ಸ್ನೇಹ ಸಾಗರ

Team Udayavani, Oct 4, 2019, 5:14 AM IST

ರಕ್ತ ಸಂಬಂಧಗಳೂ ಮೀರಿದಾ ಬಂಧವಿದು. ಯಾವ ಬಿಂದುವಿನಲ್ಲಿ ಸಂಧಿಸುವುದೋ!- ಅದು ಯಾವ ಅಮೃತಗಳಿಗೆಯಲ್ಲಿ ಈ ಹಾಡು ಜನ್ಮ ತಾಳಿತೋ ಏನೋ, ಸ್ನೇಹಿತರ ಪಾಲಿನ ರಾಷ್ಟ್ರಗೀತೆಯಾಗಿ ಬಿಟ್ಟಿರುವುದಂತೂ ನಿಜ. ಜಗತ್ತಿನ ಎಲ್ಲಾ ಸಂಬಂಧಗಳಿಗಿಂತಲೂ ಒಂದು ಶ್ರೇಷ್ಠವಾದ ಸಂಬಂಧವಿದೆ ಎಂದರೆ ಅದು ಸ್ನೇಹ ಸಂಬಂಧ ಮಾತ್ರ. ಯಾವ ಜಾತಿ, ಧರ್ಮ, ಲಿಂಗಭೇದ ಕೇಳದೆ ಅರಳುವ, ರಕ್ತ ಹಂಚಿಕೊಂಡು ಒಡಹುಟ್ಟದೇ ಇದ್ದರೂ ಒಂದೇ ತಟ್ಟೆಯಲ್ಲಿ ಹಂಚಿ ತಿನ್ನುವಷ್ಟು ಸಲುಗೆ ಬೆಸೆಯುವ ಸುಂದರ ಪುಷ್ಪವೇ ಈ ಸ್ನೇಹ. ಸ್ನೇಹಿತರೆಂದರೆ ಹೇಗಿರಬೇಕು ಎಂದು ಕೇಳಿದರೆ ಕೃಷ್ಣ-ಸುಧಾಮರ ಹಾಗಿರಬೇಕು ಎನ್ನುತ್ತಾರೆ ಹಿರಿಯರು. ಏಕೆಂದರೆ, ಕಷ್ಟ-ಸುಖ ಇವೆರಡರಲ್ಲೂ ತನ್ನ ಇರುವಿಕೆಯನ್ನು ತೋರುವವನೇ ನಿಜವಾದ ಗೆಳೆಯ. ಆದರೆ, ಇತ್ತೀಚೆಗೆ ಈ ಸ್ನೇಹವೆನ್ನುವುದು ತನ್ನ ನಿಜವಾದ ಅರ್ಥ ಕಳೆದುಕೊಂಡು ಕೇವಲ ವಾಟ್ಸಾಪ್‌-ಫೇಸ್‌ಬುಕ್‌ಗಳಿಗೆ ಮಾತ್ರ ಸೀಮಿತವಾಗಿದೆಯೇ ಎನ್ನುವುದು ನನ್ನ ಅನಿಸಿಕೆ. ಕಾರಣ, ಸ್ನೇಹಿತರ ಆಯ್ಕೆಯಲ್ಲಿ ಎಡವುದು, ಹಾಗೆ ಸ್ನೇಹವೆಂದರೆ ಕೇವಲ ಮೋಜು-ಮಸ್ತಿಗಾಗಿ ಇರುವಂಥದ್ದು ಎನ್ನುವ ತಪ್ಪುಕಲ್ಪನೆಗಳು, ಸ್ನೇಹಿತರ ದಿನಾಚರಣೆಯ ಹೊಸ್ತಿಲಿನಲ್ಲಿರುವ ನಾವು ಹೇಗೆ ನಮ್ಮ ಸ್ನೇಹವನ್ನು ಸ್ಟ್ರಾಂಗ್‌ ಆಗಿ ಜೀವನಪರ್ಯಂತ ಕಾಪಾಡಿಕೊಳ್ಳಬಹುದು ಎನ್ನುವುದಕ್ಕೆ ಇಲ್ಲಿವೆ ನನ್ನ ಕೆಲವು ಸಲಹೆಗಳು.

ಯೋಚಿಸಿ ಸ್ನೇಹ ಬೆಳೆಸಿ
ಸ್ನೇಹಕ್ಕೆ ವಯಸ್ಸಿನ ಮಿತಿಯಿಲ್ಲ. ಅದು ಹುಟ್ಟಿದ ಮಗುವಿನಿಂದ ಹಿಡಿದು ಕೇವಲ ಒಂದೆರಡು ತಾಸು ಪಕ್ಕದಲ್ಲಿ ಕುಳಿತು ಪ್ರಯಾಣ ಮಾಡುವ ಅಪರಿಚಿತರೊಡನೆಯೂ ಚಿಗುರೊಡೆಯಬಹುದು. ಆದರೆ, ಹುಟ್ಟುವ ಎಲ್ಲರ ಸ್ನೇಹವೂ ಪರಿಶುದ್ಧವಾಗಿರುತ್ತದೆ, ಲೈಫ್ಟೈಮ್‌ ಗ್ಯಾರಂಟಿ ಇರುತ್ತದೆ ಎಂದು ಹೇಳಲಾಗುವುದಿಲ್ಲ. ಸ್ನೇಹದಿಂದ ಬದುಕನ್ನು ಕಟ್ಟಿಕೊಂಡವರಿದ್ದಾರೆ. ಅದೇ ಸ್ನೇಹದಿಂದ ಸರ್ವಸ್ವವನ್ನೂ ಕಳೆದುಕೊಂಡವರಿದ್ದಾರೆ. ಇದಕ್ಕೆಲ್ಲಾ ಮುಖ್ಯ ಕಾರಣ ಸ್ನೇಹಿತರ ಆಯ್ಕೆ. ಗೆಳೆತನ ಬೆಸೆಯುವಾಗ ಅತ್ಯಂತ ಸೂಕ್ಷ್ಮವಾಗಿ ಗಮನಿಸಬೇಕಾಗಿರುವುದು ಉತ್ತಮ ನಡತೆ, ಮಾತು, ಸಚ್ಚಾರಿತ್ರ್ಯ, ಒಳ್ಳೆಯ ಮನಸ್ಸು, ವಿಚಾರಶೀಲತೆ, ಸಹಕಾರ ಮನೋಭಾವ.

ಇರಲಿ ಕಾಳಜಿ
ಸ್ನೇಹವೆಂದರೆ ಕೇವಲ ಸಂಬಂಧವಲ್ಲ. ಅದೊಂದು ಭಾವ. ಪರಸ್ಪರ ಒಬ್ಬರಿಗೊಬ್ಬರು ಚಾರಿತ್ರ್ಯ ನಿರ್ಮಾಣ ಮಾಡಿಕೊಳ್ಳುವುದಕ್ಕಿರುವ ಅದ್ಭುತ ವೇದಿಕೆ. ಇಲ್ಲಿ ಕಾಳಜಿ ಬಹುಮುಖ್ಯ. ಈ ಕಾಳಜಿಗೆ ಹೆತ್ತವರು ತೋರುವ ಕಾಳಜಿಗಿಂತಲೂ ಒಂದು ಪಾಲು ಹೆಚ್ಚು ತೂಕವಿರುತ್ತದೆ ಎಂದರೆ ತಪ್ಪೇನಿಲ್ಲ. ನಿಮ್ಮ ಸ್ನೇಹಿತನಿಗೆ ಯಾವುದಾದರೂ ದುಶ್ಚಟಗಳಿವೆಯೇ, ಹಾಗಾದರೆ ಒಬ್ಬ ಒಳ್ಳೆಯ ಸ್ನೇಹಿತನ ಸ್ಥಾನದಲ್ಲಿ ನಿಂತುಕೊಂಡು ಅವನಿಗೆ ತಿಳಿಹೇಳಿ. ಎಷ್ಟೋ ಬಾರಿ ತಮ್ಮ ತಂದೆ-ತಾಯಿ ಮಾತನ್ನೂ ಕೇಳದವರೂ ಸ್ನೇಹಿತರ ಕಾಳಜಿಯ ಮಾತುಗಳಿಗೆ ಕಿವಿಗೊಟ್ಟು ಬದಲಾದವರಿದ್ದಾರೆ. ಆದರೆ, ಒಂದೇ ಸಮನೆ ಒತ್ತಾಯ ಮಾಡಬೇಡಿ, ನಿಂದಿಸಬೇಡಿ. ಅದರಿಂದ ನಿಮ್ಮ ಸ್ನೇಹಕ್ಕೆ ಎಳ್ಳುನೀರು ಬಿಡುವ ಸಾಧ್ಯತೆಗಳೇ ಹೆಚ್ಚು. ಕಾಲಾವಕಾಶ ನೀಡಿ, ಅವರ ಅಭ್ಯಾಸಗಳಿಂದಾಗುವ ಅಪಾಯಗಳ ಬಗೆಗೆ ಮನಮುಟ್ಟುವಂತೆ ಹೇಳಿ ಹಂತ ಹಂತವಾಗಿ ಸರಿದಾರಿಗೆ ತನ್ನಿ.

ಅಸೂಯೆ ಬೇಡ
ಸ್ನೇಹವೆಂದರೆ ಜೊತೆಯಾಗಿ, ಹಿತವಾಗಿ ಜೀಕುವ ಜೋಕಾಲಿಯೇ ವಿನಃ ನಾ ಮೇಲು, ನೀ ಕೀಳು ಎನ್ನುವ ಅಸ್ಪರ್ಶ ಆಚರಣೆಯಲ್ಲ. ಇಲ್ಲಿ ಗೌರವ, ಅಂತಸ್ತು, ಪ್ರತಿಷ್ಠೆ, ಅಧಿಕಾರ ಎಲ್ಲವೂ ನಗಣ್ಯ. ಹೀಗಿರುವಾಗ ಗೆಳೆಯರ ಅಭ್ಯುದಯ ನೋಡಿ ಅಸೂಹೆಪಡುವ ಮನೋಭಾವ ಸಲ್ಲದು. ಹಾಗೆಯೇ ಅಂತಸ್ತಿನ ಅಮಲಿನಿಂದ ಸ್ನೇಹಿತರನ್ನು ಕಡೆಗಣಿಸುವುದೂ ಕೂಡದು. ನಿಜವಾದ ಸ್ನೇಹಿತನೋರ್ವನಿದ್ದರೆ ಬಹುದೊಡ್ಡ ಆಸ್ತಿ ಇದ್ದಂತೆ ಎನ್ನುವುದನ್ನು ಅರಿತು ಒಬ್ಬರಿಗೊಬ್ಬರ ಶ್ರೇಯೋಭಿವೃದ್ಧಿಗೆ ಪ್ರೋತ್ಸಾಹಿಸಿಕೊಂಡು ಮುನ್ನಡೆದರೆ ಮಾತ್ರ ಅದು ಕೊನೆಯವರೆಗೂ ಉಳಿಯಲು ಸಾಧ್ಯ.

ಮಹೇಶ್‌ ಎಂ. ಸಿ.
ಪ್ರಥಮ ಬಿ. ಎಡ್‌.
ಎಸ್‌. ಡಿ. ಎಂ. ಬಿಎಡ್‌ ಕಾಲೇಜು, ಉಜಿರೆ

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

  • ಮಳೆಗಾಲವೆಂದರೆ ಮೈಮನಕೆ ಏನೋ ಸಂತೋಷ. ತುಂತುರು ಮಳೆಯಲಿ ನೆನೆಯುವಾಗಿನ ಖುಷಿ, ಬೇಸಿಗೆಯ ಬೆವರನ್ನು ತೊಯ್ದು ಹೊಸ ಹುರುಪನ್ನು ನೀಡುತ್ತದೆ. ಮೊದಲ ಮಳೆಗೆ ಗಿಡಮರಗಳೆಲ್ಲಾ...

  • ಯಾರ ಬಳಿಯಲ್ಲಿ ನೋಡಿದರೂ ಮೊಬೈಲ್‌. ಮೊಬೈಲ್‌ ಇಲ್ಲದ ವ್ಯಕ್ತಿಯನ್ನು ಇಂದು ಹುಡುಕಲು ಸಾಧ್ಯವೇ ಇಲ್ಲ ಎನ್ನುವಷ್ಟರ ಮಟ್ಟಿಗೆ ನಾವಿಂದು ತಲುಪಿದ್ದೇವೆ. ಒಂದು ಕ್ಷಣ...

  • ಮೂರು ವರುಷಗಳ ನೂರಾರು ನೆನಪುಗಳನ್ನು ಮೆಲುಕು ಹಾಕುವ ವಿದಾಯದ ದಿನ ಬಂದೇ ಬಿಟ್ಟಿತು. ಚಾಕೊಲೇಟ್‌ನಿಂದ ಹಿಡಿದು ಕಣ್ಣೀರ ತನಕ ಹಂಚಿಕೊಂಡ ಮಿತ್ರರನ್ನು ಬಿಟ್ಟುಹೋಗುವ...

  • "ಯಶಸ್ಸು" ಎಲ್ಲರೂ ಇಷ್ಟಪಡುವ ಪದ. ಈ ಭೂಮಿಯ ಮೇಲಿನ ಪ್ರತಿಯೊಬ್ಬ ವ್ಯಕ್ತಿಯೂ ಕೂಡ ಯಶಸ್ವಿ ಆಗಬೇಕು ಎಂದೇ ಆಶಿಸುತ್ತಾನೆ. ಆದರೆ, ಯಶಸ್ಸು ಎನ್ನುವುದು ಎಲ್ಲರಿಗೂ ಸಿಗುವುದಿಲ್ಲ....

  • ಅದೊಂದು ದಿನ. ಪೂರ್ಣಪ್ರಮಾಣದ ಶಿಕ್ಷಕರಾಗುವ ಮುನ್ನ ಪ್ರಾಯೋಗಿಕವಾಗಿ ಶಿಕ್ಷಕ ವೃತ್ತಿಯ ಅನುಭವಗಳನ್ನು ಪಡೆಯಲು ಇಂಟರ್ಶಿಪ್ ಗಾಗಿ ಶಾಲೆಗೆ ಹೋಗುತ್ತಿದ್ದ ಸಮಯವದು....

ಹೊಸ ಸೇರ್ಪಡೆ