ಶ್ರೀದೇವಿ ಕುಮಾರಿ

Team Udayavani, Jan 24, 2019, 5:37 PM IST

ದೊಡ್ಡವರ ಮಕ್ಕಳಾಗಿ ಹುಟ್ಟುವುದು ಕಷ್ಟ ಎಂಬುದು ಸಿನೆಮಾ ಕ್ಷೇತ್ರಕ್ಕೂ ಅನ್ವಯವಾಗುವ ಮಾತು. ಆದರೆ, ಸಿನೆಮಾದಲ್ಲಿ ವಿವಾದಕ್ಕೆ ಒಳಗಾಗುವುದು ಅಥವಾ ಜನರ ಮಾತಿಗೆ ಆಹಾರವಾಗುವುದು ಕೂಡ ಪ್ರಚಾರದ ಒಂದು ವೈಖರಿಯೇ ಆಗಿದೆ. ಉದಾಹರಣೆಗೆ ಜಾನ್ವಿ ಕಪೂರ್‌ಳನ್ನೇ ನೋಡಿ. ಹೇಳಿಕೇಳಿ ಬಾಲಿವುಡ್‌ನ‌ಲ್ಲಿ ಒಂದು ಕಾಲದಲ್ಲಿ ಉನ್ನತ ಸ್ಟಾರಿಣಿಯಾಗಿ ಮೆರೆದು ದಾರುಣ ಸಾವನ್ನಪ್ಪಿದ ಶ್ರೀದೇವಿಯ ಮಗಳು. ಅಪ್ಪ ಬೋನಿ ಕಪೂರ್‌. ಕರಣ್‌ ಜೋಹರ್‌ನ ಧಡಕ್‌ನ ಮೂಲಕ ತೆರೆ ಪ್ರವೇಶವೂ ಆಯಿತು.

ಶ್ರೀದೇವಿಕುಮಾರಿಗೆ ಹೋದಲ್ಲೆಲ್ಲ ಅಭಿಮಾನಿಗಳು, ಸುತ್ತುವರೆಯುವ ಕೆಮರಾಗಳು. ಆದರೆ, ವಿಷಯ ಅದಲ್ಲ, ಅದೇ ಹೊತ್ತಿಗೆ ತೆರೆ ಪ್ರವೇಶ ಮಾಡಿದ ಮತ್ತೂಬ್ಬಳಿದ್ದಾಳೆ. ಸಾರಾ ಅಲಿಖಾನ್‌. ಅವಳು ಕೂಡಾ ಸುಪ್ರಸಿದ್ಧ ಸ್ಟಾರ್‌ ಸೈಫ್ ಅಲಿಖಾನನ ಮಗಳು. ತಾಯಿ ಕರೀನಾ ಕಪೂರ್‌ ಅಲ್ಲ, ಅಮೃತಾ ಸಿಂಗ್‌! ಅವಳು ಕೇದಾರ್‌ನಾಥ್‌ ಮತ್ತು ಸಿಂಬಾ ಚಿತ್ರಗಳ ಮೂಲಕ ತೆರೆಯ ಮೇಲೆ ಉದ್ಭವವಾದವಳು. ಈಗ ಚಿತ್ರಾಭಿಮಾನಿಗಳು ಇಬ್ಬರನ್ನು ತೌಲನಿಕವಾಗಿ ನೋಡುತ್ತಾರೆ. ಕೆಲವರು ಅವಳನ್ನು ಇವಳೆಂದೂ, ಇವಳನ್ನು ಅವಳೆಂದೂ ಭಾವಿಸಿ ಎಡವಟ್ಟು ಮಾಡಿಕೊಳ್ಳುತ್ತಾರೆ.

ಉದಾಹರಣೆಗೆ ನೋಡಿ, ಜಾನ್ವಿ ಕಪೂರ್‌ ನೇಹಾ ದೂಫಿಯಾಳ ಟಾಕ್‌ ಶೋಗೆ ಬಂದಿದ್ದಳು. ವಾಹನದಿಂದ ಇಳಿದದ್ದೇ ಅವಳನ್ನು ಕೆಮರಾಗಳು ಸುತ್ತುವರಿದವು. ಒಬ್ಬ ಫೊಟೋಗ್ರಾಫ‌ರ್‌ನಂತೂ “ಹಲೊ ಸಾರಾ ಅಲಿಖಾನ್‌’ ಎಂದುಬಿಟ್ಟ. ಜಾನ್ವಿಗೆ ಸಿಟ್ಟು ಬರಲಿಲ್ಲ. ಕಸಿವಿಸಿಯಾಯಿತು. ನಗುವನ್ನು ತೋರಿಸುತ್ತ ಒಳಗೆ ನಡೆದಳು. ಇಬ್ಬರನ್ನೂ ತೆರೆಯ ಮೇಲೆ ಪರಿಚಯಿಸಿದ ಕರಣ್‌ ಜೋಹರ್‌ ಈ ಬಗ್ಗೆ ಹೇಳುವುದು ಹೀಗೆ: ಇಬ್ಬರೂ ಅಭಿನೇತ್ರಿಯರು. ಅವರವರ ವ್ಯಕ್ತಿತ್ವ ಅವರವರಿಗೆ. ವೃಥಾ ಗೊಂದಲ ಏಕೆ?