ರುಚಿಕರ ನಿಪ್ಪಟ್ಟು-ವಡೆಗಳು

Team Udayavani, Aug 9, 2019, 5:00 AM IST

ಮಳೆಗಾಲ ಪ್ರಾರಂಭವಾದೊಡನೆ ಸಾಮಾನ್ಯವಾಗಿ ಸಂಜೆಯ ಕಾಫಿಗೆ ಏನಾದರು ಕರುಂಕುರು ಬೇಕೆಂದು ಮನ ಬಯಸುತ್ತದೆ. ಇಲ್ಲಿವೆ ಕೆಲವು ರಿಸಿಪಿಗಳು.

ಕ್ಯಾರೆಟ್‌ ವಡೆ
ಬೇಕಾಗುವ ಸಾಮಗ್ರಿ: ಕ್ಯಾರೆಟ್‌ತುರಿ- ಆರು ಚಮಚ, ಮೈದಾ- ಎರಡು ಚಮಚ, ಪುಟಾಣಿ ಕಡ್ಲೆ- ನಾಲ್ಕು ಚಮಚ, ಚಿರೋಟಿರವೆ- ನಾಲ್ಕು ಚಮಚ, ಅಕ್ಕಿಹುಡಿ- ಆರು ಚಮಚ, ಕಡ್ಲೆಹುಡಿ- ಆರು ಚಮಚ, ಹೆಚ್ಚಿದ ಹಸಿಮೆಣಸು- ಮೂರು, ಶುಂಠಿತರಿ- ಮೂರು ಚಮಚ, ಇಂಗು- ಸುವಾಸನೆಗಾಗಿ, ಹೆಚ್ಚಿದ ಕೊತ್ತಂಬರಿಸೊಪ್ಪು- ಆರು ಚಮಚ, ಉಪ್ಪು ರುಚಿಗೆ.

ತಯಾರಿಸುವ ವಿಧಾನ: ಕ್ಯಾರೆಟ್‌ನ್ನು ಸಣ್ಣಗೆ ತುರಿದು ಮಿಕ್ಸಿಂಗ್‌ ಬೌಲ್‌ಗೆ ಹಾಕಿ. ಇದಕ್ಕೆ ಶುಂಠಿತರಿ, ಹಸಿಮೆಣಸು, ಇಂಗು ಹಾಗೂ ಮೇಲೆ ತಿಳಿಸಿದ ಎಲ್ಲಾ ಸಾಮಗ್ರಿಗಳು ಹಾಗೂ ಸ್ವಲ್ಪ ನೀರು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ನಂತರ, ನಾಲ್ಕು ಚಮಚ ಬಿಸಿ ಎಣ್ಣೆ ಹಾಕಿ ಪುನಃ ಹಿಟ್ಟನ್ನು ಚೆನ್ನಾಗಿ ಮಿಶ್ರಮಾಡಿ, ನಿಪ್ಪಟ್ಟಿನ ಹದಕ್ಕೆ ತಯಾರಿಸಿ. ನಂತರ, ಸಣ್ಣ ಲಿಂಬೆಗಾತ್ರದ ಉಂಡೆ ಮಾಡಿ ಪ್ಲಾಸ್ಟಿಕ್‌ ಹಾಳೆಗೆ ಎಣ್ಣೆ ಸವರಿ ತೆಳ್ಳಗೆ ತಟ್ಟಿ, ಕಾದ ಎಣ್ಣೆಯಲ್ಲಿ ಹದವಾಗಿ ಕರಿಯಿರಿ. ಸಂಜೆ ಹೊತ್ತಿಗೆ ಟೀಯೊಂದಿಗೆ ಸವಿಯಲು ಬಹಳ ರುಚಿ.

ಸಿರಿಧಾನ್ಯದ ವಡೆ
ಬೇಕಾಗುವ ಸಾಮಗ್ರಿ: ಸಿರಿಧಾನ್ಯ ಬರಗು- ಅರ್ಧ ಕಪ್‌, ಅಕ್ಕಿ ಹುಡಿ- ಒಂದು ಕಪ್‌, ಮೈದಾಹುಡಿ- ಆರು ಚಮಚ, ಚಿರೋಟಿ ರವೆ- ನಾಲ್ಕು ಚಮಚ, ಕಡ್ಲೆಹುಡಿ- ಅರ್ಧ ಕಪ್‌, ತೆಂಗಿನತುರಿ- ಎಂಟು ಚಮಚ, ಹಸಿಮೆಣಸು- ಒಂದು, ಖಾರಪುಡಿ- ಒಂದು ಚಮಚ, ಕೆಂಪುಮೆಣಸು- ಎರಡು, ಹೆಚ್ಚಿದ ಕರಿಬೇವು ಮತ್ತು ಕೊತ್ತಂಬರಿಸೊಪ್ಪು- ಎಂಟು ಚಮಚ, ಹುರಿದು ಸಿಪ್ಪೆತೆಗೆದ ಶೇಂಗಾತರಿ- ಎಂಟು ಚಮಚ, ಜೀರಿಗೆ ಮತ್ತು ಇಂಗು ಸ್ವಲ್ಪ, ಉಪ್ಪು ರುಚಿಗೆ.

ತಯಾರಿಸುವ ವಿಧಾನ: ತೆಂಗಿನತುರಿಗೆ ಕರಿಬೇವು, ಕೆಂಪುಮೆಣಸು, ಜೀರಿಗೆ, ಇಂಗು ಮತ್ತು ಉಪ್ಪು ಸೇರಿಸಿ ರುಬ್ಬಿ ಮಿಕ್ಸಿಂಗ್‌ ಬೌಲ್‌ಗೆ ಹಾಕಿ. ಬರಗುವನ್ನು ಹುರಿದು ಪುಡಿಮಾಡಿ ಇದಕ್ಕೆ ಸೇರಿಸಿ. ನಂತರ ಇದಕ್ಕೆ ಅಕ್ಕಿಹುಡಿ ಮತ್ತು ಮೇಲೆ ತಿಳಿಸಿದ ಎಲ್ಲಾ ಸಾಮಗ್ರಿಗಳನ್ನು ಸೇರಿಸಿ ಮಿಶ್ರಮಾಡಿ. ನಂತರ ಇದಕ್ಕೆ ಬಿಸಿ ಎಣ್ಣೆ ನಾಲ್ಕು ಚಮಚ ಮತ್ತು ಬೇಕಷ್ಟು ನೀರು ಸೇರಿಸಿ ಚೆನ್ನಾಗಿ ನಾದಿ ಹಿಟ್ಟು ತಯಾರಿಸಿ ಬೇಕಾದ ಹದಕ್ಕೆ ನಿಪ್ಪಟ್ಟು ತಯಾರಿಸಿ ಕಾದ ಎಣ್ಣೆಯಲ್ಲಿ ಕರಿಯಿರಿ.

ಮಸಾಲೆ ವಡೆ
ಬೇಕಾಗುವ ಸಾಮಗ್ರಿ: ಅಕ್ಕಿಹಿಟ್ಟು- ಒಂದು ಕಪ್‌, ಮೈದಾಹಿಟ್ಟು- ಒಂದು ಕಪ್‌, ಚಿರೋಟಿರವೆ- ಒಂದು ಕಪ್‌, ಕಡ್ಲೆಹಿಟ್ಟು- ಒಂದು ಕಪ್‌, ಪುಟಾಣಿ- ಅರ್ಧ ಕಪ್‌, ಕೊಬ್ಬರಿತುರಿ- ಅರ್ಧ ಕಪ್‌, ಹಸಿಮೆಣಸು- ಎಂಟು, ಈರುಳ್ಳಿ- ಅರ್ಧ ಕಪ್‌, ಹೆಚ್ಚಿದ ಕರಿಬೇವು- ಹತ್ತು ಚಮಚ, ಇಂಗು, ನುಣ್ಣಗೆ ಜಜ್ಜಿದ ಓಮ ಮತ್ತು ಉಪ್ಪು ರುಚಿಗೆ.

ತಯಾರಿಸುವ ವಿಧಾನ: ಮೇಲೆ ತಿಳಿಸಿದ ಎಲ್ಲಾ ಹಿಟ್ಟುಗಳನ್ನು ಬೇರೆ ಬೇರೆಯಾಗಿ ಹಸಿವಾಸನೆ ಹೋಗುವವರೆಗೂ ಹುರಿದು ಮಿಕ್ಸಿಂಗ್‌ ಬೌಲ್‌ಗೆ ಹಾಕಿ ಮಿಶ್ರಮಾಡಿಕೊಳ್ಳಿ. ನಂತರ ಇದಕ್ಕೆ ಮೇಲೆ ತಿಳಿಸಿದ ಎಲ್ಲಾ ಸಾಮಗ್ರಿಗಳನ್ನು ಇದಕ್ಕೆ ಸೇರಿಸಿ ಬೇಕಷ್ಟು ನೀರು ಸೇರಿಸಿ ಚೆನ್ನಾಗಿ ಮಿಶ್ರಮಾಡಿ. ನಂತರ ಬಿಸಿ ಎಣ್ಣೆ ನಾಲ್ಕು ಚಮಚ ಸೇರಿಸಿ ಪುನಃ ಮಿಶ್ರಮಾಡಿ ಎಣ್ಣೆ ಸವರಿದ ಪ್ಲಾಸ್ಟಿಕ್‌ ಹಾಳೆಯಲ್ಲಿ ತೆಳ್ಳಗೆ ಸಣ್ಣ ಪೂರಿಯ ಹದಕ್ಕೆ ತಟ್ಟಿ, ಕಾದ ಎಣ್ಣೆಯಲ್ಲಿ ಕರಿಯಿರಿ.

ಗರಿಮುರಿ ನಿಪ್ಪಟ್ಟು
ಬೇಕಾಗುವ ಸಾಮಗ್ರಿ: ಅಕ್ಕಿಹುಡಿ- ಮೂರು ಕಪ್‌, ನೆಲಕಡ್ಲೆ- ಅರ್ಧ ಕಪ್‌, ಹುರಿಗಡ್ಲೆ- ಅರ್ಧ ಕಪ್‌, ಕಡ್ಲೆಹುಡಿ- ಒಂದು ಕಪ್‌, ಹೆಚ್ಚಿದ ಕರಿಬೇವು- ಎಂಟು ಚಮಚ, ಕೊಬ್ಬರಿತುರಿ- ಅರ್ಧ ಕಪ್‌, ಬೆಣ್ಣೆ- ಅರ್ಧ ಸೌಟು, ಕೆಂಪು ಮೆಣಸಿನಹುಡಿ- ಎರಡು ಚಮಚ, ಹಸಿಮೆಣಸು- ಎರಡು, ಇಂಗು ಮತ್ತು ಉಪ್ಪು ರುಚಿಗೆ.

ತಯಾರಿಸುವ ವಿಧಾನ: ಕಡ್ಲೆಕಾಯಿ ಬೀಜವನ್ನು ಹುರಿದು ಸಿಪ್ಪೆ ತೆಗೆದು ತರಿತರಿಯಾಗಿ ಪುಡಿ ಮಾಡಿ. ಮಿಕ್ಸಿಂಗ್‌ ಬೌಲ್‌ಗೆ ಅಕ್ಕಿಹುಡಿ ಮತ್ತು ಮೇಲೆ ತಿಳಿಸಿದ ಎಲ್ಲಾ ಸಾಮಗ್ರಿಗಳನ್ನು ಸೇರಿಸಿ ಚೆನ್ನಾಗಿ ಮಿಶ್ರಮಾಡಿ, ಕೊನೆಗೆ ಪುಡಿ ಮಾಡಿಟ್ಟ ಪುಟಾಣಿ ಮತ್ತು ಶೇಂಗಾ ತರಿಯನ್ನು ಸೇರಿಸಿ, ಇದಕ್ಕೆ ಲಿಂಬೆಗಾತ್ರದ ಬೆಣ್ಣೆ ಅಥವಾ ನಾಲ್ಕು ಚಮಚ ಬಿಸಿ ಎಣ್ಣೆ ಸೇರಿಸಿ ಪುನಃ ಮಿಶ್ರಮಾಡಿ ಎಣ್ಣೆ ಸವರಿದ ಪ್ಲಾಸ್ಟಿಕ್‌ ಹಾಳೆಯಲ್ಲಿ ನಿಪ್ಪಟ್ಟು ತಯಾರಿಸಿ ಕಾದ ಎಣ್ಣೆಯಲ್ಲಿ ಕರಿಯಿರಿ.

ಗೀತಸದಾ