೆ ಈ ಕುರಿತು ಬೇಸರವೇನೂ ಇಲ್ಲ. ಪಾತ್ರಗಳಿಗಾಗಿ ನಿರ್ದೇಶಕರ ಬಳಿಗೆ ಹೋಗಿ ಗೋಗರೆಯುವುದು, ಅವರಿವರ ಹೆಸರು ಹೇಳಿಕೊಂಡು ಹೋಗುವುದೆಲ್ಲ ಮಂಜರಿ ಸ್ವಭಾವಕ್ಕೆ ಆಗುವುದಿಲ್ಲ. ಹೀಗಾಗಿ, ಸಿಕ್ಕಿದ ಅವಕಾಶಗಳಲ್ಲೇ ಅವಳು ತೃಪ್ತಳು.
ಹೊಸಬರನ್ನು ನಡೆಸಿಕೊಳ್ಳುವ ಮಟ್ಟಿಗೆ ಬಾಲಿವುಡ್ಗಿಂತ ತಮಿಳು ಮತ್ತು ತೆಲುಗು ಚಿತ್ರರಂಗ ಎಷ್ಟೋ ವಾಸಿ ಎನ್ನುವುದು ಮಂಜರಿಯ ಅನುಭವದ ಮಾತು. ಭಾಷೆ ತಿಳಿದಿರದಿದ್ದರೂ ತೆಲುಗು ಮತ್ತು ತಮಿಳಿನಲ್ಲಿ ಬೆನ್ನುಬೆನ್ನಿಗೆ ಅವಕಾಶ ಕೊಟ್ಟು ಪ್ರೋತ್ಸಾಹಿಸಿದ್ದಾರೆ. ತಮಿಳಿನಲ್ಲಿ ಒಂದು ಹಾಡನ್ನೂ ಹಾಡಿಸಿದ್ದಾರೆ. ಆದರೆ ಬಾಲಿವುಡ್ನಲ್ಲಿ ಇಷ್ಟು ವರ್ಷಗಳಾದರೂ ಹೇಳಿಕೊಳ್ಳುವಂತಹ ಒಂದು ಪಾತ್ರ ಸಿಕ್ಕಿಲ್ಲ ಎಂಬ ಕೊರಗು ಮಂಜರಿಗಿದೆ. ರೋಕ್ ಸಕೊ ತೋ ರೋಕ್ ಲೋ ಮಂಜರಿ ನಟಿಸಿದ ಮೊದಲ ಹಿಂದಿ ಚಿತ್ರ. ಆದರೆ ಅವಳು ಗಮನ ಸೆಳೆದದ್ದು ಜಾನೆ ತು… ಜಾನೆ ನ ಚಿತ್ರದಲ್ಲಿ. ಅನಂತರ ಮುಂಬಯಿ ಸಾಲ್ಸಾ, ಐ ಆ್ಯಮ್ 24, ಝೊಕ್ಕೊಮೋನ್, ಗ್ರ್ಯಾಂಡ ಮಸ್ತಿ, ವಾರ್ನಿಂಗ್, ಕಿಸ್ ಕಿಸ್ಕೊ ಪ್ಯಾರ್ ಕರೂಂ, ವಾಹ್ ತಾಜ್, ಜೀನಾ ಇಸಿ ಕಾ ನಾಮ್ ಹೈ ಮತ್ತಿತರ ಚಿತ್ರಗಳಲ್ಲಿ ನಟಿಸಿದರೂ ಹೇಳಿಕೊಳ್ಳುವಂತಹ ಪ್ರಯೋಜನವೇನೂ ಆಗಿಲ್ಲ. ಇದೀಗ ನಿರ್ದೋಷ್ ಎನ್ನುವ ಚಿತ್ರದಲ್ಲಿ ಪೂರ್ಣ ಪ್ರಮಾಣದ ನಾಯಕಿಯಾಗುವ ಅವಕಾಶ ಸಿಕ್ಕಿದೆ. ಈ ಚಿತ್ರ ಗೆದ್ದರೆ ಮಂಜರಿ ಎಂಬ ನಟಿ ಬಾಲಿವುಡ್ನಲ್ಲಿ ಇನ್ನಷ್ಟು ವರ್ಷ ಬದುಕಿಯಾಳು.