ಜೋರಾಗಿದೆ ಅನುಷ್ಕಾ ಶರ್ಮಾ ಪ್ರಭಾವಳಿ!

Team Udayavani, Oct 4, 2019, 4:51 AM IST

ಸುಮಾರು ಒಂದೂವರೆ ವರ್ಷಗಳಿಂದ ಅನುಷ್ಕಾ ಶರ್ಮಾ ಅಭಿನಯದ ಯಾವ ಹೊಸ ಚಿತ್ರಗಳೂ ಅನೌನ್ಸ್‌ ಆಗಿಲ್ಲ. ಝೀರೋ ಚಿತ್ರದ ಬಳಿಕ ಅನುಷ್ಕಾ ಹೀರೋಯಿನ್‌ ಆಗಿ ಅಭಿನಯಿಸಿರುವ ಯಾವ ಚಿತ್ರಗಳೂ ತೆರೆಗೆ ಬಂದಿಲ್ಲ. ಇದರ ನಡುವೆ ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಅವರನ್ನು ಮದುವೆಯಾದ ಬಳಿಕ ಅನುಷ್ಕಾ ಅವರನ್ನು ಬಾಲಿವುಡ್‌ ಅಂಗಳದಲ್ಲೂ ನೋಡುವುದು ಕೂಡ ಅಪರೂಪ ಎನ್ನುತ್ತಿದ್ದಾರೆ ಸಿನಿ ಪ್ರಿಯರು. ಆದರೆ, ಇಷ್ಟೆಲ್ಲ ಇದ್ದರೂ, ಅನುಷ್ಕಾ ಶರ್ಮಾಗೆ ಇರುವ ಜನಪ್ರಿಯತೆ, ಬೇಡಿಕೆ ಮಾತ್ರ ಕಿಂಚಿತ್ತೂ ಕಡಿಮೆಯಾಗಿಲ್ಲ ಎನ್ನುತ್ತಿವೆ ಬಾಲಿವುಡ್‌ ಮೂಲಗಳು.

ಹೌದು, ಮದುವೆಯ ಬಳಿಕ ಅನುಷ್ಕಾ ಶರ್ಮಾ ಯಾವ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳಲಿದ್ದರೂ, ಅವರ ಜನಪ್ರಿಯತೆ ಮತ್ತು ಅವರಿಗಿರುವ ಬೇಡಿಕೆ ಹೆಚ್ಚುತ್ತಲೇ ಇದೆ. ಇದಕ್ಕೆ ತಾಜಾ ಉದಾಹರಣೆ ಎನ್ನುವಂತೆ, ಇತ್ತೀಚೆಗೆ ಫಾರ್ಚೂನ್‌ ಇಂಡಿಯಾ ಸಂಸ್ಥೆ ಪಟ್ಟಿಮಾಡಿರುವ 2019ರ ಮೋಸ್ಟ್‌ ಪವರ್‌ಫ‌ುಲ್‌ ವುಮೆನ್‌ ಲೀಸ್ಟ್‌ನಲ್ಲಿಯೂ ಅನುಷ್ಕಾ ಶರ್ಮಾ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ.

ಇನ್ನು 2019ರ ಫಾರ್ಚುನ್‌ ಇಂಡಿಯಾದ ಮೋಸ್ಟ್‌ ಪವರ್‌ಫ‌ುಲ್‌ ವುಮೆನ್‌ ಲೀಸ್ಟ್‌ನಲ್ಲಿ ಅನುಷ್ಕಾ 39ನೇ ಸ್ಥಾನ ಪಡೆದುಕೊಂಡಿದ್ದು, ಈ ಲೀಸ್ಟ್‌ನಲ್ಲಿರುವ ಬಾಲಿವುಡ್‌ನ‌ ಏಕೈಕ ಪವರ್‌ಫ‌ುಲ್‌ ವುಮೆನ್‌ ಎನ್ನುವ ಖ್ಯಾತಿಯೂ ಅನುಷ್ಕಾ ಶರ್ಮಾ ಮುಡಿಗೇರಿದೆ. ಅನುಷ್ಕಾ ಶರ್ಮಾ ಕೇವಲ ನಟಿಯಾಗಿ ಉಳಿಯದೆ, ರೂಪದರ್ಶಿಯಾಗಿ ಪ್ರತಿಷ್ಠಿತ ಕಂಪೆನಿಗಳ ಪ್ರಚಾರ ರಾಯಭಾರಿಯಾಗಿ ಗುರುತಿಸಿಕೊಂಡಿದ್ದು, ನಿರ್ಮಾಪಕಿಯಾಗಿ ಕಡಿಮೆ ಬಜೆಟ್‌ನಲ್ಲಿ ಚಿತ್ರಗಳನ್ನು ನಿರ್ಮಿಸಿದ ಹೆಗ್ಗಳಿಕೆಯೂ ಅವರಿಗೆ ಇದೆ. ಅಲ್ಲದೆ ಬಾಲಿವುಡ್‌ ಬಾಕ್ಸಾಫೀಸ್‌ನಲ್ಲಿಯೂ ಅನುಷ್ಕಾ ಶರ್ಮಾ ನಿರ್ಮಾಣದ ಚಿತ್ರಗಳು ಉತ್ತಮ ಗಳಿಕೆ ಕಂಡಿರುವುದರಿಂದ, ಈ ಎಲ್ಲಾ ಮಾನದಂಡಗಳ ಅಡಿಯಲ್ಲಿ ಅನುಷ್ಕಾ ಶರ್ಮಾ 2019ರ ಫಾರ್ಚೂನ್‌ ಇಂಡಿಯಾದ ಮೋಸ್ಟ್‌ ಪವರ್‌ಫ‌ುಲ್‌ ವುಮೆನ್‌ ಲಿಸ್ಟ್‌ ನಲ್ಲಿ ಸ್ಥಾನ ಗಿಟ್ಟಿಸಿ ಕೊಂಡಿದ್ದಾರೆ ಎನ್ನಲಾಗುತ್ತಿದೆ.

ಅದೇನೆ ಇರಲಿ, ಸಾಮಾನ್ಯವಾಗಿ ಬಾಲಿವುಡ್‌ನ‌ಲ್ಲಿ ನಾಯಕ ನಟಿಯರು ಮದುವೆಯಾಗುತ್ತಿದ್ದಂತೆ ಜನಪ್ರಿಯತೆ ಕಳೆದುಕೊಂಡು ಬಣ್ಣದ ಲೋಕದಿಂದ ಸಾಂಸಾರಿಕ ಬದುಕಿನತ್ತ ಮುಖ ಮಾಡುತ್ತಿರುವಾಗ, ಅನುಷ್ಕಾ ಶರ್ಮಾ ಮಾತ್ರ ಬಿಗ್‌ ಸ್ಕ್ರೀನ್‌ ಮೇಲೆ ಕಾಣಿಸಿಕೊಳ್ಳದಿದ್ದರೂ, ಅದೇ ಜನಪ್ರಿಯತೆಯನ್ನು ಉಳಿಸಿಕೊಂಡು ಮೋಸ್ಟ್‌ ಪವರ್‌ಫ‌ುಲ್‌ ವುಮೆನ್‌ ಆಗಿ ಗುರುತಿಸಿ ಕೊಳ್ಳುತ್ತಿರುವುದು ಸೊಜಿಗದ ಸಂಗತಿಯೇ ಸರಿ.